އާއްމު ކޮމެޓީން ބަލަމުންދާ މައްސަލައަކާ ގުޅިގެން ރައްޔިތުންގެ މަޖިލީހުގެ ސާޖަންޓް އެޓް އާމްސް މުޙައްމަދު ޙަލީމް ސަސްޕެންޑްކޮށްފިއެވެ.
ރައްޔިތުންގެ މަޖިލީހުގެ ކޮމިއުނިކޭޝަން ޑިރެކްޓަރ ޙަސަން ޒިޔާއު ވިދާޅުވީ އާއްމު ކޮމެޓީން ބަލަމުންދާ މައްސަލައެއްކަމަށް ވުމުން ސާޖަންޓް އެޓް އާމްސް ސަސްޕެންޑް ކޮށްފައިވަނީ ކީއްވެގެެންކަން ހާމަ ނުކުރެއްވޭނެކަމަށެވެ. ނަމަވެސް އޭނާ ސަސްޕެންޑްކުރީ އާއްމު ކޮމެޓީން ބަލަމުންދާ ސާޖެންޓް އެޓް އާމްސްއާ ގުޅުން ހުރި މައްސަލައަކާ ގުޅިގެންކަން ކަށަވަރުކޮށްދެއްވިއެވެ.
ރައްޔިތުންގެ މަޖިލީހުގެ ސާޖަންޓް އެޓް އާމްސް ސަސްޕެންޑްކޮށްފައިވަނީ މުއްދަތެއް ނެތް ގޮތަށެވެ.
ރައްޔިތުންގެ މަޖިލީސް ކުރާގޭގައި ޖާސޫސް ކޮށް އަޑުއަހާ (ބަގްކުރާ) އާލާތެއް ހަރުކުރަން އުޅުނު މައްސަލަ އެއް މިދިޔަ ނޮވެމްބަރުގައި ވަނީ ފެންމަތުވެފައެވެ. އެމައްސަލަ ފުލުހުންނަށް ހުށަނާޅައި މަޖިލީހުގެ ސަލާމަތީ ޚިދުމަތްތަކާބެހޭ ކޮމެޓީއަށް ފޮނުވުމަށް އޭރު ވަނީ ނިންމައިފައެވެ.
ރައްޔިތުންގެ މަޖިލީސް ކުރާގޭގައި ޖާސޫސް ކޮށް އަޑުއަހާ (ބަގްކުރާ) އާލާތެއް ހަރުކުރަން އުޅުނު މައްސަލަ މަޖިލީހުގެ ރައީސް ހާމަކުރައްވައިފައިވަނީ ނޮވެމްބަރު 23 ވަނަ ދުވަގު ބޭއްވި މަޖިލީހުގެ ޖަލާސާގައި ރިޔާސަޔިތުން އަންގާ އެނގުމެއްގެ ގޮތުގައެވެ. މިކަން މަޖިލީހުގެ ރައީސްގެ ސަމާލުކަމަށް ގެނެސްދެއްވީ ސާރޖެންޓް އެޓް އާރމްސްކަމަށް ވެސް މަޖިލީހުގެ ރައީސް، މުޙައްމަދު ނަޝީދު ވިދާޅުވިއެވެ.
މަޖިލީހުގެ ކޮމެޓީކޮޓަރިއަކާއި މަޖިލީހުގެ ރައީސާއި ނާއިބް ރައިސްގެ ކޮޓަރި ކޮޅުގައި ވެސް ސިއްރުން އަޑު އެހޭނެ ޑިވައިސްތަކެއް ހަރުކުރުމަށް މަސައްކަތްކުރިކަމަށް ވިދާޅުވިއެވެ. ނަމަވެސް އެކަން ނާކާމިޔާބު ކޮށްފައިވާކަމަށް ވަނީ ވިދާޅުވިއެވެ.
ޖާސޫސީ އާލާތްހަރުކުރުމަށް މަސައްކަތްކުރީ ފުލުހެއްކަމަށްވެސް މަޖިލީހުގެ ރައީސް ވިދާޅުވިއެވެ. އެކަން ކުރަން އުޅުނީ މަޖިލީހުގެ އަންހެން މުވައްޒަފަކަށް ގުޅައިގެން ކަމަށް ވެސް ވިދާޅުވިއެވެ. މަޖިލީހުގެ ސެކިއުރިޓީންނަށް އެ މައުލޫމާތު ދިނީ އެ އަންހެން މުވައްޒަފު ކަމަށް މަޖިލީހުގެ ރައީސް ވަނީ ވިދާޅުވެފައެވެ.
