ސަރުކާރުން ހުޅުމާލޭގައި ފެށި "ހިޔާ" މަޝްރޫއަކީ ކުރިޔަށް އޮތް ރިޔާސީ އިންތިޚާބާ ދިމާކޮށް ކުރާ "ހުސް ވައުދެއް" ކަމަށް އެމްޑީޕީ ސަރުކާރުގެ ހައުސިންގ މިނިސްޓަރ މުޙަންމަދު އަސްލަމް ވިދާޅުވެއްޖެއެވެ.
އެމްޑީޕީ އޮފީހުގައި މިއަދު އޮތް ނޫސްވެރިންގެ ބައްދަލުވުމެއްގައި އަސްލަމް ވިދާޅުވީ ރައީސް ޔާމީންގެ ވެރިކަމަށް ހަތަރު އަހަރު ވެގެން ދިޔައިރު ސަރުކާރަށް ނިންމާލެވުނީ އެމްޑީޕީގެ ވެރިކަމުގައި ބިންގާ އެޅި ޓާޓާ ފްލެޓް ތަކާއި ހުޅުމާލޭގައި އެޅި ފްލެޓްތައް އެކަނި ކަމަށާއި އެހެންވެ ވެރިކަމުގެ ބާކީ އޮތް އަހަރެއްހާ ދުވަހު 80،000 މީހުންނަށް ބޭނުންވާ ވަރަށް މި ސަރުކާރަށް ފްލެޓް އެޅޭނެ ކަމަށް ގަބޫލު ނުކުރެވޭނެ ކަމަށެވެ.
" އަޅުގަނޑަށް ޔަގީންކަން އެބައޮތް އަންނަ އަހަރު މި ޓަވަރުތައް އަޅާ ބިން ހުސް ކުރާނެކަން، އަދި މީހުންނަށް ލިޔުންތައް ވެސް ދޭނެ، ނަމަވެސް އެ އޮންނާނީ އެވަރަށް ހުއްޓިފައި،" އަސްލަމް ވިދާޅުވިއެވެ.
އަސްލަމް ވިދާޅުވީ އެކަން އެހެން ސަރުކާރުން ކުރި ނަމަވެސް އެއީ އިންތިޚާބަށް ދައްކާ "ހުވަފެނެއް ކަމަށެވެ. އަސްލަމް ވަނީ ހުޅުމާލޭގައި އަޅަން ސަރުކާރުން ނިންމި ޓަވަރުތައް ސަރުކާރު ޙިއްސާވާ ކުންފުނިތަކާ ހަވާލުކުރުމުން އެކަމާމެދުވެސް ކަންބޮޑުވުން ފާޅުކުރައްވާފައެވެ. އެގޮތުން އެކުންފުނި ތަކަކީ ރައްޔިތުންގެ އަސާސީ ޚިދުމަތްތަކެއް ފޯރުކޮށްދޭ ކުންފުނި ތަކެއް ކަމުން ފްލެޓް އެޅުންފަދަ ބޮޑުކަމެއް ހަވާލު ކުރުމުން އެ ޚިދުމަތްތަކަށްވެސް އޭގެ ނޭދެވޭ އަސަރު ކުރާނެ ކަމަށް ކުރީގެ ހައުސިންގ މިނިސްޓަރު ވިދާޅުވިއެވެ.
"އެއްވެސް ކުންފުންޏަކީ ހުރިހާ ކަމެއް އެތަނަކުން ކުރެވޭނެ ތަނެއް ނޫން، އެހެންވެ ބަހާލެވިފައި އެކި މީހުންނަށް އެކި ކަންކަން ހަވާލު ކުރެވިފައި މި ހުންނަނީވެސް، ސަރުކާރުގެ އޮވޭ ބޯހިޔާވެހިކަން ފޯރުކޮށްދިނުމަށް އުފައްދާފައިވާ ކުންފުންޏެއް، އެއީ ހުޅުމާލޭ ޑިވޮލޮޕްމަންޓް ކޯޕަރޭޝަނ" އަސްލަމް ވިދާޅުވި އެވެ.
ސަރުކާރުގެ ބޯހިޔާވަހި ކަމުގެ ބޮޑު މަޝްރޫއަކީ އިންތިޚާބީ ހުސް ވައުދެއް ކަމަށް އެމްޑީޕީން ބުނިނަމަވެސް ރައީސް އަބްދުﷲ ޔާމީން އެ މަޝްރޫއު ފައްޓަވައި ދެއްވި ޖަލްސާގައި ވިދާޅުވީ އެ ޓަވަރު ތަކުގެ ތެރެއިން ބަޔެއް ޓަވަރުތަކުގައި އަންނަ އަހަރު މީހުން ދިރިއުޅެން ފަށާނެ ކަމަށާއި އަދި ކުރިޔަށް އޮތް ދެ އަހަރު ދުވަހުގެ ތެރޭގައި މުޅި މަޝްރޫއު ނިންމާލެވޭނެ ކަމަށެވެ.
