އަފްޣާނިސްތާނަށް އިންސާނީ އެހީގެ ގޮތުގައި ދިނުމަށް 850 މިލިއަން އެމެރިކާ ޑޮަލަރު ހޯދަން މެންބަރު ގައުމުތަކަށް އެކުވެރި ދައުލަތްތަކުގެ ޖަމްއިއްޔާ (އދ.) އިން އިލްތިމާސްކޮށްފިއެވެ. އެގައުމުގައި ޠާލިބާނުންނާ ސަރުކާރާ ދެމެދު ވަރުގަދަ ހަމަލާތަކެއް ބަދަލުކުރެވެމުންދާއިރު، ގައުމުގެ ގާތްގަނޑަކަށް ތިންބައިކުޅަ އެއްބައި މީހުން ތިބީ ކާބޯތަކެއްޗަށް ޖެހިފައިއެވެ. އަދި ގައުމު ހަނަފަސްކަމާ ކުރިމަތިލަމުންދާއިރު، މިއަހަރު ތެރޭގައި 6 ލައްކައަށްވުރެ ގިނަ ރެފިއުޖީން ވަނީ ގައުމަށް އެނބުރި އައިސްފައެވެ.
އދ.ގެ މައި މަރުކަޒުގައި ތިބި ނޫސްވެރިންނަށް ކާބުލްއިން އޮންލައިންކޮށް މައުލޫމާތުދެއްވަމުން އަފްޣާނިސްތާނުގައި ހުންނަވާ އދ.ގެ ރެސިޑެންޓް އަދި ހިއުމަނިޓޭރިއަން ކޯޑިނޭޓަރ ޑރ. ރަމީޒް އަކްބަރޯވް ވިދާޅުވި ގޮތުގައި އަފްޣާނިސްތާނުގެ 18 މިލިއަން މީހުން ތިބީ އެހީއަށް ބޭނުންވެފައެވެ. އަދި އދ.ން ގަސްތުކުރަނީ އޭގެތެރޭން މަދުވެގެން 15.7 މިލިއަން މީހުންނަށް އެހީވުމަށެވެ.
އޭނާ ވިދާޅުވިގޮތުގައި އަފްޣާނިސްތާނަށް އެހީވުމަށް އދ.ން 1.3 ބިލިއަން އެމެރިކާ ޑޮލަރަށް އެދި ގޮވާލުމުން މިހާތަަަަަނަށް ލިބިފައި ވަނީ 450 މިލިއަން ޑޮަލަރެވެ. އަދި އިތުރަށް ބޭނުންވާ 850 މިލިއަން ޑޮލަރު ވަރަށް އަަވަހަށް ބޭނުންވެއެވެ.
އަފްޣާނިސްތާނުގައި 20 އަހަރު ދުވަހު އެމެރިކާއާއި، ނޭޓޯ (ނޯތު އެޓްލާންޓިކް ޓްރީޓީ އޮގަނައިޒޭޝަން) ގެ ސިފައިން އަފްޣާނިސްތާނު ފޭބުން ނިމުމަކަށް އަންނައިރު، ޠާލިބާން ޖަމާއަތުން ދަނީ އަފްޣާނިސްތާނުގެ ގިނަ ޑިސްޓްރިކްޓްތަކެއް ހިފައި، އީރާން، ޕާކިސްތާން، އުޒްބަކިސްތާން އަދި ތަޖިސްތާނާ އެގަމުގު ގުޅޭ ސަރަހައްދީ ރޮނގުގެ ގިނަ ބޯޑާ ޕޯސްތަކެއް އެމީހުން ބާރުގެ ދަަށަށް ގެންނަމުންނެވެ.
އަކްބަރޯވް ވިދާޅުވިގޮތުގައި 3 އަހަރުގެ ތެރޭގައި ކުރިމަތިވި ދެވަނަ ހަނަފަސްކަމާއި، ޠާލިބާން ޖަމާއަތުން ދެމުންދާ ހަމަލާތަކުގެ ސަބަބުން ރަށްފުށުގައި ދިރިއުޅޭ 2 ލައްކަ 70 ހާސް މީހުން ވަނީ ގެދޮރު ދޫކޮށް ބޮޑެތި ރަށްތަކަށް ހިޖުރަކޮށްފައެވެ. އެމީހުންނަށް ބޯހިޔާވަހިކަމާއި، ކާބޯތަކެއްޗާއި، ފެން ބޭނުންވެއެވެ.
އަވަށްޓެރި ގައުމުތަކުގައި ދިރިއުޅެމުން އައި އަފްޣާނިސްތާނުގެ 6 ލައްކަ 20 ހާސް ރެފިއުޖީން އެނބުރި ގައުމަށް އައިސްފައިވާކަމަށް އދ.ން ބުނެއެވެ. އޭގެ ތެރޭގައި ގިނައީ އީރާނުން ބޭރުކޮށްލި ރެފިއުޖީންނެވެ.
އަފްޣާނިސްތާނުގައި އިންސާނީ އެހީގެ މަސައްކަތް ކުރިއަށް ގެންދިއުމަށް ކުރިމަތިވާ އެންމެ ބޮޑު ހުރަހަކީ އިންސާނީ އެހީ ދިނުމުގައ ހަރަކާތްތެރިވާ މީހުން މެރުމެވެ. އަކްބަރޯވް ވިދާޅުވިގޮތުގައި ފާއިތުވި އެއް އަހަރުގެ ތެރޭގައި އިންސާނީ އެހީދޭ މީހުންގެ 35 މީހުން މަރާލައި، 63 މީހުން ޒަޚަމްކޮށްލާފައި ވެއެެވެ. މިއީ އޭގެ ކުރީ އަހަރާ އަޅާބަލާއިރު %30 ގެ އިތުރުވުމެކެވެ.
އެހީދޭ މީހުންނަށް ހަމަލާދިނުން އިތުރުވަމުން ދާއިރު، ހަނގުރާމައިގެ ތެރޭގައި ތާށިވުމާއި، މައިން ފަދަ ތަކެތީގެ ނުރައްކާވެސް ދަނީ އިތުރުވަމުންނެވެ. އަދި ކާބުލް އެއާޕޯޓުގެ ރައްކާތެރިކަން ކުޑަވުމުކީވެސް އެހީފޯރުކޮށް ދިނުމަށް ކުރިމަތިވާ ދައްޗެކެވެ.
