މިއަހަރުގެ ރަމަޟާން މަހުގެ ރޭތައް އިޙްޔާ ކުރުމުގެ ފުރަތަމަ ފޯރަމް މިރޭ އޮންނާނެ ކަމަށް އިސްލާމިކް މިނިސްޓްރީން ބުނެފިއެވެ.
އެ މިނިސްޓްރީން ބުނި މިރޭގެ ފޯރަމް އޮންނާނީ 21:30 ން 22:30 އަށް ކަމަށާއި ފޯރަމްގައި ބައިވެރިވެ ވަޑައިގަންނަވާނީ އައްޝައިޚް އިލްޔާސް ޙުސައިންއާއި އައްޝައިޚް ނަޞްރުﷲ ޢަލީ ކަމަށެވެ.
1443 ވަނަ އަހަރުގެ ރަމަޟާންމަހުގެ ރޭތައް އިޙްޔާކުރުމަށް ކުރިއަށްގެންދާ އިޙްޔާ ފޯރަމްގެ ފުރަތަމަ ޕްރޮގްރާމްގެ މައުޟޫޢުއަކީ “ހެޔޮކަމުގެ މޫސުމުގެ ފައިދާ ލިބިގަތުމުގައި އަވަސްވެގަންނާށެވެ!” އެވެ.
އިސްލާމިކް މިނިސްޓްރީން ބުނެފައިވަނީ ކޮންމެ އާދިއްތަ، ބުރާސްފަތި އަދި ހުކުރު ދުވަހުގެ ރޭ ބާއްވާ އިޙްޔާ ފޯރަމްތައް ކުރިއަށްދާނީ ކޮންމެ ރެއަކުވެސް 21:30 އިން 22:30 އަށް ކަމަށެވެ.
މާލޭ ސިޓީގެ އިތުރުން ކުޅޫދުއްފުށި، އައްޑޫ އަދި ފުވައްމުލައް ސިޓީ އާއި ރ. އުނގޫފާރު ގައި ވެސް މިއަހަރުގެ އިހްޔާ ފޯރަމް ބޭއްވުމަށް ވަނީ ނިންމާފައެވެ.
އެގޮތުން އާދިއްތަ އަދި ބުރާސްފަތި ދުވަހު އިޙްޔާ ފޯރަމްތައް ކުރިއަށްދާނީ މާލެ ސިޓީ، އިސްލާމީ މަރުކަޒުގައި ކަމަށާއި ހުކުރު ދުވަހުގެ ރޭގެ އިޙްޔާ ފޯރަމްތައް ރާއްޖޭގެ އެކި އަތޮޅުތަކުގައި ބޭއްވުމަށް ނިންމާފައިވާ ކަމަށް ވެސް އެ މިނިސްޓްރީން ބުނެއެވެ.
އިސްލާމިކް މިނިސްޓްރީން ބުނީ އޭޕްރީލް 8 ވަނަ ދުވަހުގެ ރޭ ކުޅުދުއްފުށި ސިޓީގައި އޭޕްރިލް 15 ވަނަ ދުވަހުގެ ރޭ އައްޑޫ ސިޓީގައި އަދި އޭޕްރިލް 22 ވަނަ ދުވަހުގެ ރޭ ފުވައްމުލަކު ސިޓީގައި މި ފޯރަމް ބާއްވާއިރު، 29 އޭޕްރިލްގައި ބާއްވާނީ ރ. އުނގޫފާރުގައި ކަމަށެވެ.
