މިސްރުގެ ދެކުނުގައި އޮންނަ ގަވަރްނަރޭޓެއް ކަމުގައިވާ ސޯހާގްގެ ޠަހްޠާގައި ދެ ރޭލު ޖެހުމުގެ ސަބަބުން 32 މީހުން މަރުވެ 91 މީހުން ޒަޚަމްވެެއްޖެއެވެ. މިސްރުގެ ޓްރާންސްޕޯޓް މިނިސްޓްރީން ބުނި ގޮތުގައި އެެއްކޮޅަށް ދަތުރުކުރަމުން ދިޔަ ރެ ރޭލު ޖެހުނީ "ކޮންބައެއް ކަން ނޭނގޭ ބަޔަކު" ކުރީގައި އޮތް ރޭލުގެ އެމަޖެންސީ ބްރޭކް ޖެއްސުމާ ގުޅިގެން ފަހަތުން އައި ރޭލު އެ ރޭލުގައި ޖެހިގެންނެެވެ.
ހެލްތު މިނިސްޓްރީން ބުނި ގޮތުގައި ހާދިސާ ހިނގި ސަރަހައްދުގައި 36 އެންބިއުލާންސް ހަރަކާތްތެރިވާއިރު، ޒަަޚަމްވީ މީހުން އުފުލަނީ އެ ސަރަހައްދުގެ ހަތަރު ހޮސްޕިޓަަލަަކަށެވެ.
ނަން ހާމަނުކުރާ ރަސްމީ ފަރާތަކާ ހަވާލާދީ މިސްރު ސަރުކާރާ ގާތް ނޫހެއް ކަމުގައިވާ އަޚްބާރުލް ޔައުމުން ބުނެފައިވާ ގޮތުގައި ދެ ރޭލު ޖެހުމުގެ ކުރީގައި އޮތް ރޭލުގެ ދެ ކެރިޖް ދަގަނޑުން ނައްޓާލައި، ފަަހަތުން އައި ރޭލުގެ އިންޖީނު ބައި ވަނީ ފުރޮޅާލާފައެވެ.
ރައީސު ޢަބްދުލްފައްތާޙު ސީސީ ވަނީ މިކަމުގައި ޒިއްމާވާ ފަރާތްތަކަަށް އަދަބުދެން ޖެހޭ ކަމަށް ވިދާޅުވެފައެވެ.
"ފަރުވާކުޑަކަމުން، ނުވަތަ ކޮރަޕްޝަނުގެ ސަބަބުން ނަމަވެސް މި ވޭންދެނިވި ހާދިސާގެ ސަބަބަކަށްވި ފަރާތްކަަށް އިސްތިސްނާއެއް، ލަސްކުރުމެއް ނެތި، އެހެން ބަޔަކު މިފަދަ އަމަލެއް ހިންގަން ފަސްޖެހޭވަރުގެ އަދަބެއް ދޭންޖެހޭ" ސީސީ ކުރެއްވި ޓުވީޓެއްގައި ވެއެވެ.
އެހެންނަމަވެސް، ގިނަ ބަޔަކު ގަބޫލުކުރާ ގޮތުގައި މިސްރުގައި ރޭލުގެ މިފަދަ ހިތާވެރި ހާދިސާތައް ތަކުރާރުވަނީ މިސްރުގެ ބިޔަ ރޭލްވޭ ނިޒާމުގައި މުވައްޒަފުން މަދުވުމާއި، ޚިދުމަތުގައި ބޭނުންކުރާ ވަސީލަތްތަކުގެ ފެންވަރު ދަށްވުމުންނެވެ. އެހެންކަމުން ހާދިސާއެއް ދިމާވާ ކޮންމެ ފަހަރަކު ދަށް ފަންތީގެ މުވައްޒަފުންނަަށް އަދަބު ދިނުމުން މައްސަލަ ހައްލުނުވާނެއެވެ.
މިސްރުގެ ރޭލްވޭ ނިޒާމަކީ އުތުރު އެފްރިކާގެ އެންމެ ދުވަސްވީ އެންމެ ބޮޑު ރޭލްވޭ ނިޒާމެވެ. ސީސީގެ ސަރުކާރުން 2018 ވަނަ ވަނަ އަހަރު ބުނެފައިވާ ގޮތުގައި ރޭލްވޭ ނިޒާމު ޒަމާނީކުރަން ބޭނުންވާ 14 ބިލިއަނެއްހާ އެމެރިކާ ޑޮލަރު ސަރުކާރަށް ހަމަޖެއްސެނެތެވެ.
އޭގެ އެއް އަހަރު ކުރިން، 2017 ވަނަ އަހަރު އިސްކަންދަރިއްޔާ (އެލެގްޒަންޑްރިޔާ) ގައި ހިނގި ރޭލު އެކްސިޑެެންޓެއްގައި 43 މީހުން މަރުވެފަައި ވާއިރު، 2016 ވަނަ އަހަރު ޤާހިރާ (ކައިރޯ) ގައި ހިނގި ރޭލު އެކްސިޑެންޓެއްގައި 51 މީހުން މަރުވެފައި ވެއެވެ.
މިސްރުގެ ތާރީޚުގައި އެންމެ ހިތާމަވެރި ރޭލު އެކްސިޑެންޓެއް ހިނގާފައި ވަނީ 2002 ވަނަ އަހަރުއެވެ. އެއަަަހަރު ފެބުރުވަރީ މަހުގެ 20 ވަނަ ދުވަހު ޤާހިރާއިން މިސްރުގެ ދެކުނަށް ދަތުރުކުރަމުން ދިޔަ ރޭލެއްގައި ހުރި ގޭސް ފުޅިއެެއް ގޮވުމުގެ ސަބަބުން ރޭލުގައި އަލިފާން ރޯވެ، 300 މީހުން މަރުވެފައި ވެއެވެ.
