ދިވެހި ރާއްޖޭގެ "ގެތަކަށް ޓަކި ޖަހަމުން" ވަޒީފާގެ ފުރުޞަތު މި ފަސް އަހަރުގެ ތެރޭގައި އައިސްފައިވާ ކަމަށާއި ސަރުކާރަށް މިވީ މުއްދަތުގައި 70 ހާސް ވަޒީފާ ރާއްޖޭގައި އުފެދިފައިވާ ކަމަށް ރައީސުލްޖުމްހޫރިއްޔާ އަބްދުﷲ ޔާމީން ވިދާޅުވެއްޖެއެވެ.
ދ. ކުޑަހުވަދޫގައި "ދާލު އެއާޕޯޓް" ރަސްމީކޮށް ހުޅުވައި ދެއްވުމަށް ފަހު ރައީސް ވިދާޅުވީ އެމަނިކުފާނުގެ ސަރުކާރުން ރާއްޖޭގައި އުފައްދަން ވައުދުވި 94،000 ވަޒީފާގެ ތެރެއިން 70،000 ވަޒީފާ މިހާރުވެސް އުފެދިފައި އޮތުމުން އެ ވަޒީފާ ތަކުގައި ތިއްބެވި ބޭފުޅުން ވަޒީފާގައި ދެމިތިއްބެވޭތޯ ބެއްލެވުން އެދިވަޑައިގަންނަވާ ކަމަށެވެ. އަދި ލިބިފައިވާ އިންވެސްޓްމެންޓް ތަކަށް ޖާގަ ދެއްވުމަށާއި އެފަދަ ފަރާތްތަކަށް އިޙްތިރާމްކޮށް މެހްމާންދާރީ ދެއްވުމަށްވެސް ރައީސް އެދިވަޑައިގަތެވެ.
ރައީސްގެ ވާހަކަފުޅުގައި ވިދާޅުވީ ސަރުކާރުގެ ވިސްނުން ހުރީ ހުރިހާ ވަޒީފާތައް މާލެ ސަރަޙައްދަށް ޖަމާ ކުރަން ނޫން ކަމަށާއި ސަރުކާރުގެ އަމާޒަކީ ހުރިހާ ރަށްތަކަށްވެސް ވަޒީފާގެ ތަނަވަސްކަން ހޯދައިދިނުން ކަމަށް ވިދާޅުވިއެވެ. އަތޮޅު ތަކުގައި އެއާޕޯޓް އަޅައިދެއްވަނީ އެ ވިސްނުމުގައި ކަމަށްވެސް ރައީސް ވިދާޅުވިއެވެ.
ރައީސްގެ ވިދާޅުވީ ސަރުކާރުން ހިންގާ ތަރައްގީގެ މަޝްރޫއުތަކާމެދު ހިތްހަމަނުޖެހުން ތަކެއް ހުރި ނަމަވެސް ތަރައްގީ ގެނައުމަށް "ލޮޅުން" އަރުވަން މަސައްކަތް ނުކުރުން ރައްޔިތުންގެ ކިބައިން އެދިވަޑައިގަންނަވާ ކަމަށެވެ.
