ބޭރު ތޮށިގަނޑުގައި ނަޖިސް އުނގުޅި ހަޑިވެފައިވާ ކުކުޅު ބިސް ވިއްކުން ހެލްތް މިނިސްޓްރީން މަނާކޮށްފިއެވެ.
ހެލްތް މިނިސްޓްރީން މިއަދު ކުރި އިއުލާނެއްގައި ބުނެފައި ވަނީ ބިހުގެ ބޭރު ތޮށިގަނޑުގައި ނަޖިހާއި އެނޫންވެސް ހަޑި އުނގުޅިފައި ހުންނަ ކުކުޅު ބިސް ރާއްޖެ އެތެރެކޮށް ވިއްކަން ޖެހޭނީ ބަންދު ކޮށްފައި ހުންނަ ކާބޯތަކެތި ލޭބަލް ކުރުމުގެ މިންގަނޑާ އެއްގޮތަށް ކަމަށެވެ.
މިނިސްޓްރީން ބުނެފައި ވަނީ ޕްރޮސަސް ނުވަތަ ޓްރީޓްނުކޮށް ތާޒާ ކުކުޅުބިސް އޭގެ އަސްލު ނުގެއްލޭ ގޮތަށް ފިނިކޮށް 5 ޑިގްރީ ސެލްސިއަސް އަށް ވުރެ ދަށުގައި ރައްކާކުރެވޭ މުއްދަތަކީ 3 ހަފްތާ އާއި 5 ހަފްތާއާ ދެމެދު ކަމަށެވެ. އަދި އެއަށް ވުރެ ދިގު މުއްދަތަށް ފެންވަރަށް ބަދަލެއް ނާންނަ ގޮތަށް ބެހެއްޓޭނީ އިތުރު ޓްރީޓްމެންޓެއް ދީގެން ކަމަށް ވެސް ބުނެފައިވެއެވެ. ނަމަވެސް ދިގު މުއްދަތު ޖަހައިގެން ޓްރީޓްމެންޓް ނުދީ ފިނިނުކޮށް ހުންނަ ކުކުޅުބިސް ރާއްޖޭގައި ވިއްކަމުންދާ ކަމަށް ވެސް ހެލްތުން ވަނީ ބުނެފައެވެ.
މިނިސްޓްރީން ބުނީ ރާއްޖެ އެތެރެކުރާ ކުކުޅު ބިހުގެ ބޭރު ތޮށިގަނޑުގައި ނަޖިސް ފަދަތަކެތި ތަތްލާފައި ހުންނަކަން ފާހަގަ ކުރެވޭ ކަމަށާއި އޭގެސަބަބުން އާންމުންގެ ސިއްޙަތަށް ނުރައްކާވުމުގެ ފުރުޞަތު އެބައޮތް ކަމަށެވެ. ވީމާ އަންނަ އަހަރުގެ ޖެނުއަރީ މަހުގެ 15 ވަނަ ދުވަހުން ފެށިގެން ރާއްޖެއަށް އެތެރެކުރާ ކުކުޅު ބިހުގެ މުއްދަތު ހަމަވާ ތާރީޚް 5 ހަފްތާއަށް ވުރެ ދިގު ނަމަ، ދުވަސް ހަމަވާ މުއްދަތު ދިގު ކުރުމަށް ޓަކައި ކޮށްފައިވާ ކަމެއް ބަޔާންކުރާ، އެ ގައުމެއްގެ ފުޑް ސޭފްޓީ އޮތޯރިޓީގެ ލިޔުމެއް ހުށަހަޅަންޖެހޭނެ ކަމަށް ހެލްތު މިނިސްޓްރީން ވަނީ ބުނެފައެވެ.
މިނިސްޓްރީން ބުނީ ކުރިންވެސް އޮތް އުސޫލާއެއްގޮތަށް ރާއްޖެއަށް އެތެރެކުރާ ބިހާއި ބިހުގެ ބާވަތްތަކަށް ހެލްތު ކްލިއަރެންސް ދޫކުރާނީ ސެޓްފިކެޓް އޮފް އޮރިޖިންގެ އިތުރުން ހެލްތު ސެޓްފިކްޓް ވެސް ހުށަހެޅުމުން ނެވެ.
