އަންނަ އަހަރުން ފެށިގެން ސިވިލް ސާވިސް މުއައްޒަފުންގެ މުސާރަ ބޮޑުކުރުމަށް 234 މިލިއަން ރުފިޔާގެ އަދަދެއް އަންނަ އަހަރަށް ލަފާކުރާ ދައުލަތުގެ ބަޖެޓުގައި ހިމަނައިފިއެވެ.
ފިނޭންސް މިނިސްޓްރީން މިއަދު ރައްޔިތުންގެ މަޖިލީހަށް ހުށަހެޅި ބަޖެޓް އިއްވައި ދެއްވަމުން މިނިސްޓަރު އަޙްމަދު މުނައްވަރު ވިދާޅުވީ ސިވިލްސާވިސް މުއައްޒަފުންގެ މުސާރަ އަންނަ އަހަރު ބޮޑުވުމުގެ އިތުރުން ސިވިލް ސާވަންޓުންނަށް އަންނަ އަހަރު 1000 ފްލެޓްވެސް ހަމަޖެހިގެންދާނެ ކަމަށެވެ.
ސިވިލްސާވިސް މުއައްޒަފުންގެ މުސާރަ ބޮޑުކުރުމަށް ސިވިލްސާވިސް ކޮމިޝަނުންވެސް ބާރުއަޅާއިރު މުއައްޒަފުންވެސް އަންނަނީ މުސާރަ ކުޑަވުމުގެ ޝަކުވާ ކުރަމުންނެވެ. ސިވިލްސާވިސްގެ މުއައްޒަފުންގެ މުސާރަ ބޮޑުކޮށްދޭނެ ކަމަށް ސަރުކާރުން ކުރިންވެސް އޮތީ ބުނެފައެވެ.
