މުސްލިމް ތިން ގައުމުކަމަށްވާ ޕާކިސްތާން، ތުރުކީ އަދި އަޒަރްބައިޖާނުން ތިން ގައުމުގެ ގުޅުން އިތުރަށް ބަދަހިކޮށް، ތިން ގައުމުގެ މަސްލަހަތު ހުރި ކަންކަމުގައި ގުޅިގެން މަސައްކަތްކުރުމަށް އެއްބަސްވެއްޖެއެވެ. މިކަމަށް ތިން ގައުމުން އެެއްބަސްވަނީ އިސްލާމްއާބާދުގައި އިއްޔެ ކުރިއަށް ތިން ގައުމުގެ މަޝްވަަރާތަކުގެ ދެވަނަ ބައްދަލުވުމުގައެވެ.
މި މަޝްވަރާތަކުގައި ބައިވެރިވެވަޑައިގެންފައި ވަނީ ޕާކިސްތާނުގެ ފޮރިން މިނިސްޓަރ ޝާހް މަޙްމޫދު ޤުރައިޝީ، ތުރުކީގެ ފޮރިން މިނިސްޓަރ މައުލޫދު ޖާވިޝްއޮގްލޫ އަދި އަޒަރްބައިޖާންގެ ފޮރިން މިނިސްޓަރ ޖޭހުން ބައިރަމޯވްއެވެ.
ތިން ގައުމުގެ މަޝްވަރާތައް ނިންމާލާފައިވަނީ 'އިސްލާމްއާބާދު ޑިކްލަރޭޝަން' ގެ ނަމުގައި ގަރާރެއް ނެރުމަށް ފަހުއެވެ. އޭގައި ވާގޮތުން ތިން ގައުމުންވެސް ވަނީ ތިން ގައުމުގެ މަސްލަހަތާ ގުޅިފައިވާ ހުރިހާ ކަމެއްގައި ގުޅުން އިތުރަަށް ބަދަހިކުރަން ބޭނުންވާކަަން ހާމަކޮށްފައެވެ. އޭގެ ތެރޭގައި ސިޔާސީ، އިސްތިރާޖީ، ވިޔަފާރި، އިގްތިސާދީ، ސުލްހައާއި އަމަންއަމާންކަން، ސައިންސާއި ޓެކްނޮލޮޖީ އަދި ސަގާފީ ދާއިރާތައް ހިމެނެއެވެ.
"ބޭރު ގައުމުތަކުން އެހީތެރިވެދީގެން ކުރިއަށްދާ ޓެރަރިޒަމްގެ އަމަލުތަކުން" ތިން ގައުމަށް ލިބެމުންދާ ގެއްލުމާމެދު ތިންގައުމުން މި ބައްދަލުވުމުގައި ކަންބޮޑުވުން ފާޅުކޮށްފައި ވެއެެެވެ.
އަދި ދުނިޔޭގެ ކަންކޮޅުތަކުގައި އުޅެމުންދާ މުސްލިމުންނާ ދެކޮަޅަށް ހިންގޭ އިންސާނިއްޔަތާ ޚިލާުފު އަމަލުތައް ކުށްވެރިކޮށް، އިސްލާމްދީނާ މެދު ނަފްރަތު އުފެއްދުމަށް ހިންގޭ އަމަލުތަކާއި، މުސްލިމުންގެ ބައި މަދު ގައުމުތަކުގައި އެބައިމީހުންނާ މެދު ނާއިންސާފުން ކަންކުރުންވެސް ތިން ގައުމުން ވަނީ ކުށްވެރިކޮށްފައެެެވެ.
މި ބައްދަލުވުމަށް ފަހު އަޒަރްބައިޖާންގެ ފޮރިން މިނިސްޓަރ ވަނީ އާމީނިޔާގެ އަތްދަށުން ނަގޯރްނޯ ކަރަބާޚް މިނިވަންކުރުމަށް އަޒަރްްބައިޖާނުން ކުރި މަސައްކަތުގައި ޕާކިސްތާނާއި ތުރުކީން ދިން އެހީތެރިކަމަށް ޝުކުރުއަދާކުރައްވާފައެވެ. އަދި އެ ސަރަހައްދު އަލުން ބިނާކުރުމުގައި ޕާކިސްތާނާއި ތުރުކީގެ ކުންފުނިތަކުން ބައިވެރިވުމަށް ގޮވައިލައްވާފައެވެ.
