ރައީސް ޔާމީން މިނިވަން ކުރުމަށް ސީދާ ޙަރަކާތަށް ނުކުތުމަށް ގޮވާލާ އިދިކޮޅު ކޯލިޝަނުން ޤަރާރެއް ފާސްކޮށްފިއެވެ. މިއަދު ޕީޕީއެމް، ޕީއެންސީ ކޯލިޝަންގެ ކައުސިލުން މިޤަރާރު ފާސްކޮށްފައިވަނީ ބައްދަލުވުމަށް ވަޑައިގެން ތިއްބެވި މެމްބަރުންގެ އިިއްތިފާޤުންނެވެ.
މިއަދު އިކޮޅު ކޯލިޝަނުން ފާސްކުރި ޤަރާރުގައި ވަނީ މިމަހު އެކާވީސް ވަނަ ދުވަހު ހައިކޯޓުން ރައީސް ޔާމީންގެ އިސްތިއުނާފު މައްސަލައިގައި ކުރި ޙުކުމަކީ ޝަރުޢީ އަދި ޤާނޫނީ ހަމަތަކާ ޚިލާފަށް ސިޔާސީ ގޮތުން ކޮށްފައިވާ ހުކުމެއްކަމަށެވެ. ފަނޑިޔާރު ޙުޞައިން ޝަހީދުގެ ރަޢުޔަށް ބަލާއިރު ރައީސް ޔާމީންގެ މައްޗަށް އުފުލައިފައިވާ ދައުވާ އަކީ، އެދައުވާ އުފުލުނު ހިނދުން ފެށިގެން ވެސް ބާޠިލް ދައުވާއެެއްކަން އެނގޭކަމަށެވެ. ދައުވާ ސާބިތު ކުރުމަށް ހުށަހެޅި ހެކިތަކާއި ގަރީނާތަކަކި ވެސް އޭގެ ޒާތުގައިވެސް ބާޠިލް އެއްޗެތިކަމަށެވެ. އަދި އަޙުމަދު އަދީބާއި ޢަބްދުﷲ ޒިއަތުގެ ހެކި ބަހަކީ ބާތިލް ކުރަންޖެހޭ ފާސިގު ހެކިބަހެއްކަމަށެވެ. މުައައްވިޒު ރަޝީދު ޝަރީއަތުގައި ދޮގުހަދައިފައި ވާތީ އޭނާގެ ހެކިބަސް ޤަބޫލުނުކުރެވޭނެކަމަށެވެ. ރައީސްޔާމީނަށް ދައުވާ އުފުލައިފައިވަނީ ތަޙުޤީޤުގައި އެކުށަކާ ބެހޭގޮތުން ސުވާލުކޮށްފައިވާ ނުވާ ކުށަކާ ބެހޭގޮތުން ކަމަށެވެ. އަދި ޖިނާއީ އިޖްރާތުގެ ހަމަތަކާއި ސަރުޢީ އަދި ޤާނޫނީ ހަމަތަކާ ކިލާފަށް އެމައްސަލަ ބަލައި ކުށް ސާބިތުވާ ކަމަށް ނިންމައިފައިވާތީކަމަށެވެ.
އަނެއް ދެފަނޑިޔާރުންގެ ރަޢުޔު ބިނާކުރެއްވީ އަމިއްލަ މިނިވަން ރަޢުޔުއަށް ނޫންކަން އެނގޭކަމަށް ވެސް އިދިކޮޅު ކޯލިޝަނުން ފާސްކުރި ޤަރާރުގައި ބުނެއެވެ. އަދި އެދެ ފަނޑިޔާރުންގެ ރަޢުޔުގައި، އިސްތިއުނާފުކުރި ހުރިހާ ނުކުތާތަކަށް ބަލައިފައި ނެތްކަމަށެވެ. އަދި އިސްލާމީ ޝަރިޢަތާއި ގާނޫނުއަސާސީއާއި ޤާނުނުތަކާއި ސްޕަރީމްކޯޓާއި ހައިކޯޓްގެ ނިންމުތަކާއި ކުރިއަރައިފައިވާ ޤައުމުތަކުގައި އެބާވަތުގެ މައްސަލަތައް ނިންމި ގޮތާއި ބައިނަލް އަގްވާމީ މުއާހަދާތަކަށް ވެސް އެއްވެސް މިންވަރަކަށް ރިޢާޔަތް ކުރުމެއް ނެތި ދަށު ދަށު ކޯޓުގެ ހުކުމަށް ތާއިދު ކޮށްފައިވާތީކަމަށް ޤަރާރުގައިބުނެއެވެ.
ހައިކޯޓުން މައްސަލަ ނިންމުމުގައި ދިގުލައިގެން ގޮސްފައި ވަނީ ޖޭއެސްސީއާއި ސަރުކާރުގެ ނުފޫޒު މައްސަލައިގެ ތެރެއަށް ވަދެގެން ކަމަށް ޤަބޫލުކުރެވޭ ކަމަށް ޤަރާރުގައި ބުނެއެވެ. އަދި ޖިނާއީ އިޖުރާތުގެ ޤާނޫނުގައި މައްސަލަތައް ނިންމުމަށް ކަނޑައަޅައިފައިވާ މުއްދަތު ފަހަނަޅައި ގޮސްފައިވާތީ، އެޤާނޫނާ ވެސް ޚިލާފަށް ކަމަށް އެކޯލިޝަނުން ދެކޭކަމަށް ޤަރާރުގައި ބުނެއެވެ. މި ސަބަބުތަކަށްޓަކައި ރައީސް ޔާމީނަށް ދައުލަތުގެ ފަރާތުން ނުޙައްޤުން ކޮށްފައިވާ ހުކުމާއި އަދި އެޙުކުމަށް ތާއިދުކޮށް ހައިިކޯޓުން ކޮށްފައިވާ ޙުކުމަކީ ޝަރުޢީ އަދި ޤާނޫނީ ހަމަތަކާ ޚިލާފަށް ސިޔާސީ މަޤުޞަދެއް ޙާޞިލުކުރުމަށްޓަކައި ސަރުކާރުގެ ނުފޫޒާ އެއްގޮތަށް ކޮށްފައިވާ ޙުކުމެއް ކަމަށް އެކޯލިޝަނުން ދެކޭތީ، އެޙުކުމަކީ ކޯލިޝަނުން ބަލައިގަންނަ ޙުކުމެއް ނޫންކަމަށް ޤަރާރުގައި ބުނެއެވެ. އަދި ރައީސް ޔާމީން މިނިވަން ކުރުމަށް ސީދާ ޙަރަކާތައް ނުކުރުމަށް ކޯޅިޝަނުން ނިންމައި އެކަށައަޅައިފައިވާ ކަމަށް ޤަރާރުގައި ވެއެވެ.
މި ޤަރާރު ކައުންސިލަށް ހުށަހެޅީ އިދިކޮޅު ކޯލިޝަންގެ ލީޑަރޝިޕުންނެވެ. ޤަރާރު ފާސްކުރުމަށް ހުށަހެޅީ ކައުންސިލް މެންބަރު އިބްރާހީމް ޝަހީދެވެ. ތާއިދުކުރެއްވީ ކައުންސިލް މެންބަރު ހީނާ ވަލީދެވެ.
