އިދިކޮޅު ހަރަކާތްތަކާއި އެއްވެސް ގޮތަކަށް ނުގުޅި އުޅުއްވާ ކުރީގެ ހޯމް މިނިސްޓަރ އުމަރު ނަސީރަށް ރައްދުވާ ގޮތަށް ޖުމްހޫރީ ޕާޓީގެ ނައިބު ލީޑަރު އަމީން އިބްރާހިމް ޓްވީޓުތަކެއް ކުރައްވައިފިއެވެ.
އިދިކޮޅު ހަތަރު ލީޑަރުންގެ އިއްތިހާދުގެ އެތެރެއަށް ވަދެވަޑައިނުގެން އޭގެބޭރުން ސިޔާސީ ހަރަކާތްތައް ހިންގަވަމުން އަންނަ އުމަރު ނަސީރަށް ރައްދުވާ ގޮތަށް އަމީން ކުރެއްވި އެއް ޓްވީޓުގައި ވިދާޅުވެފައި ވަނީ "ހިކި ދިޔައިގައި ގޮނޑުދޮށުގައި އެކަނިމާއެކަނި ދޮށި އުކާލަ އުކާލަ ހުރެގެނެއް މަހެއް ނުބޭނޭނެ" ކަމަށެވެ. އަދި ރަނގަޅަށް މަސް ބާނަން ބޭނުމިއްޔާ ޓީމާއެކު ދަނޑަށް ނުކުންނަން އޮޑިއަށް އެރުމަށްވެސް އަމީން ވަނީ ގޮވާލައްވާފައެވެ. އަމީން ވިދާޅުވީ "ލައިގެން ކާލާނެ ވަރުވެސް ވާނީ" އޮޑިއަށް އެރިއްޔާ ކަމަށެވެ.
އަމީން ކުރެއްވި ދެވަނަ ޓްވީޓުގައި ވިދާޅުވެފައި ވަނީ ހުރިހާ ސިޔާސީ ލީޑަރުން ޖަލަށްލައި، ރައްޔިތުންގެ މަޖިލީހުގެ ބާރަ މެމްބަރުންގެ ގޮނޑި ގެއްލުވާލައި، އިތުރު ބާރަ މެމްބަރުން ޖަލަށް ލުމުގެ މަސައްކަތް ކުރިޔަށް ގެންދާއިރު، އަނިޔާ އާއި ބޭއިންސާފާ ދެކޮޅު މީހުން އެކަހެރިކޮށް ނުތިބެ، "މުރަނަކަން ދޫކޮށް" އިދިކޮޅު އިއްތިހާދުގެ އޮޑީގައި ދަތުރުކުރަން ޖެހޭނެ ކަމަށެވެ.
އަމީން ކުރެއްވި ފަހު ޓްވީޓުގައި ވަނީ އުމަރު ނަސީރުގެ ނަންވެސް ލިޔުއްވާފައެވެ. އިދިކޮޅު އެއްވެސް ފަރާތަކާ ބައިއަތު ނުހިފައި އެކަހެރި ސިޔާސީ މަސައްކަތްތަކެއް ކުރައްވާ އުމަރު ނަސީރުގެ ނަން ޖެއްސެވުމަށް ފަހު އަމީން ކުރެއްވި ފަހު ޓްވީޓުގައި ވިދާޅުވެފައި ވަނީ އުންމީދެއް އޮތަސް، "އުމަރު ނަސީރުވެސް" އަދި އަނިޔާވެރިކަމާ ދެކޮޅު އެހެން ސިޔާސީ ބޭފުޅުންވެސް "ފޭގައި" ނުތިއްބެވުމަށް އެދޭ ކަމަށެވެ. އަދި ރައީސް އަބްދުﷲ ޔާމީންއާ ދެކޮޅަށް ރައްޔިތުން ކުރާ އުދަނގޫ ދަތުރުގައި އަމަލީ ގޮތުން ބައިވެރިވެވެން އޮތް ގޮތަކުން ބައިވެރިވުން މުހިންމު ކަމަށްވެސް ވިދާޅުވެފައި ވެއެވެ. އަދި އިދިކޮޅު އިއްތިހާދުގައި "ތަފާތު ފިކުރުތަކަށް ޖާގަ އެބައޮތް" ކަމަށްވެސް އަމީން ވިދާޅުވިއެވެ.
އިދިކޮޅު އިއްތިހާދުގެ ތެރޭގައި އޮތް އެންމެބޮޑު ޕާޓީ ކަމަށްވާ އެމްޑީޕީ އަށާއި ކުރީގެ ރައީސް މުޙަންމަދު ނަޝީދަށް މިހާރުވެސް ވަރަށް ބޮޑަށް ފާޑު ވިދާޅުވަމުން ގެންދަވާ އުމަރު ނަސީރު އިދިކޮޅު އިއްތިހާދާ ގުޅިވަޑައިނުގެން ހުންނަވަނީވެސް އެމްޑީޕީ އާއި ނަޝީދާ އެއްކޮޅަށް އަރައިވަޑައިނުގަންނަވާނެ ކަމަށް ވިދާޅުވެއެވެ. ނަމަވެސް އިދިކޮޅު އިއްތިހާދުން އެއްކެންޑިޑޭޓެއް ނެރޭ ވާހަކައަށް އުމަރުވެސް ވަނީ މީޑިޔާގައި ވާހަކަ ދައްކަވާފައެވެ.
ކުރިޔަށް އޮތް ރިޔާސީ އިންތިޚާބުގައި ރައީސް ކަމަށް ވާދަކުރައްވާނެކަން އިއުލާން ކުރައްވައިގެން ހުންނެވި އުމަރު ނަސީރު ވަނީ ރިޔާސީ އިންތިޚާބުގައި ޖޭޕީއާއެކު ކުރިޔަށް ދެވޭނެ ގޮތްތަކެއް އޮތޯ ޖޭޕީގެ ބަޔެއް އިސްވެރިންނާވެސް ދާދިފަހުން ބައްދަލު ކުރައްވާފައެވެ. އަދި މިވަގުތު ލަންޑަނުގައި ހުންނެވި ކުރީގެ ނައިބު ރައީސް ޑރ މުޙަންމަދު ޖަމީލް އަޙްމަދާ ބައްދަލު ކުރެއްވުމަށް ދާދިފަހުން އުމަރު ވަނީ ލަންޑަނަށްވެސް ވަޑައިގެންފައެވެ. ނަމަވެސް އުމަރުގެ ސިޔާސީ އެއްވެސް މަސައްކަތެއް އިދިކޮޅު އިއްތިހާދުގެ ތެރެއަކުން އަދި ނުގެންދަވައެވެ.
