ޓައިވާނުގައި ބާރު ދުވެލީގައި ދަތުރުކުރަމުން ދިޔަ ރޭލެއް ޓްރަކެެއްގައި ޖެހި އޭގެ ބައިތައް ދަގަނޑުން ނެއްޓުމުގެ ސަބަބުން 54 މީހުން މަރުވެ، 100 އަށްވުރެ ގިނަ މީހުން ޒަޚަމްވެއްޖެއެވެ. ރޭލުގެ ބައިތައް ދަގަނޑުން ނައްޓާލީ ޓަނެލެއްގެ ތެރެއިން ކަމުން، މީހުން ސަލާމަތްކުރާ މީހުންގެ މަސައްކަތަށް ވަނީ ހުރަސްތަކެއް ކުރިމަތިވެފައެވެ.
މިއީ ފަހުގެ ތާރީޚެއްގައި ޓައިވާނުގައި ހިނގާފައިވާ އެންމެ ހިތާމަވެރި ރޭލު އެކްސިޑެންޓެވެ.
ވެރިރަށް ޓައިޕޭއިން ޓައިޓުންގަށް ދަތުރުކުރަމުން ދިޔަ އެކްސްޕްރެސް ރޭލުގައި ފަތުރުވެރިންގެ އިތުރަށް، ދިގު ހަފުތާ ބަންދަށް ރަށަށް ދަތުރުކުރަމުން ދިޔި ގިނަ ބަޔަކު ތިއްބެވެ.
މިހާދިސާ ހިނގާފައި ވަނީ މިއަދު ހެނދުނު 9 ޖެހިއިރު (ރާއްޖޭ ގަޑިން ހެނދުނު 6 ޖެހިއިރު) ހައުލިއެން އަވަށުގެ އުތުރުން އޮންނަ ޓޮރޮކޯ ގޯޖް ސަރަހައްދުގައެވެ. ދިގު ހަފުތާ ބަންދަކަށް ވުމުން ރޭލުން ދަތުރުކުރި މީހުންވެސް ގިނަކަމަށް ވެއެެވެ. ބައެެއް ރިޕޯޓުތައް ބުނާ ގޮތުގައި ހާދިސާ ހިނގި ވަގުތު ރޭލުގައި 490 ފަސިޖަރުން ތިއްބެވެ.
މިހަފުތާ ބަންދަކީ 'މަހާނަ ފުހޭ އީދު' އާއެކު އައި 4 ދުވަހުގެ ހަފުތާ ބަންދެކެވެ.
ހާދިސާގެ ތަފްސީލު ދެމުން ޓައިވާނުގެ ޚަބަރުފަތުރާ ވަސީލަތްތަކުން ބުނެފައިވާ ގޮތުން ކައިރީގައި ހުރި ފަރުބަދައެއްގެ މަތިން ޓްރަކެއް ވެއްޓިގެން އައިސް ރޭލުދަގަނޑު ޖެހުނު ވަގުތު ބާރު ދުވެލީގައި ޓަނެލުން ނުކުތް ރޭލު ޓްރަކުގައި ޖެހުނީއެވެ.
ޓައިވާނުގެ ފަޔާ ޑިޕާޓްމަންޓުން މައުލޫމާތު ދިންގޮތުގައި ރޭލުގެ ފުރަތަމަ ފަސް ބަޔަށް ވަނީ ބޮޑެތި ގެއްލުންތަކެއް ލިބިފައެވެ. ޓަނެެލްގެ ތެރޭގައިވީ ބައިތައް ފުރޮޅާލައި ހަލާކުވެފައިވާއިރު ގިނަ ބަަޔަކު އޭގެ ތެރޭގައި ތާށިވިއެވެ. އެބައިތަކުން 100 އެއްހާ މީހުން ސަލާމަތްކުރެވިފައި ވާއިރު، 40 މީހުން ވަނީ ހޮސްޕިޓަލްތަކަށް ގެންދެވިފައެވެ.
ޓައިވާނުގައިި އެންމެ ފަހުން ރޭލުގެ ބޮޑު ހާދިސާއެއް ހިނގާފައި ވަނީ 2018 ވަނަ އަހަރުގެ އޮކްޓޯބަރު މަހުގައެވެ. އެފަަހަރު ރޭލެއް ފުރޮޅާލުމުގެ ސަބަބުން 18 މީހުން މަރުވެ 200 މީހުންނަށް އަނިޔާވިއެވެ.
މީގެ ކުރިން ޓައިވާނުގައި އެންމެ ގިނަ މީހުން މަރުވި ރޭލު އެކްސިޑެންޓް ހިނގާފައި ވަނީ 1991 ވަނަ އަހަރުއެވެ. އެފަހަރު ދެ ރޭލު ޖެހުމުގެ ސަބަބުން 30 މީހުން މަރުވެ 112 މީހުންނަށް އަނިޔާވިއެވެ.
