ހެލްތް މިނިސްޓްރީގެ ދަށުން ރާއްޖޭގެ އެކި ރަށްރަށުގައި ހިންގަމުން އަންނަ ހޮސްޕިޓަލް ތަކާއި ސިއްޙީ މަރުކަޒު ތަކަށް ގިނަ އަދަދެއްގެ ނަރުހުން ބޭނުން ވެގެން ހެލްތް މިނިސްޓްރީން އިއުލާން ކޮށްފިއެވެ.
މިނިސްޓްރީން ކުރި އިއުލާނެއްގައި ބުނެފައި ވަނީ ޖުމްލަ 631 ނަރުހުންގެ މަގާމަށް މީހުން ބޭނުންވާ ކަމަށެވެ. ހެލްތުގެ އިއުލާނުގައި ބުނެފައިވާ ގޮތުން މާގާމު ތަކަށް ހޮވާ ކޮންމެ ނަރުހަކަށް މުސާރަ އާއި ސާވިސް އެލަވަންސްގެ ގޮތުގައި މަހަކު 8،110 ރުފިޔާ ލިބޭނެއެވެ. އެއީ މުސާރައިގެ ގޮތުގައި 5،610 ރުފިޔާ އާއި ސާވިސް އެލަވަންސްގެ ގޮތުގައި ދިނުމަށް ހަމަޖައްސާފައިވާ 2،500 ރުފިޔާއެވެ.
631 ނަރުހުންގެ ވަޒީފާއަށް މީހުން ބޭނުން ވެގެން ހެލްތުން އިއުލާން ކުރިއިރު ހެލްތުން ވަނީ 160 ސްޕެޝަލިސްޓު ޑޮކްޓަރުން ބޭނުން ވެގެންވެސް އިއުލާން ކޮށްފައެވެ. ހެލްތުން ބުނެފައި ވަނީ 160 ސްޕެޝަލިސްޓް ޑޮކްޓަރުން ބޭނުން ވަނީ އެ މިނިސްޓްރީގެ ބެލުމުގެ ދަށުން ރާއްޖޭގައި ހިންގާ ހޮސްޕިޓަލް ތަކާއި ސިއްޙީ މަރުކަޒު ތަކަށް ކަމަށެވެ.
ޑޮކްޓަރުން ހޯދަން ބޭނުންވާ ޚާއްސަ ދާއިރާތަށްވެސް މިނިސްޓްރީން ވަނީ ބުނެފައެވެ. އޭގެތެރޭގައި ހިމެނެނީ ކޮންސަލްޓަންޓް އިން މެޑިސިން، އެނެސްތީސިއޮލޮޖީ، އޯތޯޕީޑިކްސް، އެނެސްތީސިއޮލޮޖީ، ސަރޖަރީ އަދި ޕީޑިއެޓްރިކްސް، ޑާމެޓޮލޮޖީ، އޮބްސްޓެޓްރިކްސް އެންޑް ގައިނަކޮލޮޖީ، ސައިކޭޓްރީ، އީ.އެން.ޓީ، ރޭޑިއޮލޮޖީ، ނެފްރޮލޮޖީގެ އިތުރުން އޮފްތަލްމޮލޮޖިސްޓެވެ.
މިނިސްޓްރީން ބުނެފައި ވަނީ އިއުލާން ކޮށްފައިވާ މަގާމު ތަކުގައި ތިއްބަވާ ޑޮކްޓަރުންގެ މުސާރައިގެ ގޮތުގައި 30،900 ރުފިޔާ ލިބޭނެ ކަމަށާއި އަދި ސާވިސް އެލަވަންސްގެ ގޮތުގައިވެސް 10،200 ރުފިޔާ ލިބޭނެ ކަމަށެވެ. އެހެންކަމުން މި އިން ކޮންމެ ޑޮކްޓަރަކަށް ޖުމްލަ 41،100 ރުފިޔާ ލިބޭނެއެވެ.
މުސާރަ އާއި ސާވިސް އެލަވަންސްގެ އިތުރުންވެސް ސިވިލްސާވިސް މުއައްޒަފުންނަށް ހަމަޖެހިފައިވާ އުސޫލުގެ ތެރެއިން އިތުރު ގަޑީގެ އެލަވަންސްވެސް ލިބޭނެ ކަމަށް މިނިސްޓްރީން ވަނީ ބުނެފައެވެ. އަދި އެ މަގާމަށް ކަނޑައެޅިފައިވާ އެހެނިހެން އިނާޔަތްތަކާއެކު ޕެންޝަން ކޮންޓްރިބިއުޝަން އާއި ސިވިލްސާވިސް މުއައްޒަފުންނަށް އޮންނަ އުސޫލުގެ ތެރެއިން ދެވޭ ބޭސްފަރުވާގެ ޚިދުމަތްވެސް ޑޮކްޓަރުންނަށް ލިބޭނެ ކަމަށް މިނިސްޓްރީން ވަނީ ބުނެފައެވެ.
