ޢަދާލަތު ޕާޓީގެ ރައީސަކު ހޮވުމަށް ބާއްވާ އިންތިޚާބުގައި އެޕާޓީގެ މިހާރުގެ ރައީސް، ހޯމް މިނިސްޓަރ އިމްރާން ޢަބްދުﷲ އާ ވާދަކުރެއްވުމަށް މިހާރުގެ އިސްލާމިކް މިނިސްޓަރ ޑރ.އަޙްމަދު ޒާހިރު ޢަލީ ކުރިމަތިލައްވައިފިކަމަށް ޢަދާލަތު ޕާޓީން ހާމަކޮށްފިއެވެ.
އެޕާޓީން މިރޭ ނެރުނު ޢިއުލާނެއްގައިވަނީ ރައީސްކަމާއި ނައިބު ރައީސް ކަމުގެ މަޤާމަށް ކުރިމަލުމަށް ހުޅުވާލި މުހުލަތު ހަމަވީއިރު ކުރިމަތިލައްވާފައިވާ ބޭފުޅުންގެ ނަންފުޅުތައް ހާމަކޮށްފައެވެ. އެގޮތުން ކެނޑިޑޭޓުނަމްބަރު 1 ލިބިވަޑައިގެންފައިވަނީ އިސްލާމިކް މިނިސްޓަރ ޑރ.އަޙްމަދު ޒާހިރު ޢަލީއާއި އޭނާގެ ރަނިންމޭޓް އަޙްމަދު ނަޝީދަށެވެ. ކެންޑިޑޭޓު ނަމްބަރު 2 ލިބިވަޑައިގަތީ އެޕާޓީގެ މިހާރުގެވެސް ރައީސް އަދި ހޯމް މިނިސްޓަރ އިމްރާން ޢަބްދުﷲ އާއި އޭނާގެ ރަނިންމޭޓު އަޙްމަދު ޝަރީފަށެވެ.
ޢަދާލަތު ޕާޓީގެ ޢިއުލާނުގައިވަނީ އެ ޕާޓީގެ ދުސްތޫރުގެ 41.1 ވަނަ މާއްދާއާއި 41.3 ވަނަ މާއްދާގެ ދަށުން ޕާޓީގެ 3 ވަނަ ދައުރަށް ޕާޓީގެ ރައީސާއި ނައިބު ރައީސް ހޮވުމަށް ބާއްވާ އިންތިޚާބުގައި ވާދަކުރުމަށް ހުޅުވާލި ފުރުޞަތު ހަމަވީ މިމަހުގެ 21 ވަނަ ދުވަހުކަމަށެވެ.
ޢަދާލަތު ޕާޓީގެއިންތިޚާބު އޮންނަނީ މިމަހުގެ 30 ވާ ހޮނިހިރު ދުވަހުއެވެ. މި އިންތިޚާބުގައި ވޯޓުލުމުގެ ޙައްޤު ލިބިގެންވަނީ މިމަހުގެ 27 ވަނަ ދުވަހުގެ މެންދުރު 14:00ގެ ނިޔަލަށް ޢަދާލަތު ޕާޓީގެ މެންބަރެއްގެގޮތުގައި ރަޖިސްޓްރާ ބަލައިގަނެފައިވާ މީހުންނަށެވެ.
