ކުރިޔަށް އޮތް ރިޔާސީ އިންތިޚާބުގައި އިދިކޮޅު ހުރިހާ ފަރާތަކުން އެއް ކެންޑިޑޭޓު ނެރޭނަމަ އެބޭފުޅަކަށް ވާންޖެހޭނީ ޖުމްހޫރީ ޕާޓީގެ ލީޑަރު ގާސިމް އިބްރާހިމް ކަމަށް ޖުމްހޫރީ ޕާޓީގެ ނައިބު ރައީސް އަމީން އިބްރާހިމް އާއި ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
ވީޓީވީގެ ޕްރޮގްރާމެއްގައި ވާހަކަ ދައްކަވަމުން ލަންޑަނުގައި ހުންނެވި އަމީން ވިދާޅުވީ އިދިކޮޅުން އެއްކެންޑިޑޭޓް ނެރޭނަމަ ވިސްނަންޖެހޭ ކަންތައްތައް ވަރަށްގިނަ ކަމަށާއި އެބޭފުޅަކު ވާންޖެހޭނީ އަންނަ ޕްރެޝަރުތަކާވެސް ކުރިމަތިލެވޭނެ ފަދަ ބޭފުޅަކަށް ކަމަށެވެ. އެގޮތުން އިދިކޮޅު ކޯލިޝަންގެ ފުރަތަމަ ޗޮއިސް ކަމަށްވާން ޖެހޭނީ ޖޭޕީގެ ލީޑަރު ގާސިމް ކަމަށެވެ.
އަމީން ވިދާޅުވީ ގާސިމް ފިޔަވައިވެސް ކޯލިޝަނުގައި ތިއްބެވި އަނެއް ހަތަރު ލީޑަރުން ކަމަށްވާ ކުރީގެ ރައީސް މުޙަންމަދު ނަޝީދު އާއި ކުރީގެ ރައީސް މައުމޫން އަބްދުލްގަތްޔޫމް އާއި އަދާލަތު ޕާޓީގެ ރައީސް ޝައިޚް އިމްރާން އަބްދުﷲ އަކީވެސް މޮޅު "ފޯވަޑުން" ތަކެކެވެ.
"މިތިބީ ހަމަ ހުސް ފޯވާޑުން، ފުޓުބޯޅަ ދަނޑަކަށް ބަލާއިރު ދުނިޔޭގެ އެންމެ މަޝްހޫރު ފޯވާޑުން، ނޭމާއާއި ރޮނާލްޑޯއާއި މެސީއާއި ސްވަރޭޒް ފަދަ ފޯވާޑުން މިސާލަކަށް، މިހަތަރު ކުޅުންތެރިން އެއްޓީމަކަށް ލައިގެން ކުޅެމުންދާއިރުވެސް އިދިކޮޅު ޓީމު ބަލިކުރުން އެއީ ޕްރައިމަރީ އޮބްޖެކްޓިވްއަކީ، މިއިން ކޮންމެ ބޭފުޅަކީވެސް ވަރަށް ހުނަރުވެރި ކުޅުންތެރިއެއް" ވީޓީވީގައި ވާހަކަ ދައްކަވަމުން އަމީން ވިދާޅުވިއެވެ.
އަމީންގެ އިތުރުން ރައީސް ޑރ މުޙަންމަދު ވަޙީދު ހަސަންގެ ދައުރާއި ރައީސް ޔާމީންގެ ފުރަތަމަ ހޯމް މިނިސްޓަރު އުމަރު ނަސީރުވެސް ވަނީ އިދިކޮޅުން އެއްކެންޑިޑޭޓް ނެރޭނަމަ ގާސިމް ނެރުމަށް ތާއީދު ކުރައްވާފައެވެ.
އުމަރު ވިދާޅުވީ މިވަގުތު ގައުމު އޮތް ޙާލަތުން ގައުމަށް ހަމަޖެހުން ގެނެވޭނެ ލީޑަރަކަށް އިއްތިހާދުގައި ހުންނެވި އެންމެ ރަނގަޅު ބޭފުޅަކީ ގާސިމް ކަމަށެވެ. އިދިކޮޅުގައި ތިއްބެވި ހަތަރު ލީޑަރުންގެ ތެރެއިން ގާސިމް އިއިއްތިހާދުގެ ކެންޑިޑޭޓަކަށް ގެންނަންޖެހޭ ސަބަބެއް ކަމަށް އުމަރު ވިދާޅުވެފައި ވަނީ ކުރީގެ ރައީސް މުޙަންމަދު ނަޝީދަކީ ރައީސް ކަމުން އަމިއްލަފުޅަށް އިސްތިއުފާ ދެއްވި ބޭފުޅަކަށް ވުމާއި، ކުރީގެ ރައީސް މައުމޫން އަބްދުލްގަތްޔޫމްއަކީ ވެރިކަން ކުރެއްވުމުގެ ޝައުގުވެރިކަން މިހާރު ހުންނެވި ބޭފުޅަކަށް ނުވުމާއި، ޝައިޚް އިމްރާން އަބްދުﷲގެ ރައީސް ކަމުގައި އޮތް އަދާލަތު ޕާޓީއަކީ ރިޔާސީ އިންތިޚާބަށް ކެންޑިޑޭޓަކު ނެރޭ ޕާޓީއަކަށް ނުވުމެވެ.
