ނޭޕާލުގައި އުވާލާފައިވާ ގާނޫނުހަދާ މަޖިލިސް އިއާދަކުރުމަށް އެގައުމުގެ ސުޕްރީމް ކޯޓުން އަމުރުކޮށްފިއެވެ. ނޭޕާލުގެ އެންމެ މަތީ ކޯޓުން މިއަދު ނެރުނު ތާރީޚީ އަމުރާއެކު، ގާނޫނުހަދާ މަޖިލިސް އުވާލައި، އަވަސް އިންތިޚާބެއް ބޭއްވުމަށް ބޮޑުވަޒީރު ކަޑްގާ ޕްރަސާދް ޝަރްމާ އޮލީ ދެ މަސްދުވަސް ކުރިން ނިންމެވި ނިންމެވުން ބާޠިލުވީއެވެ.
ކޯޓުގެ މި އަމުރާއެކު މިހާރުވެސް ސިޔާސީ ހަލަބޮލިކަމުގެ ތެރޭގައި އޮތް ނޭޕާލުގެ ސިޔާސީ މަސްރަހު އިތުރަށް ހަލަބޮލިވެގެން ދާނެކަމަށް ބެލެވެއެވެ.
275 މެންބަރުން ތިއްބަވާ ގާނޫނުހަދާ މަޖިލިސް އުވާލުން ބާޠިލުކުރަން ސުޕްރީމް ކޯޓުގެ ޗީފް ޖަސްޓިސް ޗޯލެންދްރަ ޝަމްޝޭރްގެ ރިޔާސަ ބަލަހައްޓަވާ ފަސް ފަނޑިޔާރުގެ ބެންޗުން ނިންމެވީ، ބޮޑުވަޒީރުގެ އެފިޔަަވަޅަކީ ގާނޫނު އަސާސީއާ ޚިލާފު ފިޔަވަޅެއްކަން ކަނޑައަޅައިދިނުން އެދި ސުޕްރީމްކޯޓަށް މަދުވެެގެން 13 ފަރާތަކުން ހުށަހަޅާއިވާ ހުށަހެޅުންތައް ބެއްލެވުމަށް ފަހުގައެވެ. އެ ހުށަހެޅުންތަކުގެ ތެރޭގައި ވެރިކަންކުރާ ކޮމިއުނިސްޓް ޕާޓީގެ ޗީފް ވިޕް ދޭވް ޕްރަސާދް ގްރުންގެ ހުށަހެޅުއްވުންވެސް ހިމެނެއެވެ.
"އިއްޒަތްތެރި ފަނޑިޔާރުން ވަނީ ހައުސް އޮފް ރެޕްރެޒެންޓެޓިވްސް އުވާލަން (ބޮޑުވަޒީރު) ހުށަހެޅުއްވި ހުށަހެޅުއްވުމާ، ގާނޫނުހަދާ މަޖިލިސް އުވާލަން (ރައީސު ނެރުއްވި) އަމުރު ގަބޫލުނުކުރައްވައި ރައްދުކުރައްވާފައި." ސުޕްރީމް ކޯޓުގެ ނިންމެވުމުގެ ތަފްސީލު ދެއްވަމުން ކޯޓުގެ ފަރާތުން ވާހަކަފުޅުދެއްކެވި ބަދްރަކާލީ ޕޮކަރެލް ވިދާޅުވިއެވެ.
ކޯޓުގެ އަމުރުގައި ވަނީ ބޮޑުވަޒީރުގެ ނިންމެވުމަކީ "ގާނޫނު އަސާސީއާ ޚިލާފު" ނިންމެވުމަށް ކަނޑައަޅައި، 13 ދުވަހުގެ ތެރޭގައި އުވާލި ގާނޫނުހަދާ މަޖިލިސް އިއާދަކޮށް އެ މަޖިލީހުގެ ޖަލްސާއެއް ބޭއްވުމަށް ސަރުކާރުގެ މައްޗަށް އަމުރުކޮށްފައެވެ.
ބޮޑުވަޒީރު އޮލީގެ އެދިވަޑައިގަތުމަށް 20 ޑިސެންބަރު 2020 ގައި ގާނޫނުހަދާ މަޖިލިސް އުވާލައްވައި 30 އެޕްރީލް އަދި 10 މޭ ގައި އިންތިޚާބު ބޭއްވުމަށް ރައީސު ބިދްޔާ ދޭވް ބަންޑާރީ ނިންމެވުމާއެކު ނޭޕާލު ވަނީ ސިޔާސީ ހަލަބޮލިކަމުގެ ތެރެއަށް ވެއްޓިިފައެވެ. ބޮޑުވަޒީރު އޮލީގެ އަމިއްލަފުޅު ޕާޓީ، ކޮމިއުނިސްޓް ޕާޓީގެ ތެރޭގައިވެސް ވަނީ ބައިބައިވުން އުފެދިފައެވެ.
ސަރުކާރުގެ ބައެއް އިދާރާތަކަށް މެންބަރުން އައްޔަންކުރަން އޭނާ ކުރައްވާ މަސައްކަތްޕުޅަށް ވެރިކަންކުރާ ޕާޓީން އޭނާއަށް އެއްބާރުލުން ނުދީ ސަރުކާރު ހިންގުމަށް ހުރަސްއަޅާތީ ގާނޫނުހަދާ މަޖިލިސް އުވާލުން ގޮެތެއް ނެތްކަމަަށް ވިދާޅުވެ ބޮޑުވަޒީރު އޮލީ ފާއިތުވި މަހު ސުޕްރީމް ކޯޓަށް ފޮނުއްވި ސިޓީ ސުޕްރީމްކޯޓުން ގަބޫލުނުކުރިއެވެ.
"ހައުސް އޮފް ރެޕްރެޒެންޓެޓިވްސް ވަނީ އިއާދަކުރެވިފައި. އެ މަޖިލީހުގެ މަސައްކަތްކުރިއަށް މިހާރު ކުރިއަށް ގެންދެވޭނެ." ކޯޓުގެ އަމުރުގައި ވެއެވެ.
ކޯޓުގެ އަމުރަށް ފަހު، 2017 ވަނަ އަހަރު ބޭއްވި އިންތިޚާބު ކޮމިއުނިސްޓް ޕާޓީން ބޮޑުތަފާތަކުން ކާމިޔާބުކޮށް، 2018 ވަނަ އަހަރު ބޮޑުވަޒީރުކަމަށް ވަޑައިގަތް ކޭ ޕީ ޝްރްމާ އޮލީގެ އިތުބާރުނެތްކަމުގެ މައްސަލަ ގާނޫނުހަދާ މަޖިލީހަށް ހުށަހެޅިގެން ދާނެކަމަށް ބެލެވެއެވެ.
