އެމެރިކާގެ ތާރީޚުގައި އެ ރައީސަކު އަޒުލުކުރުމުގެ އިޖުރާއާތު (އިޕްމީޗްމެންޓް) ދެފަހަރު ކުރިއަށް ގެންދިޔަ ފުރަތަމަ ރައީސަކަށް ޑޮނާލްޑް ޓްރަމްޕް ވެވަޑަައިގެންފިއެެެވެ. އެމެރިކާގެ ގާނޫނުހަދާ މަޖިލީހުގެ ތިރީގެ، ހައުސް އޮފް ރެޕްރެޒެންޓެޓިވްޒް (ހައުސް) އިން އިއްޔެވަނީ ކޮންގްރެސްގެ އިމާާރާތަށް ހަމަލާދިނުމަށް އޭނާއަށް ތާއީދުކުރާ މީހުންނަށް ހިތްވަރުދެއްވުމުގެ ކުށުގައި ރައީސު ޓްރަޕް އަޒުލުުކުރުމުގެ އިޖުރާއާތު ކުރިއަށް ގެންދަން ފާސްކޮށްފައެވެ.
މި ވޯޓުގައި ބައިވެރިވެވަޑައިގެންނެވި 232 މެންބަރުން ވަނީ މިކަމަށް ތާއީދުކުރައްވާފައެެވެ. އޭގެ ތެރޭގައި ރައީސު ޓްރަމްޕްގެ ޕާޓީ، ރިޕަބްލިކަން ޕާޓީގެ 10 މެންބަރުންވެސް ހިމެނިވަޑައިގަންނަވައެވެ. 197 މެންބަރަކު ދެކޮަޅަށް ވޯޓުދެއްވި އިރު، 5 މެންބަރަކު ވަކި ކޮޅަކަށް ވޯޓުދެއްވާފައި ނުވެއެވެ.
މިއީ ރައީސު ޓްރަމްޕް އަޒުލުކުރުމުގެ އިޖުރާއާތު ކުރިއަށް ގެންދަން ހައުސްއިން ފާސްކުރި ދެވަނަ ފަހަރެވެ. މުންތަޚަބު ރައީސު ޖޯ ބައިޑަންގެ ދަރިކަލުން ހަންޓާ ބައިޑަންއާ ދެކޮޅަށް ޔުކްރޭނު ކޯޓުގައި ދައުވާ ކުރުމަށް ޔުކްރޭންގެ ރައީސު ޒެލެންސްކީއަށް ފިއްތުންތައް ކުރިމަތިކުރެއްވުމުގައި މަގާމުގެ ނުފޫޒު ނަހަމަގޮތުގައި ބޭނުންކުރެއްވުމުގެ ކުށުގައި ރައީސު ޓްރަމްޕް އަޒުލުކުރުމުގެ އިޖުރާއާތު ކުރިއަށް ގެންދަން 2019 ވަނަ ސެޕްޓެންބަރު މަހު ހައުސްއިން ފާސްކުރިއެވެ.
ހައުސްއިން މައްސަލަ ފާސްކުރުމަށް ފަހު އެ މައްސަަލައިގެ ޝަރީއަތް ސެނެޓުގައި ކުރިއަށް ގެންދިއުމަށް ފަހު ރައީސު އަޒުލުކުރެވޭނީ ސެނެޓުގެ ތިންބައިކުޅަ ދެބައިގެ އަޣުލަބިއްުޔަތުން އޭނާ ކުށްވެރިވާކަމަށް ނިންމުމުންނެވެ. ސެޕްޓެންބަރު މަހު ކުރިއަށް ގެންދިޔަ މައްސަލަ ސެނެޓަށް ހުށަހެޅުމުން ރިޕަބްލިކަން ޕާޓީގެ އަޣުލަބިއްޔަތު އޮތް ސެނެޓުން ވަނީ ޓްރަމްޕް ކުށްވެރިނުވާކަމަށް ނިންމައިފައެވެ.
މި ފަހަރު އަޒުލުކުރުމުގެ އިޖުރާއާތު ކުރިއަށް ގެންދަން ފާސްކުރި ނަމަވެސް، ޖަނަވަރީ 20 ވަނަ ދުވަހު ޖޯ ބައިޑަން ރައީސުކަމުގެ ހުވައި ކުރެއްވުމުންގެ ކުރިން ސެނެޓުގައި މި މައްސަލައިގެ ތަހުގީގު ކުރިއަށް ނުގެންދެވޭނެވެ. އެއީ މިވަގުތު މިމައްސަލަ ސެނެޓުގައި ކުރިއަށް ގެންދަން ސެނެޓްގެ މެޖޯރިޓީ ލީޑަރު މިޗް މެކްކޮނެލް (ރިޕަބްލިކަން) ދެކޮޅުހައްދަވާފައި ވާތީއެވެ.)
ކޮންގްރެސް ގެ ޑިމޮކްރެޓިކް މެންބަރުން ގަސްތުކުރައްވަނީ، ޖޯ ބައިޑަންގެ ރިޔާސަތު ފެށި، ޑިމޮކްރެޓިކް ޕާޓީގެ އަޣުލަބިއްޔަތާއެކު ސެނެޓްގެ އާ ދައުރު ފެށުމުން، ހައުސްއިން އިއްޔެ ފާސްުކުރި މައްސަލައިގެ ޝަރީއަތް ސެނެޓުގައި ކުރިއަށް ގެންގޮސް އޭނާ ކުށްވެރިވާކަމަށް ފާސްކުރާށެވެ. ގާނޫނީ މާހިރުން ވިދާޅުވާ ގޮތުގައި، ޓްރަމްޕް އޭރު ރައީސުކަމުގެ މަގާމުގައި ނެތްނަމަވެސް، މިފަދައިން ސެނެޓުން ފާސްކޮށްފިނަމަ، އޭނާއަށް ދެން ދައުލަތުގެ އެފަދަ މަގާމަކަށް ކުރިމަތިނުލެއްވޭނެއެވެ.
ރައީސު ޓްރަމްޕަށް ތާއީދުކުރާ މީހުން ޖަނަވަރީ 6 ވަނަ ދުވަހު ސެނެޓްގެ އިމާރާތަށް ގަދަކަމުން ވަދެގަނެ ހިންގި އަމަލުތައް ކުށްެވެރިކުރެއްވި ނަމަވެސް، އޭނާ އެއްވެސް ކަމެއް ގޯސްކޮށް ކުރައްވާފައިވާ ކަމަށް ރައީސު ޓްރަމްޕް އެއްބަސްވެވަޑައިނުގަންނަވައެވެ. އަދި އޭނާ ކުރެއްވި އެއްވެސް ކަަމަށް މާފަށް އެދިވަޑައިގަންނަވާކަށް ބޭނުންފުޅެއްވެސް ނުވެއެެވެ.
އެމެރިިކާގެ ތާރީޚުގައި އަޒުލުކުރުމުގެ އިޖުރާއާތު ކުރިއަށްގެންދަން މިހާތަނަށް ފާސްކޮށްފައިވަނީ ތިން ރައީސަކާ ދެކޮަޅަށެވެ. އެއީ، އެންޑްރޫ ޖެކްސަން (1865-1869)، ބިލް ކްލިންޓަން (1993-2001) އަދި ޑޮނާލްޑް ޓްރަމްޕް (2017-2021) އެވެެ. މި ތިން ބޭފުޅުންވެސް ކުށްވެރިނުވާކަމަަށް ސެނެޓުން ވަނީ ފާސްކޮށްފައެވެ.
