ޔޫރަޕިއަން ޔުނިއަން (އީޔޫ) ގެ ހިންގާ ގޮފި، ޔޫރަޕިއަން ކޮމިޝަނުން 'ގްލޯބަލް ގޭޓްވޭ' ގެ ނަމުގައި 300 ބައިނަލްއަގުވާމީ އިންްފްރާސްޓްރަކްޗާ މަޝްރޫއުތަކުގެ ބިޔަ ޕްލޭނެއް އިއުލާންކޮށްފިއެވެ. މި މަޝްރޫއުތަކަށް 300 ބިލިއަން ޔޫރޯ (340 ބިލިއަން އެމެރިކާ ޑޮލަރު އިންވެސްޓުކުރުމަށްް ރާވާފައި ވެއެވެ.
މިއީ ޗައިނާގެ ބިޔަ ބެލްޓް އެންޑް ރޯޑް ޕްލޭނާ ވާދަކުރަން އެކުލަަވާލި ޕްލޭނެއްކަަމުގައި ސީދާގޮތުގައި ނުބުނި ނަމަވެސް، ޔޫރަޕިއަން ކޮމިޝަނުންބުނި ގޮތުގައި އީޔޫގެ ޕްލޭން ޗައިނާގެ ޕްލޭނަށްވުރެ އީޔޫގެ ޕްލޭން މާ ރަނގަޅުވާނެއެވެ. މީގެ އިތުރަށް އެ ކޮމިޝަންގެ ރައީސާ އުރްސުލާ ވޮން ޑް ލެޔެން ވަނީ ފަގީރު ގައުމުތަކުގައި ޓެކްނޮލޮޖީއާއި، އާއްމު ޚިދުމަތްތައް ތަރައްގީކުރުމުގެ ސްޓްރެޓެޖީއެއްވެސް ހާމަކުރައްވާފައެވެ.
އޭނާ އިތުރަށް ހާމަކުރެއްވި ގޮތުގައި އީޔޫގެ ގްލޯބަލް ގޭޓްވޭ ޕްލޭނަކީ ދުނިޔޭގެ އިންފްރާސްޓްރަކްޗާ ތަރައްގީކުރުމަށް ހުށަހެޅި، ޑިމޮކްރެސީގެ ހަމަތަކާއި ދެފުށް ފެންނަ އުސޫލުތަކުގެ މައްޗަށް ބިނާވެފައިވާ އީޖާބީ (ޕްޒިޓިވް) ޕްލޭނެކެވެ.
"އަހަރުމެން ބޭނުންވަނީ ގްލޮބަލް ގޭޓްވޭއަކީ އޭގެ ފެންވަރު މަތިކަމާއި، އިތުބާރުހިފޭ ހަމަތަކާއި، ދެފުށްފެންނަ އުސޫލުތަކާއި، ރަނގަޅު ހިންގުންތެރިކަމަގެ ސަބަބުން މީހުން އިތުުބާރުކުރާ މަރުކާއަކަށް ހެދުމަށް." ވޮން ޑަ ލެެޔެން ވިދާޅުވިއެވެ.
21 ވަނަ ގަރުނުގެ ސިލްކް ރޯޑްގެ ގޮތުގައި ސިފަކުރެވޭ، ޗައިނާގެ ބެލްޓް އެންޑް ރޯޑް ޕްލޭންގެ ބޭނުންކޮށްގެން ޗައިނާއިން ވަނީ ދުނިޔޭގެ ކަންކޮޅުތަކުގައި އެގައުމުގެ ނުފޫޒު ގަދަކޮށްފައެެވެ. އެ ޕްލޭންގެ ދަށުން ދުނިޔޭގެ އާބާދީގެ ގާތްގަނޑަކަށް ދެބައިކުޅަ އެއްބައި ހިމެނޭ އަދި ދުނިޔޭގެ ޖީޑީޕީގެ ހަތަރުބައިކުޅަ އެއްބައި ހިއްސާކުރާ 70 ގައުމެއްގައި މަޝްރޫއުތައް ކުރިޔަށް އެބަދެއެވެ. ގާތްގަނޑަކަށް 1.3 ޓްރިިލިއަން އެމެރިކާ ޑޮލަރު ހޭދަވާނެކަމަށް ބެލެވޭ މި މަޝްރޫއުތަކުގެ ސަބަބުން އޭޝިޔާއާއި، އެފްރިކާއާއި، އިރުމަތީ ޔޫރަޕުގެ ގިނަ ގައުމުތަކެއްގައި ހިންގާ ބަނދަރުތަކާއި، ރޭލްވޭ ބިނާކުރުން ފަދަ ބޮޑެތި މަޝްރޫއުތަކުން އެ ގައުމުތައް ޗައިނާއާއި ގުޅައިލާއިރު، އެގައުމުތައް ވަނީ ޗައިނާއަށް ދަރަނިވެރިވެފައެވެ.
އިޔޫއިން ރާވާފައިވާ ގޮތުގައި 2027 ވަނަ އަހަރު އަންނަންވާ އިރަށް ޕަބްލިކް އަދި ޕްރައިވެޓް ފަންޑުގެ ގޮތުގައި 300 ބިލިއަން ޔޫރޯ ޖަމާކުރެވޭނެއެވެ. އެއީ އީޔޫގެ 27 މެންބަރު ގައުމާއި، ޔޫރަޕިއަން އިންވެސްޓްމަންޓް ބޭންކުގެ އިތުރަށް އަމިއްލަ ވިޔަފާރިތަކުންނެވެ. މި ޕްލޭންގެ ދަށުން ތަރައްގީވަމުން އަންނަ ގައުމުތަކުގައި މަޝްރޫއުތައް ހިންގަން ރާވާފައިވާ ދާއިރާތަކުގެ ތެރޭގައި ތިމާވެށްޓާ ރައްޓެހި ހައިޑްރޯޖަން އުފެއްދުން، ގަނޑުއަޑިން މުވާސަލާތީ ކޭބަލް އެޅުން އަދި ސްކޫލްތައް އިމާރާތްކުރުން ފަދަ ކަންކަން ހިމެނެއެވެ.
ޔޫރަޕިއަން ކޮމިޝަންގެ ރައީސާ ވިދާޅުވިގޮތުގައި މި ޕްލޭންގެ ދަށުން ލޯން ލިބޭ ގައުތަކުގައި ހިންގަން އިސްކަންދޭނެ މަޝްރޫތައް ކަނޑައަޅާނީ އެގައުމުތަކުންނެވެ. އެހެންނަމަވެސް، އޭނާ ފާހަގަކުރެއްވި ގޮތުގައި، އީޔޫއިން ބޭނުންވަނީ މަޝްރޫއުތައް ހިންގުމުގައި އީޔޫން ބޭނުންވަނީ އެ ޖަމާއަތުގެ ތިމާވެށްޓާ ރައްޓެހި، ޑިޖިޓަލް ސިޔާސަތާ ފުށުނައަރާ މަޝްރޫއުތަކަށް އިސްކަން ދިނުމަށެވެ.