ސަބަބެއް ކަމަށް އުމަރު ވިދާޅުވީ އެމްޑީޕީން ނެރޭ ކެންޑިޑޭޓް ކުރީގެ ރައީސް މުހައްމަދު ނަޝީދަކީ އަމިއްލަފުޅަށް އިސްތިއުފާ ދެއްވި ބޭފުޅަކަށްވުމާއި އަދާލަތު ޕާޓީއަކީ ރިޔާސީ އިންތިޚާބަށް ކެންޑިޑޭޓުން ނެރޭ ޕާޓީއަކަށް ނުވުމެވެ. އަދި ކުރީގެ ރައީސް މައުމޫނަކީ ވެރިކަން ކުރެއްވުމުގެ ޝައުގުވެރިކަން މިހާރު ހުރި ބޭފުޅެއް ނޫނެވެ.
"މިއަދުގެ ހާލަތުގައި، އިދިކޮޅު ފަރާތްތަކާއި އިދިކޮޅަށް ތާއީދު ނުކުރާ ނަމަވެސް ސަރުކާރާ މެދު ހިތްހަމަނުޖެހިފައި ތިބި އެންމެންނާއި ދައުލަތުގެ ބާރުތަކާއި މި އެންމެން އެއްކޮށް އެއްވެސް ތަފާތު ކުރުމެއް ނެތި މުޅި ގައުމު މަސަލަސް ކުރެވޭނެ ހަމައެކަނި އިއްތިހާދީ ލީޑަރަކީ އޮނަރަބްލް ގާސިމް އިބްރާހީމް،" މި ސަރުކާރުގެ ކުރީގެ ހޯމް މިނިސްޓަރު އުމަރު ވިދާޅުވި އެވެ.
އެއް ކެންޑިޑޭޓަކު ނެރުމަށް އިދިކޮޅު ހުރިހާ ޕާޓީތަކެެއްގެ މެދުގައި ޕްރައިމަރީއެއް ބާއްވަން އެމްޑީޕީން ނިންމިޔަސް އެއީ ކާމިޔާބު ވާނެ ފޯމިއުލާއެއް ނޫން ކަމަށް އުމަރު ވިދާޅުވި އެވެ. މިނިވަން އިންސާފުވެރި ޕްރައިމަރީއެއް އެއްވެސް ޕާޓީއަކަށް މިހާތަނަށް ބޭއްވިފައި ނެތް ކަމަށާއި އެހެންވެ ހުރިހާ ޕާޓީއެއްގެ މެދުގައި ޕްރައިމަރީއެއް ބާއްވައިފި ނަމަ ވޯޓު އޮޅުވާލުމުގެ ފުރުސަތު އޮންނާނެ ކަމަށް އުމަރު ވިދާޅުވި އެވެ.
އިއްތިހާދުން ކެންޑިޑޭޓަކު ނެރޭނީ އިއްތިހާދުގެ ތެރޭގައި ޕްރައިމަރީއެއް ބާއްވައިގެން އެންމެކުރި ހޯއްދަވާ ބޭފުޅެއް ކަމަށް އެމްޑީޕީން ފާސްކޮށްފައިވާ ނިންމުމާމެދު އުމަރު ވަނީ ޚިޔާލު ތަފާތުވެފައެވެ. އުމަރު ވިދާޅުވީ އެފަދަ ޕްރައިމަރީއެއް ބޭއްވުމަކީ ވޯޓު އޮޅުވާލައި މަކަރު ހެދެނޭނެ ކަމެއް ކަމަށާއި އެފަދަ ޕްރައިމަރީއެއް ބާއްވައިފިނަމަ އިއްތިހާދުގެ ތެރޭގައި މަސްލަޙަތު ގެއްލި ބައިބައިވުން އުފެދޭނެ ކަމަށެވެ.
ކުރިޔަށް އޮތް އިންތިޚާބުގައި އިއްތިހާދުން އެއްކެންޑިޑޭޓަކު ނެރުމާއި ބެހޭގޮތުން އެމްޑީޕީ އާއި އަދާލަތުން ވަނީ އެކަމަށް އެއްބަސްވެފައެވެ. ނަމަވެސް ޖޭޕީ އާއި ކުރީގެ ރައީސް މައުމޫން އަދި ރަސްމީކޮށް ވަކިގޮތެއް ނުނިންމަފައެވެ. އެމްޑީޕީ އާއި އަދާލަތުންވެސް ވަކި ކެންޑިޑޭޓަކު ނެރޭކަށް ނުނިންމައެވެ. ނަމަވެސް އެމްޑީޕީން ވަކީ އުސޫލުތަކެއް އެޕާޓީގެ އެތެރޭގައި ނިންމާފައެވެ.
