މާލެ އާއި ހުޅުލެ ގުޅުވައި ދިނުމަށްޓަކައި އަޅަމުން އަންނަ ބްރިޖަށް ކިޔާނެ ދިވެހި ނަމެއް ހޯދުމުގެ ގޮތުން ނަން ހުށަހެޅުމުގެ ފުރުޞަތު ދިވެހި ބަހުގެ އެކަޑަމީން ހުޅުވާލައިފިއެވެ.
ބަހުގެ އެކަޑަމީން ކޮށްފައިވާ އިއުލާނެއްގައި ބުނެފައި ވަނީ ބްރިޖަށް ކިޔާނެ ދިވެހި ނަމެއް އެ އެކަޑަމީއަށް ހުށަހެޅުމުގެ ސުންގަޑި މިމަހުގެ 16 ވަނަ ދުވަހާ ހަމައަށް އާންމުންނަށް ހުޅުވާލާފައިވާ ކަމަށެވެ. އެގޮތުން އެ މުއްދަތުގެ ތެރޭގައި ކޮންމެ މީހަކަށްވެސް ތިން ނަމެއް ހުށަހެޅޭނެ ކަމަށް ބުނެފައިވެއެވެ.
ބަހުގެ އެކަޑަމީން ބުނީ ނަން ހުށަހެޅުމުގައި ސަމާލުކަން ދޭންޖެހޭ ކަންތައްތަކެއްވެސް އެބަހުރި ކަމަށާއި އެގޮތުން ހުށަހަޅާން ނަން ވާންޖެހޭނީ ދިވެހި ރާއްޖެ އާއި ޗައިނާގެ ގުޅުން ރަމްޒުކޮށްދޭ ނަމަކަށް ކަމަށެވެ. މީގެއިތުރުން ރަނގަޅު މާނައެއް ދޭހަވާ ނަމަކަށް ވުމާއި، ގިނަވެގެން 9 އަކުރަށްވުރެ ނަން ދިގު ނުވުމާއި، ދުލަށް ފަސޭހައިން ކިޔާލެވޭނެ ނަމަކަށް ވުން ހިމެނެއެވެ.
މި ބްރިޖަކީ ޗައިނާ އާއި ރާއްޖެ ގުޅިގެން ހަދަމުން އަންނަ ބްރިޖެކެވެ. އެގޮތުން ޗައިނާއިން ވަނީ 116 މިލިއަން ޑޮލަރުގެ ހިލޭ އެހީވެސް މިކަމަށް ދީފައެވެ. އަދި 72 މިލިއަން ޑޮލަރުގެ ލޯނު ޗައިނާއިން ދީފައިވާއިރު ދިވެހި ސަރުކާރުން ޚަރަދު ކުރަނީ ބާރަ މިލިއަން ރުފިޔާއެވެ.
