ރާއްޖެއަށް ބޭނުންވާވަރަށް ވެކްސިން ލިބޭނެކަމުގެ ޔަޤީންކަން އެބައޮތްކަމަށާ، އަމާޒަކީ އެންމެހައި ދިވެހި ރައްޔިތުންނާއި ރާއްޖޭގައި ދިރިއުޅޭ އެންމެންނަށް ކޮވިޑް-19އިން ރާއްކާތެރިވުމަށްދޭ ވެކްސިން ހިލޭ ދިނުންކަމުގައި ރައީސުލް ޖުމްހޫރިއްޔާ އިބްރާހީމް މުޙަންމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މިހެން ވިދާޅުވީ މިއަދު ފުރަތަމަ ފަހަރަށް ރާއްޖެއަށް ކޮވިޑް-19އިން ރައްކާތެރިވުމަށް ޖަހާ ވެކްސިން ގެނައުމާ ގުޅިގެން ޤައުމާއި މުޚާތަބު ކުރައްވައި ދެއްކެވި ވާހަކަފުޅުގައެވެ. އެމަނިކުފާނު ވިދާޅުވީ ކޮވިޑް-19ގެ ސަބަބުން ކުރިމަތިވި ދަތި އުނދަގޫ ދުވަސްތަކަށްފަހު މިއަދުމިއީ މިބަލިން ސަލާމަތްވުމުގެ އުންމީދު އައުވެގެންދާ ދުވަސްކަމަށެވެ.
ކޯވިޑް-19 އިން ރައްކާތެރިވުމަށް ޖަހާ ވެކްސިން ރާއްޖެއަށް ގެނައުމަށް ސަރުކާރުން ކުރައްވާ މަސައްކަތުގެ ދަށުން މިއަދު މިގެނައީ ފުރަތަމަ ޝިޕްމަންޓުގެ ވެކްސިންކަމުގައި ރައީސް ވިދާޅުވިއެވެ. މިއީ އިންޑިއާ ސަރުކާރުގެ ދީލަތި އެހީއެއްކަން އެމަނިކުފާނު ފާހަގަކުރެއްވިއެވެ.
މިއަދު 14:00ގައި ރައީސް ޤައުމާ މުޚާޠަބުކުރައްވައި ދެއްވި ކުރު ޚިޠާބުގައިވަނީ ދިވެހިރާއްޖެއަށް ބޭނުންވާ މިންވަރަށް ވެކްސިން ލިބޭނެކަމުގެ އުންމީދު އޮތްކަމަށާ، ރާއްޖޭގައި ދިރިއުޅޭ އެންމެންނަށް ސަރުކާރުގެ ފަރާތުން ހިލޭ ވެކްސިން ޖަހާނެކަމުގެ ޔަޤީންކަން ދެއްވާފައެވެ. ޚިޠާބު ނިންމަވާލެއްވީ ކޮވިޑް-19އިން ރައްކާތެރިވުމަށް މިހާތަނަށްވެސް އަޅަމުންއަންނަ ފިޔަވަޅުތައް އެޅުމަށް ރައްޔިތުންނަށް އިލްތިމާސްކުރައްވަމުންނެވެ.
އެގޮތުން ޞިއްޙީ އިދާރާތަކުން ދެއްވާ އިރުޝާދަށް ތަވާވުމަށާއި މުޖުތަމަޢުގެ ތެރޭގައި އުޅޭއިރު އެކަކު އަނެކަކާ ގައިދުރުކަން ބެހެއްޓުމަށާއި، ގިނަގިނައިން އަތްދޮވެ ސާފުކުރުމަށް އިލްތިމާސްކުރެއްވިއެވެ.
