މިދިޔަ ހަތަރު އަހަރު ރާއްޖޭގެ ތަރައްގީއަށް ސަރުކާރުން ކޮށްދީފައިވާ ކަންތައްތަކާއި އަންނަ އަހަރު ތަރައްގީއަށް ސަރުކާރުން ކޮށްދޭން ބަޖެޓު ކޮށްފައިވާ ކަންކަން އިދިކޮޅު ސިޔާސީ ލީޑަރުންނަށް "ހަޖަމް ނުވާނަމަ" ސަރުކާރުން މަޖިލީހަށް ހުށަހަޅާފައިވާ އަންނަ އަހަރަށް ލަފާކުރާ ދައުލަތުގެ ބަޖެޓުގައިވާ އަދަދުތައް "ޖުއްލާބަކާއެކު ދިރުވާލެއްވުމަށް" އިދިކޮޅު ސިޔާސީ ލީޑަރުންނަށް ރައީސް ގޮވާލައްވައިފިއެވެ.
ސަރުކާރަށް ހަތަރު އަހަރު ފާހަގަ ކުރުމަށް މިރޭ ކާނިވާ ސަރަހައްދުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ އިދިކޮޅު ސިޔާސީ ލީޑަރުންނަށް، ޚާއްސަކޮށް ކުރިން ވެރިކަން ކުރެއްވި ބަޔެއް ބޭފުޅުންނަށް ތަރައްގީ "ހަޖަމް ނުވާ" ކަމަށާއި އަދި ތަރައްގީގެ "ވަސް ނުދުވާ" ކަމަށެވެ. ނަމަވެސް ވެރިކަން ކުރެއްވި ބަޔެއް ބޭފުޅުންނަށް ތަރައްގީގެ ވަސް މިހާރު ދުވަންޖެހޭނެ ކަމަށް ރައީސް ވިދާޅުވިއެވެ.
ސަރުކާރުން މިދިޔަ ހަތަރު އަހަރު ދުވަހުގެ ތެރޭގައި ރާއްޖޭގައި ހިންގާފައިވާ ތަރައްގީގެ މަޝްރޫއު ތަކުގެ ތަފާސް ހިސާބު ވިދާޅުވެ ދެއްވި ޖަލްސާގައި ރައީސް ވިދާޅުވީ އެމަނިކުފާނަކީ ޚުދުމުޚްތާރު ވެރިޔެއް ކަމަށް އިދިކޮޅު ފަރާތްތަކުން ސިފަ ކުރަމުން ދަނީ މުޒާހަރާ ނުކުރެވޭތީ ކަމަށާއި އަދި މުޒާހަރާއަށް 5000 މީހުންވެސް ނުނުކުންނާތީ ކަމަށެވެ. އަދި ޚުދުމުޚްތާރު ވެރިޔަކަށް އެމަނިކުފާނު ވެފައި ވަނީ ޝަރުއީ ދާއިރާއިން ކުރާ ޙުކުމްތައް ތަންފީޒު ކުރެއްވުމުގައި ވަކި މީހަކަށް ނުބަލައި މިސަރުކާރުން ތަންފީޒު ކުރަމުން އަންނާތީ ކަމަށެވެ.
ރައީސް ވިދާޅުވީ އިދިކޮޅު ފަރާތްތަކުން ބާއްވާ މުޒާހަރާ ތަކަށް ފަސް ހާހެއްހާ މީހުންވެސް މިހާރު ނުނުކުންނަ ސަބަބަކީ ތަރައްގީގެ ރަހަ އެއިން ކޮންމެ މީހަކަށްވެސް މިދިޔަ ހަތަރު އަހަރު ދުވަހުގެ ތެރޭގައި ކޮށްފައިވުން ކަމަށެވެ. މިދިޔަ ހަތަރު އަހަރު ދުވަހުގެ ތެރޭގައި 1000 ތަރައްގީގެ މަޝްރޫއު ހިންގިންޖެ ކަމަށްވެސް ރައީސް ވިދާޅުވިއެވެ.
