ރައީސް އަބްދުﷲ ޔާމީންގެ ވެރިކަމަކީ "އޮތުން މޮޅު ވެރިކަމެއް" ކަމަށް ޕީޕީއެމްގެ ނައިބު ލީޑަރ ފޮނަދޫ ދާއިރާގެ މެމްބަރު އަބްދުﷲ އަބްދުއްރަޙީމް ވިދާޅުވެއްޖެއެވެ.
ރައީސް ޔާމީން އަރިހުގައި ރ. އަތޮޅަށް ކުރައްވާ ދަތުރުފުޅުގައި ބޭއްވި ޖަލްސާއެއްގައި ވާހަކަ ދައްކަވަމުން އަދުރޭ ވިދާޅުވީ ރައީސް ޔާމީންގެ ވެރިކަމާ ދެކޮޅަށް އިދިކޮޅު ފަރާތްތަކުން ކުރަމުންދާ މަސައްކަތް ނާކާމިޔާބުވެ ރައީސް ޔާމީންއަށް ނަސްރު ލިބެމުން އަންނަ ކަމަށެވެ.
"އެއީ އެވެރިކަމަކީ އޮތުން މޮޅު ވެރިކަމެއް ކަމުގެ ހެއްކެއް" އަދުރޭ ވިދާޅުވިއެވެ.
އަދުރޭ ވިދާޅުވީ ރައީސް ޔާމީންގެ ވެރިކަން ފަދަ އޮތުން މޮޅުވެރިކަމަކަށް ރައްޔިތުން "އުރެދިއްޖެނަމަ" ރަތުގެ އިންޒާރެއް އަންނާނެކަން ކަށަވަރު ކަމަށެވެ.
"މިފަދަ ވެރިކަމަކަށް ކަތުން އުރެދިއްޖެއްޔާ ރަތުން އިންޒާރު ދައްކާނެކަން އެއީ ޝައްކެތް ހުރިކަމެއްނޫން" އަދުރޭ ވިދާޅުވިއެވެ.
މިވާހަކަތައް އަދުރޭ ދެއްކެވީ ރާއްޖޭގެ ކުރީގެ މަޝްހޫރު ލަވަކިޔުންތެރިޔާ ނައިފަރު ދޮހޮއްކޮގެ ލަވައެއްގެ ކަޑިއެއް ބޭނުން ކުރައްވައި އެ ޅެންބައިތުގައި ބުނެފައިވާ ވާހަކަތަކަށް އިޝާރާތް ކުރައްވައެވެ.
މިޖަލްސާގައި ވާހަކަ ދައްކަވަމުން އަދުރޭ ވިދާޅުވީ ރައީސް ޔާމީނަކީ ރައްޔިތުންގެ ތެރެއަށް ނުކުމެވަޑައިގެން، ރައްޔިތުންނާ އެއްހަމައެއްގައި ހުންނަވައިގެން ވެރިކަން ކުރައްވާ ބޭފުޅެއް ކަމަށެވެ. އަދި ރައީސް ޔާމީން ވެރިކަން ކުރައްވަނީ ރައްޔިތުންގެ ޚިޔާލާއި އިޙްސާސްތައްވެސް ހޯއްދަވައިގެން ކަމަށާއި މިފަދަ ޒަމާނެއް އަދި ނާންނަ ކަމަށެވެ.
