އެމެރިކާގެ އާ ރައީސު މި މަހުގެ 20 ވާ ބުދަ ދުވަހު މެންދުރު 12 ޖަހާއިރު (ރާއްޖޭގަޑިން ބުދަ ދުވަހުގެރޭ 10 ޖަހާއިރު) މަގާމުގެ ހުވައިކުރައްވައި ރައީސުކަމާ ހަވާލުވެވަޑައިގަންނަވާނެއެެެވެ. އާއްމުގޮތެއްގައި ރިޔާސީ ހުވައިކުރުމުގެ ރަސްމިއްޔާތު އޮންނަނީ އާދަޔާއި ޚިލާފު ސަލާމަތީ ފިޔަވަޅުތަކެއް ނެތި ކަމަށް ވިޔަސް މިފަހަރު މި ރަސްމިއްޔާތަށް މިވަނީ ޖަނަވަރީ 6 ގައި ހިނގައި ދިޔަ ހަމަނުޖެހުންތަކުގެ ހިޔަނި އެޅިފައެވެ.
ރައީސު ޓްރަމްޕަށް ތާއީދުކުރާ ކަނާތުފިޔައިގެ މީހުން ޖަނަވަރީ 6 ގައި ކޮންގްރެސް އިމާރާތަށް ވަދެގަތުން ފަދަ އަަމަލެއް ތަކުރާރުވިޔަ ނުދިނުމަށްޓަކައި ވޮޝިންޓަންގެ މެދުތެރެ ވަނީ ކުއްލި ހާލަތަކަށް ގެނެސް ލޮކްޑައުންކޮށްފައެވެ. އަދި ބައިޑަން ހުވައިކުރެއްވުމުގެ ރަސްމިއްޔާތުގެ ސަލާމަތީ ކަންކަން ބެލެހެއްޓުމަށް ނޭޝަނަލް ގާޑްސް ސިފައިންގެ 20 ހާސް މީހުން ނެރުމަށް ވަނީ ހަމަޖެހިފައެވެ.
ވޮޝިންޓަން ފުލުހުންގެ ވެރިޔާ ރޮބަޓް ކޮންްޓީ ވިދާޅުވި ގޮތުގައި، ކޮންގްރެެސްގެ އިމާާރާތް، ކޮޕިޓޯލް ބިލްޑިންގަށް، ވަދެގަތްދާ އެއް ހަފުތާ ފަހުން ސަލާމަތީ ބާރުތަކަށް ވަނީ "ސަލާމަތީ ބޮޑު ނުރައްކަލަކާ" ކުރިމަތިލާން ޖެހިފައެވެ.
ރައީސު ޓްރަމްޕް އަޒުލުކުރުމުގެ އިޖުރާއާތު ކުރިއަށް ގެންދަން ގާނޫނުހަދާ މަޖިލީހު ތިރީގެ، ހައުސް އޮފް ރެޕްރެޒެންޓެޓިވްސްއިން ނިންމިތާ އެއް ދުވަސް ފަހުން ވޮޝިންޓަންގެ މެދުތެރޭގައި ވައިޓް ހައުސްއާއި ކެޕިޓަލް ބިލްޑިންގް ހިމެނޭ ސަރަހައްދު ވަނީ ދަލާއި ނަރުދަލާއި ކަށިނަރު ދަމައި ބަންދުކޮށްފައެވެ. އަދި ދުއްވާ ތަކެއްޗަށް އެ ސަަރަހައްދަށް ނުވަދެވޭ ގޮތް ހަދާފައެވެ. ނޫސްވެރިޔަ ބުނި ގޮތުގައި އެ ސަހަރައްދު މިހާރު ސިފަކުރެވެނީ ބަޣުދާދުގެ 'ގްރީން ޒޯން' ގެ ގޮތުގައެވެ.
ސަލާމަތީ ކަންކަން ބެލެެހެއްޓުން ހަވާލުވެފައިވާ ސީކްރެޓް ސާވިސްއިން ވަނީ ހުވައިކުުރުމުގެ ރަސްމިއްޔާތު އޮންނަ ދުވަހު ވައިޓް ހައުސްއާއި، ކެޕިޓޯލް ބިލްޑިންގާއި، ލިންކަން މެމޯރިއަލްއާއި، ވޮޝިންޓަން މޮނިއުމެންޓް ހިމެނޭ ނޭޝަނަލް މޯލް ސަހަރައްދު އެކުގައި އާއްމުންނަށް ބަންދުކުރުމަށް ނިންމާފައެވެ. މިއީ ރިޔާސީ ހުވައިކުރުމުގެ ރަސްމިއްޔާތު ބެލުމަށް އާއްމު ގޮތެއްގައި އެތައް ހާސް ބަޔަކު، އަދި ބައެެއް ފަހަރު ލައްކައިން މީހުން އެއްވާ ތަނެކެވެ.
އޮފިޝަލުން އިންޒާރުދެއްވާ ގޮތުގައި ޓްރަމްޕަށް ތާއީދުކުރާ މީހުންގެ ތެރޭން ކަނާތުފިޔައިގެ ހައްދުފަަހަނައަޅާފައިވާ މީހުން ހަތިޔާރާއި، އަތުބޮން ފަދަ ތަކެއްޗާއެކު ވޮޝިންޓަނަށް ވަންނަން މަސައްކަތްކުރުމުގެ ބިރު އެބައޮތެވެ.
ރައީސު ޓްރަމްޕް އަދިވެސް ގެންދަަވަނީ "އިންތިޚާބު ވަގަށް ނަގާފައި" ވާކަމަށް ވިދާޅުވެ ނަތީޖާ ގަބޫލުފުޅުކުރެއްވުމަށް ދެކޮޅު ހައްދަވަަމުންނެވެ. އަދި ޓްރަމްޕް ވަނީ ޖޯ ބައިޑަން ހުވައިކުރެއްވުމުގެ ރަސްމިއްޔާތަށް ވަޑައިނުގަންވަންވެސް ނިންމަވާފައެވެ. އެހެންކަމުން، މިއީ ފާއިތުވި 150 އަހަރުގެ ތެރޭގައި އެމެރިކާގެ އާ ރައީސު ހުވައިކުރެއްވުމުގެ ރަސްމިއްޔާތަށް ދައުރު ނިމޭ ރައީސު ވަޑަނުގަންނަވާ ފުރަތަމަ ފަހަރަށް ވާނެއެވެ. އެންމެ ފަހުން މިފަދައިން އަމަލުކުރެއްވީ 17 ވަނަ ރައީސު އޭނާ ވަނީ 20 ޖަނަވަރީ 1869 ގަައި އޭނާގެ ފަހުން ރައީސުކަމާ ހަވާލުވެވަޑައިގަތް ރައީސު އުލީސެސް ގްރާންޓް ހުވައިކުރެއްވުމުގެ ރަސްމިއްޔާތަށް ވަޑައިގަތުމަށް ދެކޮޅުހައްދަވާފައެވެ. އޭނާ ހުންނެވީ ވައިޓް ހަައުސްގައެވެ.
