ޗައިނާ އާއި ދިވެހި ރާއްޖެއާ ދެމެދު މިނިވަން ވިޔަފާރީގެ އެއްބަސްވުމެއްގައި ސޮއިކުރެއްވުމަށް މިއަދު ބޭއްވެވި ވަޒީރުންގެ މަޖިލީހުގެ މަޝްވަރާގެ މަތިން ރައީސުލްޖުމްހޫރިއްޔާ އަބްދުﷲ ޔާމިން ޢަބްދުލްޤައްޔޫމް މިއަދު ނިންމެވި ނިންމެވުން ކުރިޔަށް ގެންދިޔުމަށް ރައްޔިތުންގެ މަޖިލީހުން މިރޭ ރުހުން ދީފިއެވެ.
ސަރުކާރުން ރައްޔިތުންގެ މަޖިލީހަށް މިކަން ހުށަހެޅުމުން މަޖިލީހުން އެކަމަށް ރުހުން ދީފައި ވަނީ މިރޭ އޮތް މަޖިލީހުގެ ޖަލްސާގައި ބައިވެރިވެވަޑައިގެންނެވި ތިރީސް މެމްބަރުންގެ އިއްތިފާގުންނެވެ. މިބިލަށް މަޖިލީހުން ރުހުން ދީފައި ވަނީ ގައުމީ ސަލާމަތުގެ ކޮމިޓީން ދިރާސާކޮށް މަޖިލީހަށް ފޮނުވުމުންނެވެ. މިރޭގެ ޖަލްސާ އިދިކޮޅު މެމްބަރުން ވަނީ ބޮއިކޮޓް ކުރައްވާފައެވެ.
ގައުމީ ސަލާމަތު ކޮމެޓީން އެ ބިލު ދިރާސާ ކުރުމަށްފަހު ކޮމެޓީ ރިޕޯޓު މަޖިލީހަށް ހުށަހެޅުއްވީ ގައްދޫ ދާއިރާގެ މެމްބަރު އަހުމަދު ރަޝީދުއެވެ. މިއަދު ބޭއްވި ކޮމެޓީ ބައްދަލުވުން ކުރިއަށް ގެންގޮސްފައި ވަނީ އިކޮނަމިކް މިނިސްޓަރު މުހައްމަދު ސައީދާއި މިނިސްޓްރީގެ ޓެކްނިކަލް ފަރާތްތަކާ އެކު ސިއްރު ބައްދަލުވުމެއްގެ ގޮތުގައެވެ.
ޗައިނާ އާއި ރާއްޖެ މިނިވަން ވިޔަފާރީގެ އެއްބަސްވުމެއްގައި ސޮއި ކުރަން ވަޒީރުންގެ މަޖިލީހުގެ މި ނިންމެވުމާއި ގުޅޭގޮތުން މަޢުލޫމާތު ދެއްވުމަށް ރައީސުލްޖުމްހޫރިއްޔާގެ އޮފީހުގައި މިއަދު ބޭއްވެވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން، މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙައްމަދު ސަޢީދު ވިދާޅުވީ މި ސަރުކާރުން ގެންގުޅުއްވާ ހުޅުވާލެވިފައިވާ ވިޔަފާރީގެ ސިޔާސަތުގެ ދަށުން ޗައިނާއާއިއެކު މިނިވަން ވިޔަފާރީގެ އެއްބަސްވުމެއް ޤާއިމުކުރެއްވުމަށް 2014 ވަނަ އަހަރުން ފެށިގެން މަސައްކަތް ފަށްޓަވާފައިވާ ކަމެއް ކަމަށެވެ.
މިގޮތުން، ދިވެހި ރާއްޖެއިން މިނިވަން ވިޔަފާރީގެ އެއްބަސްވުން ތަކެއް ޤާއިމު ކުރުމަށް މަސައްކަތް ކުރަން ޖެހުނީ 2011 ވަނަ އަހަރު ދިވެހި ރާއްޖެ އެންމެ ކުޑަކޮށް ތަރައްޤީ ވެފައިވާ ޤައުމަކުން ތަރައްޤީ ވަމުން އަންނަ ޤައުމަކަށް ބަދަލުވުމާއި ގުޅިގެން ބޭރު ދުނިޔޭގައި ދިވެހިރާއްޖެއިން އެކްސްޕޯޓްކުރާ މަހުގެ ބާވަތްތަކުން ޑިއުޓީ ނަގަން ފެށުމާއި ގުޅިގެންކަމުގައި މިބައްދަލުވުމުގައި މަޢުލޫމާތު ދެއްވަމުން މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙައްމަދު ސަޢީދު ވިދާޅުވިއެވެ.
ޗައިނާއާއިއެކު މިވެވޭ މިނިވަން ވިޔަފާރީގެ އެއްބަސްވުމުގެ ސަބަބުން ރާއްޖޭގެ މަސްވެރިންނަށް ވަރަށް ބޮޑު ކުރިއެރުމެއް ލިބޭނެކަމަށް މިނިސްޓަރ ސަޢީދު ވިދާޅުވިއެވެ. އެގޮތުން ދުނިޔޭގެ އެންމެ ބޮޑު ބާޒާރަށް، ދިވެހި މަސްވެރިން ބާނާ މަސް ސުން ޕަސެންޓް ޑިއުޓީގައި އެކްސްޕޯޓް ކުރުމަށް މަގުފައިހިވެގެން ދާނެކަމުގައިވެސް މިނިސްޓަރ ސަޢީދު ވިދާޅުވިއެވެ.
އިތުރަށް ވާހަކަފުޅު ދައްކަވަމުން މިނިސްޓަރ ސަޢީދު ވިދާޅުވީ ދިވެހިރާއްޖެއާއިއެކު މިނިވަން ވިޔަފާރީގެ ގުޅުން ޤާއިމްކުރުމަށް ޖަޕާނަށާއި، ޔޫރަޕިއަން ޔޫނިއަނަށާއި، އެމެރިކާ އަދި އިނގިރޭސިވިލާތަށް ވެސް ދަޢުވަތު ދެއްވާފައިވާނެ ކަމަށެވެ. އަދި، އެ ޤައުމުތަކުންވެސް ރާއްޖެއާއިއެކު މިނިވަން ވިޔަފާރީގެ އެއްބަސްވުންތައް ޤާއިމްކުރުމުގެ ޝައުޤުވެރިކަން ފާޅުކޮށް މަސައްކަތް ފެށޭނެކަމުގެ ޔަޤީންކަން މިނިސްޓަރ ސަޢީދު ވަނީ ދެއްވާފައެވެ.
