ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމަށް ނުހައްގުން ދޭ އަނިޔާއަކަށް އެމަނިކުފާނަށް ތާޢީދުކުރާ އެތައް ހާސް ރައްޔިތުންނާއި އިދިކޮޅު ޕީޕީއެމްގެ ބިޔަލަޝްކަރުގެ އަޒުމް ގުޑުވައި ނުލެވޭނެ ކަމުގައި ވިދާޅުވެ ޕީޕީއެމްގެ ނާއިބް ރައީސް އަދި ރައްޔިތުންގެ މަޖިލީހުގެ ތ.ގުރައިދޫ ދާއިރާގެ މެމްބަރު މުހައްމަދު ޣައްސާން މައުމޫން ސަރުކާރަށް ފާޑުވިދާޅުވެއްޖެއެވެ.
މިހާރުގެ ސަރުކާރު ހިންގާ ކޯލިޝަންގައި ހިމެނޭ އެމްއާރުއެމްގެ ރައީސް އަދި ކުރީގެ ރައީސުލްޖުމްހޫރިއްޔާ މައުމޫންގެ ދަރިކަލުން ވިދާޅުވީ ރައީސް ޔާމީންގެ ފަހަތްޕުޅުގައި ސާބިތުކަމާއިއެކު ހުންނެވިކަމަށެވެ.
މަނީލޯންޑަރިންގެ ކުށް ސާބިތުވެގެން ރައީސް ޔާމީން ޖަލަށް ލުމަށް ދަށުކޯޓުންކުރި ހުކުމަށް އިއްޔެ ހައިކޯޓުންވަނީ ތާޢީދުކޮށްފައެވެ. މިއާގުޅިގެން ވެރިކަންކުރާ ޕާޓީއާއި ސަރުކާރަށް ތާޢީދުކުރާ މީހުންގެ ފުރައްސާރަވަނީ ރައީސްޔާމީނަށް ތާޢީދކުރާ މީހުންނާއި އިދިކޮޅު ޕީޕީއެމްއަށް އަމާޒުވެފައެވެ.
މިކަމަށް ރައްދު ދެއްވަމުން ގައްސާން ވިދާޅުވީ ރައީސް ޔާމީން ލިބިވަޑައިގަންނަވަނީ ނުހައްގު އަނިޔާކަމަށާ، އެމަނިކުފާނަކީ އެފަދަ ކަމަކުން ހިތްވަރުއެލި މާޔޫސްވެވަޑައިގަންނަވާނެ ބޭފުޅެއް ނޫންކަމަށެވެ.
ރައީސް ޔާމީންގެ މައްޗަށް ހިންގި ޝަރީޢަތަކީ ސީދާ ސަރުކާރުގެ ބާރާއި ނުފޫޒުން އެމަނިކުފާނު ސިޔާސީ މަސްރަޙުން އެކަހެރިކުރުމަށް ކޮށްފައިވާ ކަމެއްކަމަށް ޕީޕީއެމްއިން ތުހުމަތުކުރެއެވެ.
Raees Yameen ah dhevey nuhaggu aniya akun, emanikfaange adhi PPM ge biya lashkaruge hivvareh eluvaeh nuleveyne. Azumeh guduvaeh nuleveyne. Iraadha kurevviyya jalun minjukoh emanikfaan 2023 ga inthikhaabkoh, verikamah gennaanan. #FreePresidentYameenNow pic.twitter.com/vArpYV0vVS
— Mohamed Ghassan Maumoon (@mgmaumoon) January 22, 2021
މަނީ ލޯންޑަރިންގެ ކުށް ސާބިތުވެ ރައީސް ޢަބްދުﷲ ޔާމީންގެ މައްޗަށް ކްރިމިނަލް ކޯޓުން އިއްވާފައިވާ ޙުކުމަށް ހައިކޯޓުން ތާއީދުކޮށް ޙުކުމްކުރީ އިއްޔެއެވެ. އެއީ މިމައްސަލައިގެ އިސްތިއުޏާފު އަޑުއެހުން ނިންމާލިޔާ 4 މަސްދުވަސް ފަހެވެ.
ދަށުކޯޓްގެ ހުކުމް ދަމަހައްޓަން ނިންމެވީ މި މައްސަލަ ބެއްލެވި ތިން ފަނޑިޔާރުންގެ ތެރެއިން ދެ ފަނޑިޔާރުންގެ އަޣުލަބިއްޔަތުންނެވެ. މި މައްސަލައިގެ ބެންޗުގައި ހިމެނިވަޑައިގެންނެވީ ރިޔާސަތު ބެލެހެއްޓެވި ފަނޑިޔާރު ހުސެއިން މަޒީދާއި ފަނޑިޔާރު މުހައްމަދު ނިޔާޒާއި ފަނޑިޔާރު ހުސެއިން ޝަހީދެވެ. ދަށުކޯޓްގެ ނިންމުން ބާތިލުކުރަންޖެހޭކަމަށް ވިދާޅުވީ ފަނޑިޔާރު ޙުސައިން ޝަހީދެވެ.
