ޤާނޫނާއި ޚިލާފަށް ސަރުކާރުން އަތުލާފައިވާ ތަންތަނާއި ކޮށްފައިވާ ޖޫރިމަނާތައް މި ސަރުކާރު ބަދަލު ކުރުމަށް ފަހު ރުޖޫއަ ކޮށްދޭނެ ކަމަށް އިދިކޮޅު އެމްޑީޕީން މިއަދު ބުނެފިއެވެ.
އެމްޑީޕީން މިހެން ބުނީ ޖުމްހޫރީ ޕާޓީގެ ލީޑަރ ގާސިމް އިބްރާހިމްގެ ވިޔަފާރީގައި ސަރުކާރާއެކު ކޮށްފައިވާ މުއާމަލާތްތައް ރޫޅާލައި އެތަންތަން ސަރުކާރަށް ނެގުމުގެ އިތުރުން ގާސިމްގެ ވިޔަފާރިތަކާ ދެކޮޅަށް ސަރުކާރުން ކޮށްފައިވާ ޖޫރިމަނާތައް ކުށްވެރިކޮށް ނެރުނު ބަޔާނެއްގައެވެ.
އެމްޑީޕީން ބުނީ ޤާސިމް އިބްރާހީމަށް ރައީސް ޔާމީންގެ ސަރުކާރުން ދެމުންގެންދާ އަނިޔާތަކާއި ކުރަމުންދާ ފުރައްސާރައިގެ ތެރެއިން އެމަނިކުފާނުގެ ވިޔަފާރިތައް ހަލާކުކޮށްލައި ބަނގުރޫޓުކޮށްލުމަށް މަސައްކަތްކުރަމުން ގެންދާތީ ހަރު އަޑުން ކުށްވެރި ކުރާކަމަށެވެ.
"ޤާނޫނު އަސާސީ އާއި ޤާނޫނުތަކާ ޚިލާފަށް އެމަނިކުފާނުގެ މައްޗަށް ދަޢުވާކޮށް، ޖަލަށް ޙުކުމްކުރުމުގެ އިތުރުން އެމަނިކުފާނުގެ ވިޔަފާރީގެ މުޢަމަލާތްތައް، ޤާނޫނުތަކާއި އެއްބަސްވުންތަކާ ޚިލާފަށް ޢަބްދުﷲ ޔާމީންގެ ސަރުކާރުން ރޫޅާލައި، މުދާތައް އަތުލައި އެތައް މިލިއަން ޑޮލަރުން ޖޫރިމަނާކޮށް އެމަނިކުފާނުގެ ވިޔަފާރިތައް ބަނގުރޫޓު ކޮށްލުމުގައި ކެނޑިނޭޅި މަސައްކަތް ކުރަމުންދާކަން ކަންބޮޑުވުމާއެކު ފާހަގަ ކުރަމެވެ." އެމްޑީޕީން ބުނެފައިވެއެވެ.
އެމްޑީޕީން ބުނީ ގާސިމަށް ސަރުކާރުން މިފަދަ ނުޙައްޤު އަދަބުތަކާއި އަނިޔާތައް ދެމުން ގެންދަނީ މި ސަރުކާރުން ރައްޔިތުންނަށާއި މި ޤައުމަށް ދެމުންގެންދާ ބޮޑެތި ގެއްލުންތަކާ ދެކޮޅަށް އެމަނިކުފާނު މަސައްކަތް ކުރައްވާން ފެއްޓެވުމާ ގުޅިގެން ކަމަށެވެ. އަދި މިއީ އިދިކޮޅު ސިޔާސީ ލީޑަރުން "ނެތިކޮށްލުމަށް" ރައީސް ޢަބްދުﷲ ޔާމީންގެ ސަރުކާރުން ތަކުރާރުކޮށް ކުރަމުންގެންދާ މަސައްކަތުގެ ތެރެއިން ހިންގާ ޖަރީމާއެއް ކަމަށްވެސް ބުނެފައިވެއެވެ.
"އޮނަރަބަލް ޤާސިމް އިބްރާހީމްގެ ވިޔަފާރިތައް ހަލާކުކޮށް ބަނގުރޫޓްކޮށްލުމަށް ޢަބްދުﷲ ޔާމީންގެ ސަރުކާރުން ކުރަމުންދާ މަސައްކަތްތައް ވަގުތުން ހުއްޓާލުމަށް މި ޕާޓީން ސަރުކާރުގެ ހުރިހާ ފަރާތްތަކަށް ގޮވާލަމެވެ." އެމްޑީޕީގެ ބަޔާނުގައި ބުނެފައިވެއެވެ.
