ކުޅުދުށްފުށީގައި އެއާޕޯޓެއް އެޅުމަށްޓަކައި އެއާޕޯޓް އަޅަން ބޭނުންވާ ސަރަހައްދު ހިއްކަން ރަސްމީކޮށް ސަރުކާރުން ފެށި ނަމަވެސް އެއީ ސަރުކާރުން ދައްކާ "ދަޅަ" ކަމަށާއި އެރަށުގައި ސަރުކާރުން އެއާޕޯޓެއް ނާޅާނެ ކަމަށް އިދިކޮޅު އެމްޑީޕީން ބުނެފިއެވެ.
ކުޅުދުށްފުށީގައި އެއާޕޯޓް އަޅަން ބިން ހިއްކުން ފެއްޓުމާއި ގުޅިގެން އެމްޑީޕީން ނެރުނު ބަޔާނެއްގައި ބުނީ ސަރުކާރުން ވައުދު ވެފައި ކުރިން އޮތީ ފުރަތަމަ ދެ އަހަރުގެ ތެރޭގައި އެރަށުގައި އެއާޕޯޓް އަޅައިދޭން ކަމަށާއި އެއީ ރައީސް ޔާމީންގެ ކެމްޕޭން ވައުދެއް ކަމަށެވެ. ނަމަވެސް ރައީސް ޔާމީންގެ ސަރުކާރަށް ހަތަރު އަހަރު ވެގެންދިޔައިރުވެސް އެރަށުގައި އެއާޕޯޓް ނާޅާކަމަށް އެމްޑީޕީން ބުނެފައިވެއެވެ.
އެމްޑީޕީން ބުނީ ރައީސް ޔާމީންގެ ސަރުކާރުން އެރަށުގައި އެއާޕޯޓް އަޅަން ފެށުމުގެ މަގްސޮދަކީ ކުރިޔަށް އޮތް ރިޔާސީ އިންތިޚާބާ ދިމާކޮށް، އެ މަންޒަރު ކުޅުދުށްފުށީ ރައްޔިތުންނަށް ދެއްކުމެވެ. އެމްޑީޕީން ބުނީ އެއީ ސަރުކާރުން ކުޅުދުށްފުށީ ރައްޔިތުންގެ ލޮލުގައި އެޅުވި "އަނދުނެއް" ކަމަށެވެ.
އެމްޑީޕީން ބުނީ ކުޅުދުށްފުށީ ތަރައްގީގެ ތަސައްވުރެއް އެމްޑީޕީގައިވެސް އެބައޮތް ކަމަށެވެ. އަދި އެމްޑީޕީގެ ޕްލޭން ކުރިޔަށްދާނީ އެރަށުގެ ރައްޔިތުންގެ ބަސް ހޯދައިގެން ކަމަށެވެ.
ކުޅުދުށްފުށީގައި އެއާޕޯޓެއް ނާޅާނެ ކަމަށް އެމްޑީޕީން ބުނިއިރު އެރަށުގައި ރޭ އޮތް ރަސްމިއްޔާތުގައި ރައީސް ވިދާޅުވީ އެރަށުގައި ހަދާ އެއާޕޯޓުގައި އަންނަ އަހަރުގެ އޮގަސްޓް މަހުގެ ތެރޭގައި ބޯޓުތައް ޖައްސަން ފަށާނެ ކަމަށެވެ.
