އިންޑިޔާގައި މުސްލިމުން ކައިވެނިކުރާއިރު، އަންހެން މީހާ އަތުން ނަގާ ޖަހޭޒް (ޑައުރީ) ނެގުމާއި، ކައިވެނީގެ ހަފުލާތަކަށް ބޮޑު ޚަރަދުކުރުން ހުއްޓާލަން އެ ގައުމުގެ މުސްލިމުންގެ އާއިލީ ގާނޫނުތަކާއި އުސޫލުތަކުގ ކަންކަން ބަލަަހައްޓާ ފަރާތުން އަންގައިފިއެވެ.
މިކަން އަންގާފައި ވަނީ އޯލް އިންޑިޔާ މުސްލިމް ޕާސަނަލް ލޯ ބޯޑް (އޭއައިއެމްޕީއެލްބީ) އިން މުސްލިމުން ކައިވެންޏާ، ކައިވެނީގެ ހަފުލާތަކާ ގުޅޭ ގޮތުން ނެރުނު 11 ނުގުތާގެ އާ ގައިޑްލައިންގައެވެ.
އޭއައިއެމްޕީއެލްބީގެ ޗެއާމަން މައުލާނާ މުޙައްމަދު ރާބީޢު ޙަސަނީ ނަދްވީ ސޮއިކުރައްވައި ނެރުނު ގައިޑްލައިންގައި ކައިވެނިކުރާ އަންހެންމީހާ އާއިލާއިން ފިިރިހެންމީހާއަށް ޖަހޭޒް ދިނުމުގެ ޒަމާންވީ ސަގާފަތް ނިމުމަކަށް ގެނައުމަށާއި، ކައިވެނީގެ ހަފުލާތަކަށް ކުރާ، އާއިލާގެ ތަނަވަސްކަމާ ނުބައްދަލު ބޮޑު ޚަރަދުކުރުން ހުއްޓާލަން އަންގާފައި ވެއެެވެ.
މި ގައިޑްލައިން ނެރެފައި މިވަނީ ގުޖަރާތުގެ މުސްލިމް އަންހެނެއްގެ އަތުން ޖަހޭޒްގައި ދޭންޖެހޭ ތަކެތި ނުދީގެން އޭނާގެ ފިރިމީހާއާއި ފިރިމީހާ އާއިލާއިން ފުރައްސާރަކޮށް އަނިޔާކުރުމުން އެއަންހެން މީހާ އަމިއްލައަށް މަރުވުމާ ގުޅިގެންނެވެ. މިމަރާ ގުޅިގެން މުސްލިމް މުޖްތަމައުގައި ކައިވެންނާ ގުޅުވައިގެން ހިނގާ ނޭދެވޭ ކަންކަމުގެ މައްސަލަ ބޮޑު ބަހުސަކަށް ވެގެެން ދިޔައެވެ.
އަައު ގައިޑްލައިންގައި ހުއްދަދީފައި ވަނީ އާދައިގެ ކައިވެނީގެ ހަފުލާ ބޭއްވުމަށެވެ. ޖަހޭޒް ނެގުމާއި، ކައިވެނިކުރާ އަންހެން މީހާ ފިރިހެން މީހާގެ ގެންދިއުމަށް ބާއްވާ ބާރާތު ބޭއްވުމަާއި، ހަވާއެރުވުމާއި، ނެށުމާއި، ވަލީމާގައި އިސްރާފުކުރުމަކީ އިސްލާމްދީނާ ޚިލާފު ކަންކަމަށް ވާތީ އެކަންކަން ވަނީ މަނާކޮށްފައެެވެ. ގައިޑްލައިންގައި ހުއްދަ ދީފައިވަަނީ ފަގީރުންނާއި ނިކަމެތިންވެސް ހިމެނައިގެން އާއިލާއާއި ގާތް މީހުންނަށް ދައުވަތުދީގެން ބާއްވާ، އިސްރާފުކުރުން ނެތް ވަލީމާއެއް ބޭއްވުމަށެވެ.
އޭއައިއެމްޕީއެލްބީގެ ސެކްރެޓަރީ ޖެެނެރަލް މައުލާނާ ޢުމަރައިން މަޙްފޫޒު ރަޙްމާނީ ފާހަގަކުރެއްވި ގޮތުގައި ކައިވެނީގައި ހިނގާ ނޭދެވޭ ކަންކަން ހުއްޓާލަން އަންގައި ގައިޑްލައިނެއް ނެރުމަކީ ކުއްލި ގޮތަކަށް ކުރިކަމެކޭ ބުނާ ބުނުމަކީ ރަނގަޅު ވާހަކައެެއް ނޫނެވެ.
"މުޖުތަމައަށް ރަނގަޅު ބަދަލުތަކެއް ގެނައުމަށާާއި، ނުބައި އާދަތަކާއި އަމަލުތަައް ހުއްޓާލަން މުސްލިމުން ހަރަކާތްތެރިކުރުމަށް ބޯޑުން މަސަައްކަތްކުރާތާ އަހަރުތަކެއް ވެއްޖެ. ކައިވެންޏަށް ބަލާއިރު، އެކަމާ ގުޅިފައި ހުރި ނުބައި އާދަތައް ހުއްޓުވަން އަހަރުމެން މަސައްކަތް ކުރާތާ އެތައް އަހަރެއް ވެއްޖެ." ރަޙްމާނީ ވިދާޅުވިއެވެ.
"އަހަރުމެން މިކުރާ މަސައްކަތީ ކައިވެންޏަކީ މީސްތަކުންނަށް ފަސޭހަ، އާދައިގެ ކަމަކަށް ހެދުން." އޭއައިއެމްޕީއެލްބީގެ އިސް މެންބަރެއް ކަމުގައިވާ ޒަފަރްޔާބް ޖީލާނީ ވިދާޅުވިއެވެ.
އޭއައިއެމްޕީއެލްބީގެ ސޯޝަލް ރިފޯމް ކޮމިޓީން ވަނީ އާދައިގެ ގޮތުގައި ކައިވެނިކުރުމާ ގުޅޭ ކެންޕޭނެއް އިންޑިޔާގެ ކަންކޮޅުތަކުގައި 27 މާރިޗުން 6 އެޕްރީލަށް ހިންގުމަށް ނިންމާފައެވެ. މި ކެންޕޭންގެ ދުވަސްވަރު ހުކުރު ޚުޠުބާގައި ކައިވެނީގެ ވާހަކަ ދެއްކުމާއި، މިސްކިތްތަކަށް ނަމާދަށް ދާ މީހުންނަށް މައުލުމާތު ދިނުމާއި، އާއްމުންގެ ތެރޭގައި މައުލޫމާތު ފެތުރުމަށް ކަންމަތީ ބައްދަލުވުންތައް ބޭއްވުމަށް ވަނީ ނިންމާފައެވެ.
