އަމާން ވިލުންވެރި މުޖުތަމައެއް ބިނާކުރުމުގައި ޒުވާނުންނަށް ދިމާވާ މައްސަލަތަކުން އަރައިގަތުމަށް، ގދ. އަތޮޅު ހަރަތު ރަށަކަށް އަމާޒުކޮށް ހުވަދޫ އެއިޑުން ހިންގުމަށް ހަމޖެހިފައިވާ " ވަލްނަރަބަލް ޔޫތު ސަޕޯޓް" ޕްރޮޖެކްޓް ހިންގުމަށް ޓްރާންސްޕޭރެންސީ މޯލްޑިވްސްއާއި އެޖަމްއިއްޔާއާއި ދެމެދު އެއްބަސްވުމެއްގައި ސޮއިކޮށްފިއެވެ. ހުވަދޫ އެއިޑްގެ ފަރާތުން މިއެއްބްސްވުމުގައި ސޮއިކުރެއްވީ އެޖަމްއިއްޔާގެ އެގެޒެކެޓިވް ޑިރެކްޓަރ އަހުމަދު އަމީޒެވެ. ޓްރާންސް ޕޭރެންސީ މޯލްޑިވްސްގެ ފަރާތުން ސޮއިކުރެއްވީ އެގްޒެކެޓިވް ޑިރެކްޓަރު އާސިއަތު ރިލްވީނާއެވެ.
މިއީ ޔޫ.އެސް އެއިޑްގެ އެހީގައި ޓްރާސްޕޭރެންސީ މޯލްޑިވްސްގެ ފަރާތުން ހިންގާ ’ "ޕްރޮމޯޓިން ރެޒީލިއަންސް އިން ދި މޯލްޑިވްސް (ޕްރައިމް)' ޕްރޮޖެކްޓގެ ތެރެއިން ރާއްޖޭގެ މަދަނީ ޖަމްއިއްޔަތަކަށް ދޭ ދޭ ސަބްގްރާންޓުގެ ދަށުން ހިންގުމަށް ހަމަޖެހިފައިވާ މަޝްރޫއެކެވެ. މިމަޝްރޫގެ ދަށުން ގދ އަތޮޅު ތިނަދޫ، މަޑަވެލި، ހޯޑެއްދޫ އަދި ނަޑެއްލާގެ ޒުވަނުންނަށް އަމަޒުކޮށް ލައިފް ސްކިލްސް، ކެރިއަރ ގައިޑެންސް، ސައިކޯ ސޯޝަލް ސަޕޯޓް ފަދަ ޕްރޮގްރާމްތަކުގެ އިތުރުން މިފަދަ ޕްރޮގްރާމްތައް ހިންގުމަށް މަދަނީ ޖަމްއިއްޔާތަކާއި ކައުންސިލް، ކޮމިޔުނިޓީ ސެންޓަރ، އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ގާބިލުކަން އިތުރުކުރުމުގެ ޕްރޮގްރާމްތައް ހިންގުމަށް ހަމަޖެހިފައިވެއެވެ.
އަދި ކަންކަން ނިންމުމުގައި އިޒުވަނުންނާއި މުޖުތަމައުގެ ބައިވެރިވުން އިތުރުކުރުމަށް ހޭލުންތެރިކަމުގެ ޕްރޮގްރާމްތައް ހިންގުމާއި އެކު ޒުވާނުންނަށް އަމާޒުކޮށް ޔޫތު ކޭމްޕް ބާއްވައި، ޒުވަނުންގެ ކުޅިވަރު ހަރަކާތްތަކަށް އެހީތެރިވެދިނުމާއި ޒުވަނުންނަށް ޓެކްނިކަލް ވޮކޭޝަނަލް އެޑިޔުކޭޝަން ޕްރޮގްރާމެއް ހިންގުންވެސް މިމަޝްރޫއުގައި ހިމެނެއެވެ. 18 މަސްދުވަހުގެ މުއްދަތަށް ހިންގާ، 40،000 އެމެރިކާ ޑޮލަރުގެ މިމަޝްރޫއު ހިންގުމަށް ހަމަޖެހިފައިވަނީ މިމަޝްރޫއު އަމާޒުކުރާ ރަށްރަށުގެ ޖަމްއިއްޔާތަކާއި، ކައުންސިލްތައް އަދި އަންހެނުންގެ ތަރަށްގީއަށް މަސައްކަތްކުރާ ކޮމިޓީތަކާއި ގުޅިގެންނެވެ. މިމަޝްރޫއު ހިންގުމަގައި ބައިވެރިވާން ބޭނުންވާ ފަރާތްތަކަށް އެފުރުސަތު ވަނީ ހުޅުވާލެވިފައި ކަމަށް ހުވަދޫ އެއިޑުން މައުލޫމާތު ދެއެވެ.
