އަބްދުލްމުހީތު (ބޮބީ) މަރާލި މައްސަލާގައި ކުށް ސާބިތުވެ، މަރަން ޙުކުމްކޮށްފައިވާ ދެ މީހުންނަށް ވަކީލަކު ހަމަޖައްސަން 10 ދުވަހުގެ މުއްދަތެއް ހައިކޯޓުން ދީފިއެވެ.
މި މައްސަލަ ހައިކޯޓުގައި އިސްތިއުނާފް ކޮށް، މިއަދު ހައިކޯޓުގައި ކުރިއަށްދިޔައީ މި މައްސަލައިގެ އިސްތިއުނާފް އަޑުއެހުމެކެވެ. މިއަދުގެ އަޑުއެހުމުގައި މައިމޫނާއި މުހުޖަތު ވަނީ، ޝަރީއަތް ކުރިއަށް ގެންދަން ބޭނުންވަނީ ވަކީލުންނާއެކު ކަމަށް ބުނެފައެވެ.
އެ ފުރުސަތު ދެއްވަމުން ހައިކޯޓުގައި މި މައްސަލަ ބައްލަވާ ބެންޗުގެ ރިޔާސަތު ބަލަހައްޓަވާ، ފަނޑިޔާރު ހާތިފް ހިލްމީ ވިދާޅުވީ މިއީ ވަކީލުން އައްޔަނު ކުރުމަށް ދޭ ފަހު ފުރުސަތު ކަމަށެވެ. އަދި މި މައްސަލައިގެ ގަޒިއްޔާއަށް ދުވަސްތަކެއް ވެފައިވާކަން ފާހަގަ ކުރައްވައި ފަނޑިޔާރު ވިދާޅުވީ، ވަކީލަކާއި ނުލައި ނަމަވެސް މި މައްސަލައިގެ ދެން އޮންނަ އަޑުއެހުން ކުރިއަށް ގެންދަވާނެކަމަށެވެ.
މުހީތުގެ މަރާލާފައިވަނީ ފިނޭންސް މިނިސްޓްރީ ކުރިމަތީގައި އޮންނަ ގޯޅިއެއްގައި ތޫނު އެއްޗެހިން ހަމަލާދީގެންނެވެ. އަދި އެ ކުށް ސާބިތުވެ މެރުމަށް ކުރިމިނަލް ކޯޓުން ހުކުމް ކޮށްފައިވަނީ ގދ. ގައްދޫ، އަބްލަޣީގޭ މުހުޖަތު އަހްމަދު ނާސިހު އާއި ޅ. ނައިފަރު، ޒައިތޫނިގެ މުހައްމަދު މައިމޫނެވެ.
2012 ވަނަ އަހަރުގެ ފެބްރުއަރީ މަހު، ފިނޭންސް މިނިސްޓްރީ ކުރިމަތީގައި އޮންނަ ގޯޅި ތެރޭގައި ގ. ވޭރު، އަބްދުލް މުހީތަށް ތޫނު އެއްޗެހިން ހަމަލާދީ މަރާލި މައްސަލާގައި ޅ. ނައިފަރު ޒައިތޫނިގޭ މުހައްމަދު މައިމޫނާއި ގދ. ގައްދޫ އަބްލަޣީގޭ، މުހުޖަތު އަހުމަދު ނާސިހުގެ އަދި ސ. މަރަދޫ ސަލްޓަންވިލާ، އަލީ މުޝައްފައު ގެ މައްޗަށް ދައުލަތުން ދައުވާ ކުރިނަމަވެސް ކުށް ސާބިތުވާކަމަށް ކުރިމިނަލް ކުރިމިނަލް ކޯޓުން ހުކުމް ކުރީ، މުހުޖަތާއި މައިމޫންއަށެވެ.
މުހުޖަތާއި މައިމޫން މެރުމަށް ކްރިމިނަލް ކޯޓުން ހުކުމް ކުރީ މުހީތުގެ ހުރިހާ ވާރިސުން ގާތިލުންގެ ފުށުން ޤިޞާޞް (މަރަށް މަރު) ހިފުމަށް ބޭނުންވާތީ، އިސްލާމީ ޝަރީއަތާއި ރާއްޖޭގެ ގާނޫނުގައި ބުނެފައިވާ ގޮތަށެވެ.
