ދުނިޔޭގައި އެންމެ ފުޅާ ދާއިރާއެއްގައި މަސްތުވާތަކެތީގެ ވިޔާރިކުރާ އެކަކު ކަމުގައި، އަދި އޭޝިޔާގައި މަސްތުވާތަކެތީގެ ވިޔަފާރީގެ އެންމެ ބޮޮޑު ވިއުގަ ކޮންޓުރޯލުކުރާ ކަމުގައި ބެލެވޭ، ޒޭ ޗީ ލޮޕް ހައްޔަރުކޮށްފިއެވެ. ނެދަލޭންޑްސްގެ ފުލުހުން މެކްސިކޯގެ މަސްތުވާތަކެތީގެ ބޮޑާ ގުޅުވައި 'އޭޝިޔާގެ އެލް ޗާޕޯ' ގެ ނަމުން މަޝްހޫރުވެފައިވާ، ޒޭ އެމްސްޓަޑޭމްގައި ހައްޔަރުކޮށްފައި ވަނީ އޮސްޓްްރޭލިޔާ ފުލުހުން ފޯރުކޮށްދިން މައުލޫމާތުގެ އެހީގައެވެ.
އޮސްޓްރޭލިޔާ ފުލުހުންގެ ތަހުގީގަށް އެނގިފައިވާ ގޮތުގައި ޗައިނާއަށް އުފަން ކެނެޑާގެ ރައްޔިތެއް ކަމުގައިވާ ޒޭ ޗީ ލޮޕްގެ ވިއުގައި އޭޝިޔާ-ޕެސިފިކް ސަރަހައްދުގައި އަހަރަކު 70 ބިލިއަން އެމެރިކާ ޑޮލަރުގެ މަސްތުވާތަކެތީގެ ވިޔަފާރި ކުރެއެވެ.
އޮސްޓްރޭލިޔަން ފެޑެރަލް ޕޮލިސްއިން ބުނާ ގޮތުގައި ޒޭގެ ވިއުގައި އަހަރަކު އެތައް ޓަނެއްގެ މެތަމްފެޓަމިންއާއި އެެހެނިހެން މަސްތުވާތަކެތި ދެކުނު އިރުމަތީ އޭޝިޔާގެ ގޭންގުތަކާއި، ޖަޕާނުގެ ޔަކުޒާއާއި، އޮސްޓްރޭލިޔާއާއި ނިއުޒީލޭންޑުގެ ބައިކީ ގޭންގުތަކަށް ފޯރުކޯށްދެއެވެ. މި ވިއުގައިން އޮސްޓްރޭލިޔާއަށް ހެރޮއިންއާއި މެތަމްޕެޓަމިން އެތެރެކުރުމު މައްސަލައިގައި މިހާރުވެސް 27 މީހަކު ހައްޔަރުކޮށް ތަހުގީގުކުރަމުން އެބަދެއެވެ.
އެމްސްޓަޑޭމްގެ ފުލުހުުން ބުނި ގޮަތުގައި އެެމްސްޓަޑޭމްގެ ސްކިފޯލް އެއާޕޯޓުގައި ޒޭ ހައްޔަރުކޮށްފައިވަނީ މާބޮޑު ކުރިމަތިލުމަކާ ނުލައެވެ. އަދި އެމްސްޓަޑޭމްގެ ކޯޓަކަށް އޭނާ ހާޒިރުކުރުމަށް ފަހު އޮސްޓްރޭލިޔާއަށް ފޮނުވާލެވޭނެއެވެ.
"އޭނާއަކީ އެންމެ ބޭނުންވާ މީހުންގެ ލިސްޓުގައި ކުރިންވެސް އޮތް މީހެއް. އޭނާ ހައްޔަރުކުރީ ލިބުނު ޖާސޫސީ މައުލޫމާތެއްގެ އެހީގައި." ނެދަލޭންޑްސް ފުލުުހުންގެ ތަރުޖަމާނު ތޯމަސް އެލިންގް ވިދާޅުވިއެވެ.
ހަތަރު ގައުމެއްގެ މަސްތުވާތަކެތި ކޮންޓުރޯލުކުރުމާ ބެހޭ އިދާރާއިން ކުރިން ތައްޔާރުކޯށްފައި އޮތް ރިޕޯޓަކުން އެނގޭ ގޮތުގައި ކެނެޑާގެ ޓޮރޮންޓޯގައި ދިރިއުޅޭ ޒޭ ފަހަކަަށް އައިސް ދުވަސްތައް ހޭދަކުރަމުން ދިޔައީ ހޮންކޮންގާއި، މަކާއޯއާއި، ޓައިވާނުގައެވެ.
"ޒޭ ޗީ ލޮޕް އަކީ އެލް ޗާޕޯއާ އެއް 'ލީގެއްގެ' މީހެއް ނުވަތަ ޕަބްލޯ އެސްކޮބާއާ އެއްވަރު ވުންވެސް ގާތް." ޒޭއާ ބެހޭގޮތުން 2019 އަހަރު ލިއުއްވި މަޒުމޫނެއްގައި އދ.ގެ ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ)ގެ ދެކުނު އިރުމަތީ އޭޝިޔާ އަދި ޕެސިފިކްގެ މަންދޫބު ޖެރެމީ ޑަގްލަސް ވިދާޅުވެފައި ވެއެވެ.
