ޖަޕާނުގެ އޮސާކާގެ އިމާރާތެއްގައި ހިނގި އަލިފާނުގެ ހާދިސާއެއްގައި މަދުވެގެން 27 މީހުން މަރުވެއްޖެކަމުގައި އެރަށުގެ އަލިފާންނިއްވުމުގެ ޚިދުމަތްދޭ ފަރާތުން ހާމަކޮށްފިއެެވެ. ތަހުގީގުުކުރުމުގައި ހަރަކާތްތެރިވާ ފަރާތަކުން ޖަޕާނުގެ ބައެއް ނޫސްތަކަށް މައުލޫމާތު ދީފައިވާ ގޮތުގައި ބަޔަކު ގަސްތުގައި އިމާރާތުގައި ރޯކޮށްލީކަމަށް ފުލުހުން ޝައްކުކުރެއެވެ.
އޮސާކާގެ ފެންވަރު މަތީ ބާތަކާއި ނައިޓް ކްލަބްތައް ގިނަ ސަރަހައްދެއް ކަމަށްވާ، ކިޓަޝިންޗީ ޑިސްޓްރިކްޓްގައި ހުންނަ އަށް ބުރި އިމާރާތެއްގެ ހަތަރުވަނަ ފަންގިފިލާގައި އަލިފާން ރޯވެފައިވާ ކަމުގެ ރިޕޯޓު އޮސާކާ މުނިސިޕަލް ފަޔާ ޑިޕާޓްމަންޓަށް ލިބުނީ މިއަދު ހެނދުނު 10:20 (ރާއްޖޭ ގަޑިން ހެނދު 6:20) ގައެވެ. އިމާރާތުގައި ރޯވި އަލިފާން ވަނީ ބައިގަޑިއެއްހާ އިރުގެ ތެރޭގައި ނިއްވާލާފައެވެ.
އަލިފާން ރޯވިކަން އެނގުނުތާ ގިނަ އިރެއް ނުވެ އަލިފާން ނިވާ 70 ލޮރީއާއި އެމްބިއުލާންސްތައް އެ ސަރަހައްދަށް ގޮސް، އަލިފާން ނިވުމާއި، މީހުން ސަލާމަތްކުރުމުގެ މަސައްކަތް ވަނީ ފަށާފައެެވެ.
ތަހުގީގުކުރާ ފަރާތަކުން ބައެެއް ނޫސްތަކަށް މައުލޫމާތު ދީފައިވާ ގޮތުގައި އަލިފާން ރޯވީ މެދު އުމުރުގެ ފިރިހެނަކު ގެންގުޅުނު ކަރުދާސް ކޮތަަޅަކުން ފޭބި އަލިފާން ހިފާ ދިޔާ އެއްޗެއްގައި ކަމުގެ ރިޕޯޓު ފުލުުހުންނަށް ވަނީ ލިބިފައެވެ. އެހެންކަމުން ފުލުހުން ބަލަނީ މިއީ މީހަކު ގަސްތުގައި ހިންގި އަމަލެއް ކަމަށެވެ.
އޮސާކާ ސްންްޓްރަލް ސްޓޭޝަން ކައިރީގައި ހުންނަ އެ އިމާރާތުގެ އަލިފާން ރޯވި ފަންގިފިލާގައި ހުންނަނީ ނަފްސާނީ މައްސަލަތަކަށް ފަރުވާދޭ ކްލިނިކެކެވެ. އަލިފާން ރޯވީ ކްލިނިކް ހެނދުނު ހުޅުވިތާ ބައިގަޑިއެއްހާ އިރުގެ ތެރޭގައެވެ. އަލިފާން ރޯވި ކްލިނިކްގެ އިތުރަށް ސެލޫނާއި، ހެދުން ފިހާރައާއި، އިނގިރޭސި ބަސް ކިޔަވައިދޭ ސްކޫލެއްވެސް ހުރެއެވެ. އިމާރާތުގެ ހަތަރުވަނަ ފަންގިފިލާގެ އިތުރުން ފުރާޅުން ބޯ ދުން އަރާތަން މީސް މީޑިޔާގައި އާއްމުވެފައިވާ ވީޑިޔޯތަކުން ފެނެއެވެ.
އަލިފާން ރޯވި އިމާރާތުގެ ކުރިމަތީގައި ހުންނަ އޮފީހެއްގައި މަސައްކަތްކުރާ މީހަކު ބުނި ގޮތުގައި އޭނާއަށް ފުރަތަމަ ފެނުނީ އެ އިމާރާތުގެ ހަތަރުވަނަ ފަންގިފިލާއިން އޮރެންޖު ކުލައިގެ ހުޅުގަނޑެއް އަރައިގެން ދިޔަ ތަނެވެ.
