ގދ. ތިނަދޫގައި އެމްޑީޕީގެ ސަޕޯޓަރުންނާއި ޕީޕީއެމްގެ ސަޕޯޓަރުން އަރައިރުންވެ، ތަޅައިގެންފިއެވެ.
ތިނަދޫން މައުލޫމާތު ދިންގޮތުގައި ދެޕާޓީގެ މެމްބަރުންގެ އަރައިރުން ގަނޑު ހޫނުވެ ތަޅައިގަތުމުގެ ސަބަބުން ބަޔެއް މީހުންނަށް ހާނީއްކަވެސް ވެފައިވެއެވެ. ހަމަނުޖެހުން ހިނގީ ޕީޕީއެމްގެ އިސްބޭފުޅުންތަކެއް ތިނަދޫއަށް ވަޑައިގަތުމާ ދިމާކޮށް އިދިކޮޅު ސަޕޯޓަރުން ގޮސް އަތިރިމަތީގައި ދެމި ބެނާއެއްގެ މައްސަލަ ހޫނުވެގެންނެވެ. "ވަގުންނަށް މަރުޙަބާ" މިހެން ޖަހާފައިވާ ބެނާއެއް އެމްޑީޕީގެ ސަޕޯޓަރުން ދެމުމުން އެ ބެނާ ނެގުމަށް ޕީޕީއެމްގެ ސަޕޯޓަރުން ކުރި މަސައްކަތުގައި ދެބައިމީހުން އަރައިރުންވެ ތަޅާފޮޅުން ގަނޑަކަށް ދިޔައީއެވެ.
މި ހަމަނުޖެހުން ހުއްޓުވީ ފުލުހުން އެތަނަށް ވަދެއެވެ. އަދި އެތަނުން މާރާމާރީ ހިންގުމުގައި އިސްކޮށް އުޅުނު ދެމީހަކު ފުލުހުންގެ ބެލުމުގެ ދަށަށް ވަނީ ގެންގޮސްފައެވެ. ނަމަވެސް އެއީ ކޮންޕާޓީއެއްގެ ދެމީހުން ކަމެއް ސާފެއް ނުވެއެވެ.
ސަރުކާރުގެ އިސްބޭފުޅުންގެ ޓީމެއް ތިނަދޫއަށް ވަޑައިގަންނަވާއިރު މާދަމާރޭ އިދިކޮޅު ޕާޓީ ތަކުން ދަނީ ތިނަދޫގައި ބޮޑު ޖަލްސާއެއް ބާއްވަންވެސް ތައްޔާރު ވަމުންނެވެ.
