ބާވެ ހަފުސްވެ، ތަތްތެޅިފައިވާ ހެދުން ގަނޑެއް ލައި، ބޯ ހާވައިލައިގެން މަގުމަތީގައި އެއިން މުސްކުޅި އަންހެން މީހާގެ ނަމަކީ ވަލްސާއެވެ. ނުވަތަ ވަލްސާ ޓީޗަރެވެ. ނޫނީ ވަލްސާ މިސްއެވެ. މިއިން ކޮންމެ ނަމެއް އޭނާއަށް ކިޔަސް އެންމެ ރަނގަޅެވެ. އޭނާގެ ވާހަކައާއިގެން ކުރިޔަށް ދަމާ ހެއްޔެވެ...
މީގެ އަހަރު ތަކެއް ކުރިޔަށް ޖެހިލައިފިނަމަ ވަލްސާ ގިނައިން ފެންނާނީ ދިވެހިން އާންމުކޮށް ގޮސް އުޅޭ އިންޑިޔާގެ ޓްރިވެންޑްރަމުން ކާރެއްގައި ނައްޓާލައިގެން ބާރު ސްޕީޑުގައި 10 ގަޑިއިރުގެ ދަތުރެއްގައި ގޮސް މަޑުކޮށްލެވޭ މަންޒިލެއް ކަމަށްވާ މަލައްޕުރަމްގައި ހުންނަ "އިސްލާޙިއްޔާ ޕަބްލިކް ސްކޫލް" ގެ ކޮންމެވެސް ކްލާސް ރޫމެއްގައި ދަރިވަރުންނަށް ހިސާބު ފިލާވަޅު ނަގައިދޭން ހުއްޓައެވެ.
އެއީ ވަލްސާގެ މާޒީއެވެ. އެއީ ވަލްސާގެ ޒުވާން އުމުރާއި މެދުއުމުގެ ދުވަސްތަކުގެ ހަނދާންތަކެވެ. އޭރު ވަލްސާއަކީ ސްކޫލްގައި ފާހަގަ ކުރެވޭ މުދައްރިސެކެވެ. ސްކޫލްގެ ވެރިންނާއި ދަރިވަރުންގެ އިޙްތިރާމާއި ލޯބި ހޯދާފައިވާ ގަދަރުވެރި، ޚިދުމަތްތެރި ޓީޗަރެކެވެ. ބެލެނިވެރިންގެ ރުހުމާއި އިތުބާރު ހޯދާފައިވާ ހީވާގި ޓީޗަރެކެވެ. އިސްލާޙުގެ މަގުން ދަރިވަރުން ގެންގޮސް ދެމުން ހިސާބުގެ އިލްމްގައި ދަރިވަރުންނަށް ބޮޑު ކުރިއެރުންތަކެއް ހޯދައިދެމުން އައި ހުރިހާ ކުދިން ލޯބިވާ ވަލްސާ ޓީޗަރެވެ.
ހުރިހާ މީހުންގެ އިހްތިރާމާއި ލޯބި ލިބި، ގަދަރުވެރި ވަޒީފާގައި ގިނަ އަހަރު ތަކެއް ހޭދަކުރުމަށް ފަހު، "ވަޒީފާއިން މުސްކުޅިކޮށް" ވަލްސާ ދަރިވަރުންނާ އަލްވަދާއު ކިޔައި ގެޔަށް ބަދަލުވީ ރިޓަޔަރ ކުރުމަށް ފަހު އާއިލާއާއެކު އުމުގެ ބާކީ ދުވަސްތައް އުފަލާއެކު އުޅެލުމުގެ ފޮނި ހުވަފެންތަކާއެކުގައެވެ. އޭނާގެ ހުރިހާ ވަގުތެއް ފިރިމީހާ އާއި ފިރިހެން ދަރިފުޅާއެކު ހިތްހަމަޖެހިލައިގެން، އެދެމީހުންގެ ލޯބިވެސް ލިބިގެން ގޭގައިވެސް ރީތި ދިރިއުޅުމެއް އުޅުމަށް އަޒުމް ކަނޑައަޅައިގެންނެވެ.
