ގާކޮއްޓާއި އަރަބިއްޔާ ކުރިން ހުރި ބިމުގައި ހަދާފައިވާ ފްލެޓް ތަކުގެ ތެރެއިން ފައިސާ ހަމަނުޖެހުނު 105 ފްލެޓް ވިއްކާލަން އެޗްޑީސީން ނިންމައިފިއެވެ.
އެޗްޑީސީން ކޮށްފައިވާ އިއުލާނެއްގައި ބުނެފައި ވަނީ ވިއްކާލަން ނިންމާފައި ވަނީ އަރަބިއްޔާ ހުރި ބިމުގެ ފްލެޓް ތަކުގެ ތެރެއިން 30 ފްލެޓާއި ގާކޮށި ހުރި ތަނުން 72 ފްލެޓެވެ. މި ފްލެޓްތައް ވިއްކާލާނީ އެންމެ ފުރަތަމަ ފޯމު ހުށަހަޅާ 105 ފަރާތަށް ކަމަށްވެސް އެޗްޑީސީން ވަނީ ބުނެފައެވެ. އެޗްޑީސީން ބުނީ ދޫކުރާނީވެސް 105 ފޯމު ކަމަށާއި އެއަށްވުރެ ގިނައިން ފޯމުވެސް ދޫނުކުރާނެ ކަމަށެވެ. ފޯމު ދޫކުރަނީވެސް 100000 ރުފިޔާގެ ބޭންކް ގެރެންޓީއެއް އެފަރާތަށް ދިނުމުންނެވެ. އަދި އެއްފަހަރާ ދެ މިލިޔަން ރުފިޔާ ދައްކާ ފަރާތްތަކުން ދެ މިލިޔަން ރުފިޔާގެ ބޭންކު ގެރެންޓި ޗެކެއް، އަދި ބޭންކު މެދުވެރިކޮށް ފައިސާ ދައްކާ ފަރާތްތަކުން ބޭންކު އެލިޖިބިލިޓީ ސިޓީ ހުށަހަޅަން ޖެހޭނެއެވެ. މިއިން ކޮންމެ ފްލެޓެއް ވިއްކުމަށް ހަމަޖެހިފައި ވަނީ 2000000 ރުފިޔާއަށެވެ.
ވިއްކާލާ ކޮންމެ ފްލެޓެއްގައިވެސް ވަނީ ތިން ކޮޓަރިއެވެ. ނަމަވެސް ފާޚާނާއާއެކު ހުންނަނީ އެއްކޮޓަރިއެވެ. އިތުރު ފާޚާނާއަކާއި ބަދިގެއަކާއި ސިޓިންރޫމެއް ފްލެޓް ތަކުގައި ހިމެނެއެވެ. އެޗްޑީސީން ބުނީ މާލެ އާއި ހުޅުމާލެ އަދި ވިލިނގިލިން އަމިއްލަ ބޯހިޔާވެހިކަން ލިބިފައި ހުރި އެއްވެސް މީހަކަށް މިއިން ފްލެޓެއް ނުވިއްކާނެ ކަމަށެވެ.
