ޖޯޑަން (އުރްދުން) ގެ ހޮސްޕިޓަލެއްގައި ކޮވިޑް-19 އަށް ފަރުވާ ހޯދަމުން ދިޔަ ބަލިމީހުންނަށް ބޭނުންވާ އޮކްސިޖަން ހުސްވުމުގެ ސަބަބުން 7 މީހަކު މަރުވުމާ ގުޅިގެން އެ ގައުމުގެ ހެލްތު މިނިސްޓަރު ޑރ. ނަޒީރު ޢުބައިދާތު އިސްތިއުފާދެއްވައިފިއެވެ.
މީހުން މަރުވީ ވެރިރަށް ޢައްމާންގެ ހުޅަނގުގައި ހުންނަ އަލްޙުސައިން ސަލްޠު ނިއު ހޮސްޕިޓަލްގައި ކަމަށް ވާއިރު، އެ ހޮސްޕިޓަލް ކައިރިއަށް އެތައް ސަތޭކަ ބަޔަކު އެއްވެ ވަނީ އިހުތިޖާޖުކޮށްފައެވެ.
ހާދިސާގެ ކުޑަ އިރުކޮޅެއް ފަހުން ޢަބްދުﷲ ރަސްގެފާނު ވަނީ އެ ހޮސްޕިޓަލަށް ޒިޔާރަތް ކުރައްވައި އެތަނުގެ ކަންކަން ބެއްލެވުމަށް ފަހު ނުކުމެވަޑައިގެން، ބޭރުގައި އިހުތިޖާޖުކުރަން ތިބި މީހުންނާ ބައްދަލުކުރައްވައި ވާހަކަފުޅުދައްކަވާފައެވެ. އަދި ވަގުތުން އިސްތިއުފާދެއްވުމަށް ހޮސްޕިޓަލުގެ ޑިރެކްޓަރު ޑރ. ޢަބްދުއްރައްޒާޤޫ ޚަޝްމާން ވަގުތުން އިސްތިއުފާ ދެއްވުމަށް ރަސްގެފާނު އެދިވަޑައިގަތެެވެ.
މީސްމީޑިޔާގައި އާއްމުވެފައިވާ ވީޑިޔޯއިން ފެންނަ ގޮތުގައި ޢަބްދުﷲ ރަސްގެފާނު ހުންނެވީ ވަރަށް ބޮޑަށް ކޯފާވެފައެެެވެ. އަދި ހޮސްޕިޓަލުގެ ޑިރެކްޓަރާ މުޚާޠަބުކުރައްވައި "މިކަހަަލަ ކަމެއް ހިނގަންވީ ކީއްވެހޭ؟ މިއީ ބަލައިގަނެވޭނޭ ކަމެއް ނޫނޭ" ވިދާޅުވާ އަޑު އިވެއެެވެ.
އިސްތިއުފާދެއްވި ހެލްތު މިނިސްޓަރު ވިދާޅުވީ ހޮސްޕިޓަލުގެ އޮކްސިޖަން ހުސްވެފައި ވަނީ އިއްޔެ ހެނދު 6:00 އާ 7:00 އާ ދެމެދުގައި ކަމަށެވެ. "އަހަރެން އެކަމުގެ ފުރިހަމަ އަޚްލާޤީ މަސްއޫލިއްޔަތު އުފުލަން. އަހަރެން ވަނީ ބޮޑުވަޒީރަށް އިސްތިއުފާ ހުށަހަޅާފައި." ޢުބައިދާތު ވިދާޅުވިއެވެ.
ބޮޑުވަޒީރު ބިޝަރު އަލްޚަޞާވިނާ ވިދާޅުވިގޮތުގައި ހާދިސާ ދިމާވި ހޮސްޕިޓަލުގެ ވެރިޔާ މަގާމުން ދުރުކުރުމުގެ އިތުރަށް، ހޮސްޕިޓަލް ހުރި ބަލްޤާ ޕްރޮވިންސުގެ ސިއްހީ ޚިދުމަތާ ބެހޭ ވެރިޔާ ވެެސް ވަނީ ސަސްޕެެންޑުކޮށްފައެެވެ.
ނޭޝަނަލް އިންސްޓިޓިއުޓް އޮފް ފޮރެންސިކްސްގެ ވެރިޔާ ޢަދްނާން ޢައްބާސް މައުލޫމާތުދެއްވި ގޮތުގައި އޮކްސިޖަން ނުލިބިގެން މަރުވެފައި ވަނީ ވެލްޓިލޭޓަރުގައި ފަރުވާދެމުން ދިޔަ އުމުރުން 40 އަހަރުން މަތީގެ 4 ފިރިހެނުންނާއި 3 އަންހެނުންނެވެ.
ޖޯޑަންގައި މިހާތަނަށް 4 ލައްކަ 65 ހާސް މީހުން ކޮވިޑް-19 އަށް ޕޮޒިޓިވްވެފައި ވާއިރު، އެ ބަލީގައި 5 ހާސް 200 އަށްވުރެ ގިނަ މީހުން ވަނީ މަރުވެފައެވެ.
ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) ގެ ކޮވެކްސް ފެސިލިޓީގެ ދަށުން ޖޯޑަންއަށް ވަނީ 1 ލައްކަ 40 ހާސް ޑޯޒް އާސްޓްރާޒެނެކާ ވެކްސިން ލިބިފައެވެ.