ނަމަވެސް ވަލްސާ ޓީޗަރު ވަޒީފާއިން ރިޓަޔަރކޮށް، މުސްކުޅިވެ ފިރިމީހާ އާއި ދަރިފުޅުގެ ލޯތްބާއި އެހީ ލިބެން ޖެހުނު ދުވަހު އޭނާއަށް ކުރިމަތިވި އިމްތިޙާނަކީ ދުވަހެއްގެ ކޮޅުންވެސް އޭނާ ހީކުރި ކަމެއްނޫނެވެ. އެތައްހާސް ދަރިވަރުންނަށް ކިޔަވައިދީ، އެތައް ބަޔެއްގެ ކުރިމަތީގައި އެހާގަދަރުވެރި ޓީޗަރެއްގެ ވަޒީފާގައި އުޅުމަށް ފަހު މުސްކުޅިވީ ދުވަހު ބާވެ ހަފުސްވެ، ތަތްތެޅިފައިވާ ހެދުން ގަނޑެއް ލައިގެން އިންޑިޔާގެ ކާރޫބާރޫ ބޮޑު ސްޓޭޓެއްގެ މަގުމަތީގައި ކާއެއްތި ކޮޅެއްދޭނެ މީހަކަށް ބަލައި ސަލާން ޖަހަން އިންނަން ޖެހިދާނެ ކަމަށް ވަލްސާ ޓީޗަރު ހިތަށްވެސް ނާރައެވެ. ނަމަވެސް މިއަދު ވަލްސާގެ ހަގީގަތަކީ އެއީއެވެ. އެދުވަސް އޭނާއާ ބައްދަލު ކޮށްފިއެވެ. އެދުވަސް އޭނާ ތަޙަންމަލު ކޮށްފިއެވެ.
ނުލާހިކު ހިތްހަމަޖެހިގެން އުޅެމުން އައިސް މުސްކުޅިވީ ދުވަހު ވަލްސާގެ ހަޔާތް ހިތާމައިގެ ކަނޑެއްގެ ތެރެއަށް ފޮނުވާލީ އޭނާ އެންމެ ލޯބިވާ ދެމީހުންގެ އެއްވެސް އޯގާތެރިކަމެއް، ރަހުމެއްނެތް އަތުންނެވެ. ފިރިމީހާ އާއި ފިރިހެން ދަރިފުޅުގެ އެހީއަށް އެދި އޭނާ ރޮއި އާދޭސް ކުރަމުން ދިޔަނަމަވެސް އެދެމީހުން ނިންމީ ވަލްސާ މަގުމައްޗަށް ހޫރާލުމަށެވެ. ތެޅޭނެ ގޮތަކަށް ތެޅެން މަގުމަތި ކޮށްލިއެވެ. އެހިސާބުން ވަންނާނެ ބޯހިޔާވެހި ކަމެއް، އަޅާލާނެ އިތުރު މީހަކުވެސް ނެތުމާއެކު ކުރީގެ ވަރުގަދަ ހިސާބު ޓީޗަރަށް މަޖުބޫރުވީ ދިވެހިންގެ އަވަށެއްގެ ގޮތުގައި މިހާރު ސިފަ ކުރެވިފައިވާ އިންޑިޔާގެ ޓްރެވިންޑްރަމްގެ މަގުމައްޗަށް ނުކުންނާށެވެ. ސަލާން ޖަހާށެވެ.
ޓްރިވެންޑްރަމްގެ މަގުމަތީގައި ބާވެ ތަތްތެޅިފައިވާ ހެދުން ގަނޑެއް ލައިގެން ސަލާން ޖަހަން އުޅޭތާ ލައްކަ ދުވަސްވީފަހުން މީޑިޔާގެ ލޮލުގައި ވަލްސާ އަޅައިގަތެވެ. އެއީ ކެރެލާ ސްޓޭޓްގެ އޮފީހެއްގައި ވަޒީފާ އަދާކުރަމުން އަންނަ ވިދުޔާ ކިޔާ އަންހެން ކުއްޖެއްގެ ލޮލުގައި ވަލްސާ އަޅައިގަތުމާއެކު އޭނާ ފޭސްބުކްގައި ޖަހާލި ޕޯސްޓަކާއެކުގައެވެ.
