1988 ވަނަ އަހަރުގެ ނޮވެމްބަރު މަހުގެ ތިނެއްގައި ރާއްޖެއަށް ދިން އުދުވާނީ ހަމަލާގެ އެންމެ އިސްވެރިކަމަށް ހުރި ހ. ހާޖަރާގޭ، އަބްދުﷲ ލުތުފީ ސްރީލަންކާގައި ހުންނަ އެމްޑީޕީގެ ޖަގަހައަށް ގޮސް އުޅޭކަމަށް ޕީޕީއެމުން ތުހުމަތު ކޮށްފިއެވެ.
"އަސްތާ" ގެ ނަމުގައި މިރޭ ކާނިވާ ސަރަހައްދުގައި ބޭއްވި ޕީޕީއެމްގެ ޖަލްސާގައި ނޮވެމްބަރު ތިނެއްގެ ހާދިސާއާގުޅޭ ގޮތުން ދެއްކި ވީޑިޔޯއެއްގައި ބުނެފައި ވަނީ ލަންކާގައި ހުންނަ އިދިކޮޅު އެމްޑީޕީގެ ޖަގަހައަށް އަބްދުﷲ ލުތުފީ ގޮސް އުޅޭކަމަށް "މައުލޫމާތު ލިބިފައިވާ" ކަމަށެވެ. ނަމަވެސް އެ ވީޑިޔޯގައި އެކަމާބެހޭ ގޮތުން އިތުރު ތަފްސީލެއް ދީފައި ނުވެއެވެ. ޖަލްސާގައި ވާހަކަ ދެއްކެވި އެއްވެސް ބޭފުޅަކުވެސް އެކަމާބެހޭ ގޮތުން ތަފްސީލެއް ދެއްވާފައި ނުވެއެވެ.
ލުތުފީއަކީ ސަރުކާރުން ހޯދަން އިއުލާންކޮށްފައިވާ މީހެކެވެ. ހޯމް މިނިސްޓަރު ކަމުގައި އުމަރު ނަސީރު ހުންނެވި ދުވަސްވަރު ސަރުކާރުން ވަނީ ލުތުފީ އަތުލައިގަނެވޭ ވަރުގެ މައުލޫމާތު ފުލުހުންނަށް ފޯރުކޮށް ދިން މީހަކަށް 10000 ޑޮލަރުގެ އިނާމެއްވެސް ހުށަހަޅާފައެވެ. ނަމަވެސް މިހާތަނަށްވެސް ލުތުފީ އުޅެމުން ދަނީ ލަންކާގައި ފިލައިގެންނެވެ.
ދިގު މުއްދަތެއްގެ ޖަލު ޙުކުމެއްގައި ހުރި ލުތުފީ ބޭސްފަރުވާއަށް ލަންކާއަށް ފޮނުވާފައި ވަނީ ރައީސް ނަޝީދުގެ ދައުރުގައެވެ. އެހިސާބުން ލުތުފީ ވަނީ ލަންކާއަށް ފިލާފައެވެ. ހޯމް މިނިސްޓަރު އުމަރު ނަސީރު ވިދާޅުވެފައި ވަނީ ލުތުފީ ލަންކާގައި އުޅޭކަމުގެ މައުލޫމާތު ލިބިގެން ދިވެހި ފުލުހުންގެ ޓީމެއް ލަންކާއަށް ގޮސް އޭނާ ހޯދަން ކުރި މަސައްކަތް ކާމިޔާބު ނުވިކަމަށެވެ.
އަބްދުﷲ ލުތުފީއަކީ 1988 ވަނަ އަހަރުގެ ނޮވެމްބަރު ތިން ވަނަ ދުވަހު ރާއްޖެއަށް ހަމަލާ ދިނުމަށް ލަންކާގެ ތަމަޅަ ކުލީ ސިފައިން ގޮވައިގެން އައިސް ހުރި އެމީހުންގެ އެންމެ އިސްމީހާއެވެ. ލުތުފީ އަތުލައިގަތީ ހަނގުރާމައިން ލިބުނު ނާކާމިޔާބާއެކު އާގުބޯޓެއްގައި ދިވެހިންގެ ބަޔަކު ރަހީނުކޮށްގެން އެނބުރި ލަންކާއަށް ދަނިކޮށް އިންޑިޔާ ސިފައިންގެ މަނަވަރަކާއި ދިވެހި ސިފައިން ގުޅިގެން ހިންގި އޮޕަރޭޝަނެއްގައި ބޯޓަށް ހަމަލާދޭން ފެށުމުން ބޯޓުގައި ތިބި ތަމަޅައިން އަމާން ދިނުމާއެކުއެވެ.
