އިތިއޯޕިޔާގެ ޓިގްރޭގެ ސަރަހައްދުގެ ހަނގުރާމަވެރިންނާ މައި ސަރުކާރާ ދެމެދު ކުރިއަށްދާ ހަނގުރާމަަ ނިމުމަކަށް ގެނައުމަކީ އެގައުމުގެ ބޮޑުވަޒީރު އަބީ އަޙްމަދު ޢަލީގެ އިސްތަށިފުޅުގައި އެޅިފައިވާ "ޚާއްސަ މަސްއޫލިއްޔަތެއް" ކަމުގައި ނޯބެލް ކޮމިޓީން ބުނެފިއެވެ. ނޯބެލް ސުލްހައިގެ އިނާމު ލިބިވަޑައިގެންފައިވާ ބޭފުޅަކާ މެދު މިފަދަ މޭރުމަކުން ވާހަކަދެއްކުމަކީ އެކޮމިޓީން ވަރަށް ނުކުރާ ކަމެކެވެ.
އިތިއޯޕިޔާއާއި އަވަަށްޓެރި އެރިޓްރިޔާއާ ދެމެދު ދިގުލައިގެން ގޮސްފައި އޮތް ހަަމަނުޖެހުން ނިމުމަކަށް ގެނައުމުގައި އޭނާ އަދާކުރައްވާފައިވާ ދައުރަށްޓަކައި ބޮޑުވަޒީރު އަބީއަށް ވަނީ 2019 ވަނަ އަހަރު ނޯބެލް ސުލްހައިގެ އިނާމު ލިބިވަޑައިގެންފައެވެ. މިހަމަނުޖެހުމަކީ އެފްރިކާ ބައްރުގައި އެންމެ ދިގުލައިގެން ދިޔަ ހަމަނުޖެހުމެވެ.
"ބޮޑުވަޒީރުގެ ހައިސިއްޔަތުންނާއި، ނޯބެލް ސުލްހައިގެ އިނާމު ލިބިވަޑައިގެންފައިވާ ބޭފުޅެއްގެ ހައިސިއްޔަތުން (ޓިގްރޭގެ) ހަމަނުޖެހުން ނިމުމަކަށް ގެެނެސް ސުލްހައަށް މަގުފަހިކުރެއްވުމަކީ އަބީ އަޙްމަދުގެ މައްޗަށް އޮތް ޚާއްސަ ޒިންމާއެއް." ނޯވޭގެ ނޯބެލް ކޮމިޓީގެ ރައީސު ބެރިޓް ރީސް-އެންޑަސަން ނެރުއްވި ބަޔާނެއްގައި އޭނާ ވިދާޅުވެފައި ވެއެވެ.
"އަބީ އަޙްމަދަށް ލިބިވަޑައިގަތް އިނާމަކީ އޭނާކުރައްވާފައިވާ މަސައްކަތްޕުޅާއި 2019 ގެ ހާލަތަށް ބަލާފައި އޭނާގެ ފަރާތްޕުޅުން އުއްމީދުކުރުން ހައްގު ކަންކަމަށް ބަލާފައި އޭނާއަށް އެރުވުނު އިނާމެއްކަން ފާހަގަކޮށްލަން ޖެހޭ." ބަޔާނުގައި ވެއެވެ. "އޭގެ ކުރީގެ ތާރީޚަށް ބަލާއިރު ފެންނަން އޮތީ ޚުދްމުޚްތާރު ވެރިކަމަކާއި، ވަރަށް އާއްމުވެފައި އޮތް ނަސްލީ ހަމަނުޖެހުމެއް."
ޓިގްރޭ ސަރަހައްދުގައި ވެރިކަންކުރާ ޓިގްރޭ ޕީޕަލްސް ލިބަރޭޝަން ފްރަންޓް (ޓީޕީއެލްއެފް) ގެ ހަނގުރާމަވެރިން އިތިއޯޕިޔާ ސިފައިންގެ ކޭންޕްތަކަށް ހަމަލާދޭކަމަށް ވިދާޅުވެ 2020 ވަނަ އަހަރުގެ ނޮވެންބަރު މަހު ބޮޑުވަޒީރު އަބީ އަޙްމަދު ވަނީ ޓިގްރޭ ސަރަހައްދަށް އިތިއޯޕިޔާގެ ލަޝްކަރުތައް ފޮނުއްވައި، ޓިގްރޭގެ ސިޔާސީ ހައްޔަރުކުރައްވަން މަސައްކަތްޕުޅުކުރައްވާފައެވެ. އެއާއެކު، އިތިއޯޕިޔާ ސަރުކާރުގެ ސިފައިންނާ ޓިގްރޭ ހަނގުރާމަވެރިންނާ ދެމެދު ހަނގުރާމަ ފެށުނެވެ. މި ހަނގުރާމައިގައި އެތައް ހާސް ބަޔަކު ވަނީ މަރުވެފައެވެ. އަދި ޓިގްރޭ ސަރަހައްދަށް ކާބޯތަކެއްޗާއި ބޭސް ވެއްދުން ފާއިތުވި ޖޫން މަހުއްސުރެ އިތިއޯޕިޔާ ސަރުކާރުން މަނާކޮށްފައި ވާއިރު، އެ ސަރަހައްދުގައި ދިރިއުޅޭ އެެތައްބަޔަކު ވަނީ ބަނޑުހައިހޫނުކަމާ ކުރިމަތިލާން ޖެހިފައެވެ. އަދި އެތައް މިލިއަން ބަޔަކު ގެދޮރު ދޫކޮށް ދާން ވަނީ މަޖުބޫރުވެފައެވެ.
އެކުވެރި ދައުލަތްތަކުގެ ޖަމްއިއްޔާ (އދ.) އިން ބުނާގޮތުގައި ޓިގްރޭ ސަހަރައްދު އޮތީ ނުސީދާ ހިސާރެއްގެ ދަށުގައެވެ.
"އިންސާނީ ހާލަތު ވަރަށް އިންތިހާއަށް ނާޒުކު. އަދި އިންސާނީ އެހީ އެކަށީގެންވާ ގޮތުގައި ފޯރުކޮށް ނުދެވުމީ ބަލައިގަނެވޭނޭ ކަމެއް ނޫން." ރީސް-އެންޑަސަން ވިދާޅުވިއެެވެ.
ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ހިއުމަން ރައިޓްސް ވޮޗްގެ އެގްޒެކަޓިވް ޑިރެކްޓަރ ކެނެތު ރޮތުވެސް ވަނީ ޓިގްރޭ ސަރަހައްދަށް އިންސާނީ އެހީ ވެއްދުމުގެ ހުއްދަދޭތޯ އަބީގެ ސަރުކާރަށް ފިއެްތުންކުރިމަތިކުރުމަށް ގައުމުތަކަށް ގޮވައިލައްވާފައެވެ.
"މިއީ ޖަމާއީ އަދަބު ދިނުމުގެ ރީތި މިސާލެއް. މިކަމުން އަދަބު ލިބެނީ ޓިގްރޭ ހަނގުރާމަވެރިންނަކަށް ނޫން. މިކަމުން އަދަބު ލިބެނީ ޓިގްރޭގެ ރައްޔިތުންނަށް." އޭނާ ވިދާޅުވިއެވެ.