ވިދުޔާ މަޑުކޮށްލައިގެން ހުރީ ޓްރިވެންޑްރަމްގެ ސެންޓްރަލް ރެއިލްވޭ ސްޓޭޝަން ކައިރީއެވެ. މުސްކުޅި އަންހެނަކު އެތާ ކައިރީ ހުރި ކުދިކުދި މޭވާ ގަސްތަތަކުން މޭވާއެއް ބިނދެވޭތޯ މަސައްކަތްކުރާތަން ވިދުޔާއަށް ފެނުނެވެ. އެ އަންހެން މީހާގެ އަތުގައި ބާޒާރު ކޮތަޅު ތަކެއްވެސް ހުއްޓެވެ. ވިދުޔާ ދިޔައީ އެ މަންޒަރުތައް އޭނާގެ މޯބައިލް ފޯނުން ފޮޓޯ ނަގަމުންނެވެ. އޭނާގެ ހަރަކާތްތައް ހުރި ގޮތުން ވިދުޔާ އޭނާއާ ކައިރިވެލާފައި "ދައްތަ ތިޔައުޅެނީ ބަންޑުހައިވެގެންދޯ" އޭ އަހާލިއެވެ. ނަމަވެސް ވަލްސާ ޗޮކެއް ކަނޑާލާފައި ބަންޑުހައިވެގެން ނޫޅޭ ކަމަށް ބުންޏެވެ. އޭރުވެސް ވިދުޔާއަކަށް އެއަންހެން މީހާއަކީ ކާކުކަމެއް ނޭނގެއެވެ.
ބަނޑުހަޔެއް ނުވެޔޭ އެ ދައްތަ ބުނުމުންވެސް ވިދުޔާ ނިންމީ އެ ދައްތައަށް ކާއެއްޗެއް ގަނެލަދޭށެވެ. އެހެންވެ ކައިރީގައި ހުރި ކާބޯތަކެތި ވިއްކާ ތަނަކުން އެ ދައްތަގެ ހައިފިލާވަރަށް ކާއެއްޗެއް ގެނެސް ދިނުމަށް ފަހު ވިދުޔާ ނިންމީ އެ ދައްތައާ ކުޑަކޮށް ވާހަކަ ދައްކާލަން މަޑުކޮށްލާށެވެ. އެ މުސްކުޅި އަންހެން މީހާއާ ވާހަކަ ދައްކާލަން ހިނދުކޮޅަކު މަޑުކޮށްލުމާއެކު އެ މީހާ ދެއްކި ވާހަކަ ތަކުން އެއީ ނުކިޔަވައިހުރި، ތަނެއްދޮރެއް ނުދަންނަ މީހެއްނޫންކަން ވިދުޔާއަށް ކަށަވަރުވިއެވެ. އަދި އެ މީހާއަކީ ކާކުކަން ވިދުޔާއަށް ކަށަވަރުވިއެވެ. އަދި މިއަދު އެ އަންހެން މީހާ އެގޮތަށް މަގުމަތި ވެގެން އުޅެން ޖެހިފައި ވަނީ އޭނާގެ ފިރިމީހާ އާއި ފިރިހެން ދަރިފުޅު ގަދަކަމުން މަގުމަތި ކޮށްލުމުންކަންވެސް ވިދުޔާއަށް އެނގުނެވެ. އަދި އެ ދައްތަގެ ފިރިމީހާ އާއި ފިރިހެން ދަރިފުޅުވެސް ޓްރިވެންޑްރަމްގެ އަވަށެއްގައި އުޅެމުންދާކަން އެ ދައްތަގެ ފަރާތުން އެނގުނެވެ. އެ ދައްތަގެ ފަރާތުން މާޒީގެ ހުރިހާ ވާހަކަތަކެއް ސާފުވުމާއެކު ވިދުޔާ ނިންމީ އެ ނިކަމެތި މީހާއަށް އެހީވާށެވެ.
ވިދުޔާ ވަގުތުން އޭނާގެ ފޯނުގައި ހުރި އެ ދައްތަގެ ފޮޓޯތަކާއެކު ފޭސްބުކް ސްޓޭޓަސް ހިންގާލިއެވެ. އަދި އެއީ ކެރެލާ ސްޓޭޓްގެ މަލައްޕުރަމްގައި ހުންނަ އިސްލާޙިއްޔާ ޕަބްލިކް ސްކޫލްގެ ހިސާބު ޓީޗަރެއްގެ ވަޒީފާގައި އުޅުނު މީހެއް ކަމާއި، މިހާރު ޓްރިވެންޑްރަމްގެ މަގުމަތީގައި ސަލާން ޖަހަން އިންނަން ޖެހިފައި ވަނީ ކީއްވެގެންކަން ސްޓޭޓަސްގައި ލިޔެލިއެވެ. އަދި އެމީހާއަށް އެހީތެރިވުމަށް އެދުނެވެ.
