ކާނަލް މުޢައްމަރުލް ޤައްޒާފީގެ ވެރިކަން ނިމުމަކަށް ގެނައުމަށްފަހު ލީބިޔާގައި އޮތް ބައިބައިވުން ނިމުމަކަށް ގެނައުމަށް އދ.ން ކުރާ މަސައްކަތުގެ ތެރެއިން މިއަހަރުގެ ކުރީކޮޅު އުފެދުނު އިންތިގާލީ އެއްބައިވަންތަކަމުގެ ސަރުކާރަށް ބައިނައިލްއަގުވާމީ ތާއީދު އިތުރުވަމުން ދާކަން އެސަރުކާރުން ހާމަކޮށްފިިއެވެ.
ގްރީސް، ފްރާންސް، އިޓަލީ އަދި މޯލްޓާ ފަދަ ޔޫރަޕުގެ ގައުމުތަކުން ލީބިޔާގެ ވެރިރަށް ޓްރިޕޮލީ (ޠަރާބުލުސް) ގައި އެގައުމުތަކުގެ އެމްބަސީތައް ހުޅުވަމުން ދާއިރު، ކުރިން ލީބިޔާގެ އިރުމަތީގައި އޮތް ވާދަވެރި ސަރުކާރަށް ތާއީދުކުރި މިސްރުންވެސް ވަނީ ޓްރިޕޮލީގައި އަލުން އެމްބަސީ ހުޅުވާފައެވެ.
ލީބިޔާގެ އާ ސަރުކާރުގެ ޚާރިޖީ ވަޒީރު ނަޖްލާ އަލްމަންޤޫޝް ވަނީ ޔޫރަޕުގެ ގައުމުތައް ފަަދައިން ދުނިޔޭގެ އެެހެން ގައުތަކުންވެސް ޓްރިޕޮލީގައި އެމްބަސީ ހުޅުވުމަށް ގޮވައިލައްވާފައެވެ.
އޭނާ މިމޭރުމުން ވާހަކަފުޅުދައްކަވާފައި ވަނީ މިހާރު ލީބިޔާއަށް ޒިޔާރަތްކުރައްވަމުން ގެންދަވާ ޔޫރަޕިއަން ޔުނިއަން (އީޔޫ) ކައުންސިލްގެ ރައީސު ޝާރްލް މިޝޭލްއާއެކު އޮތް ނޫސްވެރިންގެ ބައްދަލުވުމެއްގައެެވެ.
މި ބައްދަލުވުމުގައި ވާހަކަފުޅު ދައްކަވަމުން މިޝޭލް ވަަނީ ލީބިޔާގައި ހަރަކާތްތެރިވަމުންދާ ބޭރުގެ ކުލީ ސިފައިން އެގައުމުން ފޭބުމަށް ގަޮވައިލައްވާފައެވެ. އޭނާގެ ވާހަކަފުޅަށް ރައްދުދެއްވަމުން އަލްމަންޤޫޝް ވިދާޅުވީ މި މައްސަލައިގައި އިންތިގާލީ ސަރުކާރުގެ ސިޔާސަތު ވަރަށް ސާފުކަމުގައެވެ. އެއީ، ހުރިހާ ކުލީ ސިފައިން ލީބިޔާއިން ބޭރުކުރުމެވެ.
މިޝޭލް ވަނީ ލީބިޔާގެ އިންތިގާލީ ބޮޑުވަޒީރު ޢަބްދުލް ޙަމީދު ދުބައިބާއާވެސް ބައްދަލުކުރައްވާފައެވެ.
ލީބިޔާއާ ގުުޅުން ބަދަހިކުރުމަށް ޔޫރަޕުގެ ގައުމުތަކުން އިސްނަގައިގެން މަސައްކަތްކުރަމުން މިދަނީ އދ.ގެ ބެލުމުގެ ދަށުން ގާއިމުކުރި އިންތިގާލީ ސަރުކާރަށް އިތުބާރުކުރާ ކަމާއި، ތާއީދުކުރާކަން ހާމަކުރުމަށެވެ.
ޔޫރަޕިއަން ކައުންސިލްގެ ރައީސުގެ އިތުރަށް ފްރާންސާއި، ޖަރުމަނާއި، އިޓަލީގެ ޚާރިޖީ ވަޒީރުން ޓްރިޕޮލީއަށް ޒިޔާރަތްކުރައްވާފައި ވާއިރު، އިޓަލީގެ ބޮޑުވަޒީރު މާރިޔޯ ދްރާގީއާއި، ގްރީސްގެ ބޮޑުވަޒީރު ކިރިޔާކޯސް މިޓްސުޓާކިސް މާދަމާގެ ވަގުތެއްގައި ޓްރިޕޮލީއަށް ވަޑައިގަތުމަށް ވަނީ ހަމަޖެހިފައެވެ.
ޔޫރަޕިއަން ކައުންސިލްގެ ރައީސު ވަނީ ކޮވިޑް-19 ވެކްސިންގެ 50 ހާސް ޑޯޒް ލީބިޔާއަށް ފޮނުވަން ހަމަޖެހިފައިވާކަން އިއުލާންކުރައްވާފައެވެ.
އަނެއްކޮޅުން ރަޝިޔާގެ ސްޕަޓްނިކް-ވީ ގެ 1 ލައްކަ ޑޯޒް ވެކްސިން ވަނީ އިއްޔެ ލީބިޔާއަށް ލިބިފައެވެ. އަދި އިތުރު ޑޯޒްތައް ވަރަށް އަވަހަށް އަންނާނެކަމަށް ލަފާކުރެވެއެވެ.
