ރައީސް މުޙަންމަދު ވަޙީދުގެ ސަރުކާރާއި ރައީސް އަބްދުﷲ ޔާމީންގެ ސަރުކާރުގެ ޑިފެންސް މިނިސްޓަރުކަން ކުރެއްވި ކާނަލް ރިޓަޔަޑް މުޙަންމަދު ނާޒިމް ދިރިއުޅުއްވި ގެއިން ހަނގުރާމަވެރި ހަތިޔާރު ފެނުމާއި ގުޅިގެން 11 އަހަރުގެ ޖަލު ޙުކުމެއްގައި ހުންނަވަނިކޮށް ނާޒިމްގެ އެއްވެސް ކުށެއް އެކަމުގައި ނެތް ކަމަށް ވިދާޅުވެ، ކުރީގެ ނައިބު ރައީސް އަޙްމަދު އަދީބު ސުޕްރީމް ކޯޓަށް ފޮނުއްވި ސިޓީއާއި ގުޅިގެން އެއްވެސް ކަމެއް ބަލަމުން ނުދާތީ ޖުމްހޫރީ ޕާޓީން ކަންބޮޑުވުން ފާޅުކޮށްފިއެވެ.
ޖަލުގައި ނާޒިމް 1000 ދުވަސް ހަމަވުމާއެކު ޖުމްހޫރީ ޕާޓީން މިއަދު ނެރުނު ނޫސްބަޔާނެއްގައި ބުނެފައި ވަނީ ނާޒިމްގެ ގެއިން ފެނުނު ފިސްތޯލައިގައި ކުރީގެ ނައިބު ރައީސް އަޙްމަދު އަދީބުގެ ޑީއެންއޭ ހުރި ކަމަށް ފުލުހުން ބުނެފައި ވަނިކޮށް، އޭގެފަހުން އަދީބު ދިގު މުއްދަތަށް ޖަލަށް ލެވިފައި ވަނިކޮށް އަދީބު ސުޕްރީމް ކޯޓަށް ފޮނުއްވި ސިޓީގައިވެސް ނާޒިމްގެ ގެއިން ފެނުނު ފިސްތޯލައާ ނާޒިމްއާ އެއްވެސް ގުޅުމެއް ނެތް ކަމަށާއި އެ ފިސްތޯލައިގެ ކަންކަން ހިނގާފައިވާ ގޮތް ނާޒިމްއަށް އެނގިވަޑައިނުގަންނަވާނެ ކަމަށް ވިދާޅުވެފައިވާ ކަމަށާއި ނަމަވެސް އެކަންކަން ނުބަލައި އަދިވެސް ޖަލު ޙުކުމުގައި ބެހެއްޓުމަކީ ނާއިންސާފު އަމަލެއް ކަމަށެވެ.
ޖޭޕީގެ ބަޔާނުގައި ބުނެފައި ވަނީ ނާޒިމްގެ މައްޗަށް 11 އަހަރުގެ ޖަލު ޙުކުމެއް އިއްވާފައި ވަނީ އިންސާފުން ނޫން ކަމަށާއި އެއީ ނާޒިމް ފްރޭމް ކުރުމަށް ބަޔަކު ރާވައިގެން ހިންގި ކަމެއްކަން ފުލުހުންގެ ރިޕޯޓުންނާއި ކުރީގެ ނައިބު ރައީސް އަޙްމަދު އަދީބު ދާދި ފަހުން ސުޕްރީމް ކޯޓަށް ފޮނުވި ސިޓީންވެސް އެނގެން އެބައޮތް ކަމަށެވެ.
"މުޙައްމަދު ނާޒިމްގެ ގެއިން ފެނުނުކަމަށް ބުނާ ފިސްތޯލައިން ނަގާފައިވާ ސާމްޕަލްތަކުން ކުރީގެ ނައިބު ރައީސް އަޙްމަދު އަދީބުގެ ޑީ.އެން.އޭ ފެނިފައިވާކަމަށް މޯލްޑިވްސް ޕޮލިސް ސަރވިސް އިން 21 ޖޫން 2017 ވަނަ ދުވަހު އިޢުލާން ކޮށްފައި ވެއެވެ. އަދި މިކަމާއި ގުޅުންހުރި ސިޓީއެއް 20 ޖޫން 2017 ގައި ކުރީގެ ނައިބު ރައީސް އަޙްމަދު އަދީބް ވަނީ ދިވެހި ރާއްޖޭގެ ސްޕްރީމް ކޯޓާއިކަމާއި ގުޅޭ އެހެން މުއައްސަސާތަކަށް ފޮނުއްވާފައެވެ. މުޙައްމަދު ނާޒިމްގެ ގެއިން ފެނުނުކަމަށްބުނާ ފިސްތޯލައަކީ މުޙައްމަދު ނާޒިމްގެ އެއްޗެއް ނޫންކަމާއި އެކަމާއި ބެހޭ އެއްވެސް ކަމެއް އޭނާއަށް އެގިވަޑައި ނުގަންނަވާނެކަމަށް އަދީބުގެ ސިޓީގައި ބަޔާން ކުރައްވާފައިވެއެވެ" ޖޭޕީން ނެރުނު ބަޔާނުގައި ބުނެފައިވެއެވެ.
ޑިފެންސް މިނިސްޓަރު ކަމުގައި ނާޒިމް ހުންނެވިއިރު އަދި ޓޫރިޒަމް މިނިސްޓަރު ކަމުގައި އަދީބު ހުންނެވިއިރު މި ދެބޭފުޅުންނަކީ ވަރަށް ގާތް ދެ ރަޙްމަތްތެރިންނެވެ. ނަމަވެސް ވަކި ހިސާބަކުން ދެބޭފުޅުންގެ މެދުގައި މައްސަލަތަކެއް ޖެހުނުތާ ގިނަ ދުވަސްތަކެއް ނުވަނީސް ނާޒިމް ވަނީ ހައްޔަރު ކޮށްފައެވެ. މިވަގުތު ނާޒިމް އާއި އަދީބުވެސް ދަނީ ދިގު މުއްދަތެއްގެ ޖަލު ޙުކުމެއް ތަންފީޒު ކުރައްވަމުންނެވެ.
