ރަމަޟާން މަހު ވެކްސިން ޖަހައިދޭ ގަޑިތަކަށް ބަދަލު ގެނެސްފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ ހުކުރު އަދި ހޮނިހިރު ފިޔަވައި ހަފުތާގެ ކޮންމެ ދުވަހެއްގައި ވެސް ވެކްސިން ޖަހައިދޭނެ ކަމަށެވެ. އަދި ވެކްސިން ޖަހާނީ ރޭގަނޑު 9 އިން 11 އަށް ކަމަށެވެ.
މާލެ ސަރަހައްދުގައި ވެކްސިން ޖަހައިދޭނީ ދަރުމަވަންތަ ހޮސްޕިޓަލުންނާއި ހުޅުމާލެ ހޮސްޕިޓަލުން ކަމަށާއި އެ ދެ ހޮސްޕިޓަލުން ވެސް ޖަހައިދޭނީ ފައިޒާ ވެކްސިން ކަމަށެވެ. އަދި ވެކްސިން ޖެހުމަށް އެއްވެސް އެޕޮއިންޓްމަންޓެއް ހައްދަން ނުޖެހޭނެ ކަމަށް ވެސް އެޗްޕީއޭ އިން ބުނެއެވެ.
މާޗު މަހުގެ 14 ވަނަ ދުވަހާ ހަމައަށް ރާއްޖޭގައި ވެކްސިންގެ ފުރަތަމަ ޑޯޒް ޖަހާފައިވަނީ 398348 މީހުންނެވެ. އަދި 371،439 މީހުން ދެވަނަ ޑޯޒް ޖަހާފައިވާއިރު 143،477 މީހުން ވަނީ ބޫސްޓަރ ޑޯޒް ފުރިހަމަކޮށްފައެވެ.
