ބަންގްލަދޭޝް ސަރުކާރުން ބޭ އޮފް ބެންގޯލްގައި އެކަހެރިކޮށް އޮތް ރަށަކަށް އެގައުމުގައި ދިރިއުޅޭ ރޮހިންޖާ ރެފިއުޖީންެގެ ބަޔަކު ބަދަލުކުރި ފަހުން އދ.ން ފުރަތަމަ ފަހަރަށް އެ ރަށަށް ޒިޔާރަތްކޮށްފިއެވެ.
އދ.ގެ ޓީމަކުން މިއަދުން ފެށިގެން 3 ދުވަހުގެ މުއްދަަތަށް އެރަަށަށް ޒިޔާރަތްކުރަން ހަމަޖެހިފައިވާއިރު، އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ފާޑުކިޔަމުން ދަނިކޮށް ބަންގްލާދޭޝްއިން ފާއިތުވި ޑިސެންބަރު މަހުން ފެށިގެން އެރަށަށް ރޮހިންޖާ ރެފިއުޖީންގެ 13 ހާސް މީހުން ބަދަލުކޮށްފައި ވެއެވެ.
ބަންގްލާދޭޝް ސަރުކާރުން ރާވާފައި ވަނީ އެ ގައުމުގައި ދިރިއުޅެމުންދާ މިލިއަނެއްހާ ރޮހިންޖާ ރެފިއުޖީންގެ ތެރެއިން 1 ލައްކަ މީހުން ބަސަން ޗާރް ޖަޒީރާއަށް ބަދަލުުކުރާާށެެވެ. އެ ގައުމުގެ އައްސޭރިއާ 60 ކިލޯމީޓަރު ދުރުގައި އޮންނަ އެރަށަކީ ވިއްސަކަށް އަހަރު ކުރިން ބޭ އޮފް ބެންގޯލްއިން ތިލަވެ އުފެދިގެން އައި ރަށެކެވެ. އެހެންކަމުން، އަދި ފެންބޮޑުވުގެ ފުރުސަތުވެސް ބޮޑު ރަށެކެވެ. އެހެންކަމުން، ގިނަ ބަަޔަކު ދެކޭގޮތުގައި އެއީ މީހުން ދިރިއުޅެން އެކަށީގެންވާ ރަށެއް ނޫނެވެ.
"ތިން ދުވަހުގެ މުއްދަތަކަށް ކުރާ ފުރަތަމަ ޒިޔާރަތުގައި ބައިވެރިވާނީ ބަންގްލާދޭޝްގައި ރޮހިންޖާ ރެފިއުޖީންގެ ކަންކަން ބެލުމުގައި ހަރަކާތްތެރިވާ އދ.ގެ އެޖެންސީތަކުގެ މަންދޫބުން." އދ. ރެފިއުޖީ އެެެޖެންސީން ބުނެފައި ވެއެވެ.
"މި ޒިޔާރަތުގައި ބަލާނީ ބަސަން ޗާރް ޖަޒީރާގައި ހުރި ވަސީލަތްތަކުގެ ހާލަތު ހުރިގޮތާއި އެރަށަށް ބަދަލުކޮށްފައި ތިބި ރޮހިންޖާ ރެފިއުޖީންނަން ބޭނުންވާ ކަންކަން. އަދި ބަސަން ޗާރުގައި މަސައްކަތްކުރާ ސަރުކާރުގެ އިދާރާތަކާއި އެހެން ފަރާތަތުގެ މީހުންނާއި ބައްދަލުކޮށް މަޝްވަރާކުރާނެ." އދ.ން ބުނެފައި ވެއެެވެ.
އދ.ން ކުރިން ބުނެފައިވާ ގޮތުގައި އެ ރަށުގެ ސަލާމަތީ އަދި ޓެކްނިކަލް ކަންކަން ހުރިނެތް ގޮތް ބެލުމުގެ ހުއްދަ އެ ޖަމްއިއްޔާއަށް ދިނުމަށް ބަންގްލާދޭޝް ސަރުކާރުން ވަނީ ދެކޮޅުހަދާފައެވެ. އަދި ރެފިއުޖީން އެ ޖަޒީރާއަށް ބަދަލުކުރުގައި އެ ޖަމްއިއްޔާގެ އެއްވެސް ދައުރެއް ނެތެވެ.
ބަންގްްލާދޭޝް ސަރުކާރުން ބުނާ ގޮތުގައި ރޮހިންޖާ ރެފިއުޖީން އެރަށަށް ބަދަލުކޮށްފައި ވަނީ އެމީހުން ރުހުމުގައެވެ. އެހެންނަމަވެސް، ރެފިއުޖީންގެ ތެެރޭން ވާހަކަދެއްކި ބައެއް މީހުން ބުނާގޮތުގައި އެރަށަށް އެމީހުން ބަދަލުކޮށްފައި ވަނީ އެމީހުންގެ ރުހުމާ ދެކޮޅަށެވެ.
ބަަސަން ޗާރް ޖަޒީރާއަށް ބަދަލުކުރި ރެފިއުޖީން އެރަށުން ބޭރަށް ދިއުން ބަންގްލާދޭޝް ސަރުކާރުން ވަނީ މަނާކޮށްފައެވެ. އެގައުމުގެ ސަރުކާރުން ބުނެފައި ވަނީ އެއްލައްކަ މީހުންނަށް ބޭނުންވާނެ ބޯހިޔާވަހިކަން އެރަށުގައި ގާއިމުކޮށް، ހޮސްޕިޓަލާއި، ފެންބޮޑުވުން ރައްކާތެރިވުުމުގެ ވަސީލަތްތައް ބިނާކޮށްދީފައިވާނެ ކަމުގައެވެ.
މީގެ އިތުރަށް ބަންގްލާދޭޝް ސަަރުކާރުން ބުނާ ގޮތުގައި ރެފިއުޖީ ކޭންޕުތަކުގައި ތޮއްޖެހުން ބޮޑުވުމުން ކުށްކުރުން އިތުރުވެއެވެ. އަދި އެތަންތަނުގައި ހަމަނުޖެހުން ހިނގަން މަގުފަހިވެއެވެ. ރެފިއުޖީން އެެހެން ތަނަކަށް ބަދަލުކުރަން ޖެހުނީ އެހެންވެއެވެ.
"އަހަރުމެން އުއްމީދުކުރަނީ މިސަބަބަށްޓަކާވެސް ރެފިއުޖީން ބަދަލުކުރުމާމެދު ހުރި އދ.ގެ ކަންބޮޑުުވުންތައް ފިލައިގެންދާނެ ކަމަށް. އަދި ރެފިއުޖީން ބަދަލުކުރުމުގެ މަސައްކަތުގައި އދ.ން ބައިވެރިވެ ރޮހިންޖާއިންނަށް ބޭނުންވާ އެހީތެރިކަން ފޯރުކޮށްދޭނެކަމަށް." ބަންގްލާދޭޝްގެ ފޮރިން މިނިސްޓްރީގެ އިސް ބޭފުޅަކު ވިދާޅުވިއެވެ.