ވިދުޔާގެ މި ސްޓޭޓަސް ލަސްތަކެއްނުވެ އިސްލާޙިއްޔާ ސްކޫލްގެ ވެރިންނާއި ޓީޗަރުންނަށްވެސް ފެނުނެވެ. ވަލްސާއާއެކު ކިޔަވައިދޭން އުޅުނު ޓީޗަރުންނަށްވެސް ފެނުނެވެ. ވަލްސާގެ ދަރިވަރުންނަށްވެސް ފެނުމާއެކު އެއީ އެމީހުންގެ ވަލްސާ ޓީޗަރުކަން އެނގުނެވެ. އެހެންވެ ހުރިހާ މީހުން ނިންމީ ވަލްސާ މިސްއަށް އެހީތެރިވާށެވެ. އެކުގައި މަސައްކަތްކުރި ޓީޗަރުންނާއި ކުރީގެ ދަރިވަރުން ވަލްސާ ގެންދަން ބޭނުންވިއެވެ. ވަލްސާ ޓްރިވެންޑްރަމްގެ މަގުތަކަށް ގިނަވެގެން އުޅޭތަން ބަލާކަށް އެމީހުން ބޭނުމެއްނުވިއެވެ. ނަމަވެސް ވަލްސާ އެހާލުގައިވެސް ބޭނުންވީ އޭނާ އެންމެ ލޯބިވާ ދެމީހުންވެސް އޭނާ ގެންދާ ތަނަކަށް ގެންގޮސް ދިނުމަށެވެ. ނަމަވެސް ފިރިމީހާ އާއި ފިރިހެން ދަރިފުޅު އުޅޭ ތަނެއް މިހާރަކު ވަލްސާއަށް ނޭނގެއެވެ. .
ދަރިވަރުންނާއި އެކުގައި އުޅުނު ޓީޗަރުންގެ މަސައްކަތުން، ފުލުހުންގެ އެހީއާއެކު ވަލްސާ ޓީޗަރު ގެންދިޔައީ މުސްކުޅިން ބަލާ މަރުކަޒަކަށެވެ. މިހާރު ވަލްސާގެ ގެއަކީ އެއީއެވެ. އެތަނުން އޭނާއަށް އަޅާލުން ލިބެއެވެ. ނަމަވެސް އޭނާ އަދިވެސް އުންމީދު ކުރަނީ އޭނާގެ ފިރިމީހާ އާއި ފިރިހެން ދަރިފުޅުގެ ލޯތްބާއި އަޅާލުމަށެވެ. އެކަމަކު އެމީހުން ވީހިސާބެއް އެނގޭތޯ ޓްރިވެންޑްރަމްގެ ފުލުހުން އަތްފުނާ އަޅަމުންދާއިރުވެސް އެމީހުންގެ ހިލަމެއް އަދި ނުވެއެވެ. ވަލްސާ ބުނަނީ ޓްރިވެންޑްރަމްގައި އެ ދެމީހުންވެސް އެބައުޅޭ ކަމަށެވެ. ނޭނގެނީ ސީދާ އުޅޭ ތަނެކެވެ. ފުލުހުން އެބަ އެދެމީހުން ހޯދުމުގެ މަސައްކަތް ކުރެއެވެ.
މުސްކުޅިން ބަލަހައްޓާ މަރުކަޒުން ދަނީ ވަލްސާއަށް ޚާއްސަ ސަމާލުކަމެއް ދީގެން އޭނާއަށް އަޅާލަމުންނެވެ. އޭނާއަކީ އިންޑިޔާގެ ތައުލީމީ ދާއިރާގައި ގަދަރުވެރި، ކާމިޔާބު ދަރިވަރުންތަކެއްގެ މަންމައަކަށް ވުމާވެސް އެކުގައެވެ. އެހެންވެ ވަލްސާ ޓީޗަރަށްވެސް މިހާރު ވަނީ ކޮންމެވެސް ވަރެއްގެ ހިތްހަމަޖެހުން ތަކެއް ލިބިފައެވެ.
ޓްރިވެންޑްރަމްއަކީ ގިނަ އަދަދެއްގެ ދިވެހިން ދިރިއުޅޭ، އަދި ބޭސްފަރުވާއަށް ގޮސްއުޅޭ އަވަށެއް ކަމުން ދިވެހިންނަށްވެސް ވަލްސާ ޓީޗަރު މަގުމަތީގައި ސަލާން ޖަހަން އިންދައި ފެނިފައި ހުރެދާނެއެވެ. އެހާވަރަށް ޓްރިވެންޑްރަމްއަށް ދިވެހިން ގޮސް އުޅޭއިރުވެސް އަޅެ، މި ދައްތަގެ ވާހަކަ އަޑު އެހިން އެހިން ހެއްޔެވެ؟
