2019 ވަނަ އަހަރުގެ އީސްޓާ (ނަސާރާއިންގެ އީދެއް) އާދީއްތަ ދުވަހު ސްރީލަންކާގައި ބޮންގޮެއްވި މައްސަލައިގައި އެ ގައުމުގެ މުސްލިމް ސިޔާސީ ލީޑަރަކު މިއަދު ހައްޔަރުކޮށްފިއެވެ.
ސްރީލަންކާގެ ފުލުހުންގެ ތަރުޖަމާނު ޑެޕިއުޓީ އިންސްޕެކްޓަރ ޖެނެރަލް އަޖިތު ރޯހަނާ މިއަދު ވިދާޅުވި ގޮތުގައި، ކްރިމިނަލް އިންވެސްޓިގޭޝަންސް ޑިޕާޓްމަންޓް (ސީއައިޑީ) އިން ޕްރިވެންޝަ އޮފް ޓެރަރިޒަމް އެކްޓް (ޕީޓީއޭ) ގާނޫނުގެ ދަށުން މިއަދު ހައްޔަރުކޮށްފައި ވަނީ އެ ގައުމުގެ ގާނޫނުހަދާ މަޖިލީހުގެ މެންބަރު އަދި އޯލް ސިލޯން މައްކަލް ޕާޓީގެ ލީޑަރު ރިޝާދު ބަދީޢުދީނާއި އޭނާގެ ކޮއްކޮ ރިޔާޒް ބަދީޢުއްދީނެވެ. އެ ދެބޭފުޅުން ހައްޔަރުކޮށްފައި ވަނީ ކޮލޮމްބޯގެ ވެއްލަވައްތަ އަވަށުގައި އެ ދެބޭފުޅުއް ދިރިއުޅުއްވާ ތަންތަނަށް މިއަދު ފަތިހު ފުލުހުން ވަދެއެވެ.
"ޕީޓީއޭގެ ދަށުން އެމީހުން ހައްޔަރުކޮށްފައި ވަނީ ޖާނުން ފިދާވެގެން ހަމަލާތައް ދިން މީހުންނާ އެމީހުންނާ ގުޅުން އޮތް ކަމުގެ ސާކަމްސްޓެންޝަލް އަދި ސައިންޓިފިކް ހެކީގެ މައްޗަށް ބިނާކޮށް." ފުލުހުންގެ ތަރުޖަމާނުގެ ބަޔާނުގައި ވެއެވެ.
ރޯހަނާ ވިދާޅުވި ގޮތުގައި މިހާރު ދަނީ ސީއައިޑީގެ ފަރާތުން އެބޭފުޅުންނާ ސުވާލުކުރަމުންނެވެ.
އީސްޓާ ބޮންގޮއްވުމާ ގުޅިގެން މިއަދު ބަޔަކު ހައްޔަރުކޮށްފައި ވަނީ، ސްރީލަންކާ ސަރުކާރުން އެ މައްސަލައިގެ ތަހުގީގު ލަސްކުރަމުންދާ ކަމުގެ ތުހުމަތު ސްރީލަންކާގެ ރޯމަން ކެތޮލިކުންގެ ވެރިޔާ ކާޑިނަލް މެލްކަމް ސަރުކާރަށް ކުރައްވާފައި ވަނިކޮށެވެ. ބޮމުގެ ހަމަލާތައް ދިންތާ ކުޑަދުވަސްކޮޅެއްގެ ތެރޭގައި 200 ވަރަކަށް މީހުން ހައްުޔަރުކޮށްފައި ވީނަމަވެސް، އަދިވެސް އެއްވެސް މީހެއްގެ މައްޗަށް ދައުވާކޮށްފައި ނުވެއެވެ.
ޝަރުއީ ދާއިރާއާއި ގާނޫނުހަދާ މަޖިލީހުގެ މައްޗަށް ރައީސު ގޮތާބޭ ރާޖަޕަކްސާއަށް ބޮޑެތި ބާރުތަކަށް ދޭން ގާނޫނު އަސާސީއަށް އިސްލާހުގެނަައި އިރު، ބަދީޢުއެްދީންގެ ޕާޓީގެ މެންބަރުން ވަނީ ރައީސު ރާޖަޕަކްްސާއަށް ތާއިދުކޮށް ވޯޓުދީފައެވެ.
2019 ވަނަ އަހަރުގެ އެޕްރީލް މަހުގެ 21 ވަަނަ ދުވަހު (އީސްޓާ އާދިއްތަ ދުވަހު) ސްރީލަންކާގެ ނަސާރާ ތިން ފައްޅިއަކަށާއި، 3 ލަގްޒަލީ ހޮޓަލަކަށް ދިން ބޮމުގެ ހަމަލާތަކުގައި 269 މީހުން މަރުވެފައި ވެއެވެ.
