ބައިނަލްއަގްވާމީ ދުނިޔޭގައި ޕާކިސްތާނުގެ އިތުބާރުގެއްލުވާލައި އަގުވައްޓާލުމަށް އިންޑިޔާއިން ފަނަރަ އަހަރު ދުވަހު މައުލޫމާތު އޮޅުވާލުމުގެ ވަރުގަދަ ކެމްޕޭނެއް ހިންގާފައިވާކަން ޔޫރަޕިއަން ޔުނިއަން (އީޔޫ) ގެ އެންޖީއެއްގެ ފަރާތުން ނެރުނު ރިޕޯޓަކުން ހާމަވެއްޖެއެވެ.
ބެލްޖިއަމްގެ ބްރަސެލްގައި މައި އޮފީސް ހުންނަ އަމިއްލަ ޖަމްއިއްޔާއެއް ކަމުގައިވާ އީޔޫ ޑިސްއިންފޯލެބުން 'އިންޑިއަން ކްރޮނިކްލްސް' ގެ ނަމުގައި ނެރެފައިވާ ރިޕޯޓުގައި ވާގޮތުން އިންޑިޔާގެ މަސްލަހަތަށް ފައިދާ ވާގޮތަށް އދ.ގެ އިދާރާތަށާއި އީޔޫއަށް އަމާޒުކޮށް އިންޑީޔާގެ ސްރީވާސްތަވާ ގްރޫޕުން ހިންގާފައިވާ 15 އަހަރު ދުވަހުގެ ކެމްޕޭނަކީ އެ ޖަމްއިއްޔާއިން ހޯދުނު މިފަދަ އެންމެ ބޮޑު ކެމްޕޭނެވެ.
މި ކެމްޕޭނުގައި ސްރީވާސްތަވާ ގުރޫޕުން ވަނީ އެތައް ސަތޭކަ ފޭކް މީޑިޔާއަކާއި ނިޔާވެފައިވާ ޕްރޮފެސަރެއްގެ އައިޑެންޓިޓީވެސް ބޭނުންކޮށްފައެވެ.
ރިޕޯޓުގައި ބުނެފައިވާ ގޮތުން މި ކެމްޕޭނުން ވަނީ "ބައިނަލްއަގްވާމީ މައިދާނުގައި ގަސްތުގައި ޕާކިސްތާނަށް ބަލިކަށިކޮށްލުމަށްޓަކައި" "މަރެވެފައިވަ އެންޖީއޯތައް ދިރުވައި"، "އީޔޫގެ ފަރާތުން ކަމަށް ހަދައި ފޭކް މީޑިޔާ ބޭނުންކޮށްގެން ހަގީގީ މީޑިޔާތަކަށް ޚަބަރު ފޮނުވައި ދެކުނު އޭޝިޔާގެ އެތައް މިލިއަން ބައެއްގެ ވިސްނުމަށް އަސަރުކުރާގޮތަށް" މަސައްކަތްކޮށްފައެވެ.
މި ކެމްޕޭން ހިންގި ގްރޫޕް އީޔޫގެ ސަމާލުކަމަށް އައީ އީޔޫ ޕާލަމެންޓުގައި ތިބި ހައްދު ފަހަނައަޅާފައިވާ ކަނާތު ފިޔައިގެ މެންބަރުންތަކެއްގެ ކަޝްމީރު ދަތުރު އީޔޫގެ މިޝަނެއްކަމަށް ސިފަވާގޮތަށް ފާއިތުވި އަހަރު އިންތިޒާމުކުރި ހިސާބުންނެވެ. އެއީވެސް ކަޝްމީރުގެ މައްސަލައިގައި އީޔޫގެ ވިސްނުން ހުރި ގޮތުގެ ނުބައި ތަސައްވުރެ އާއްމުންނަށް ދިނުމުގެ ބޭނުމުގައެވެ. އެހާ ހިސާބުން އެ ގްރޫޕަށް އީޔޫން ދިފައި އޮތް އިމްތިޔާޒުތައް ނިގުޅައިގަނެ އެ ގްރޫޕް ސަލާމަތީ އަދި މުވާސަލާތީ ގޮތުން ލޮކްޑައުން ކުރިއެވެ.
ޑިސްއިންފޯލެބުން ބުނެފައިވާ ގޮތުގައި މި ކެމްޕޭނުގައި ސްރީވާސްތަވާ ގްރޫޕުގެ އިތުރަށް ހަރަކާތްތެރިވެފައިވަނީ ރޮއިޓާސް ނިއުސް އެޖެންސީގެ އިންޑިޔާގެ ބައިވެރިއެއްގެ ގޮތުގައި މަސައްކަތްކުރާ އޭޝިއަން ނިއުސް އިންޓަނޭޝަނަލް (އޭއެންއައި) އިންނެވެ. މިއީ އިންޑިޔާގެ އެންމެ ބޮޑު ވީޑިޔޯ ނިއުސް އެޖެންސީއެވެ.
ރިޕޯޓުގައި ވާގޮތުން ސްރީވާސްތަވާ ގުރޫޕުން ވަނީ ޔޫރަޕިއަން ޕާލަމެންޓުގެ މެންބަރުންނަށް ލޮބީކޮށްގެން ޕާކިސްތާނާއި ޗައިނާއާއި ދެކޮޅަށް އިންޑިޔާގެ ސިޔާސަތަށަ ތާއީދުކޮށް އާޓިކަލްތައް ލިއުއްވައި މި ތަކެތި އެ ގްރޫޕްގެ ފޭކް ވެބްސައިޓްތަކުގައި ޝާއިއުކޮށްފައެވެ. އެއަށްފަހު، އޭއެންއައި އިން އެއީ ހަގީގީ މަސްދަރުތަކެއް ކަމަށް ހަދައި އެ މަސްދަރުތަކާ ހަވާލާދީ ޚަބަރުތައް އާއްމުކުރަނީއެވެ.
ސްރީވާސްތަވާ ގުރޫޕުން އެމީހުންގެ މިކެމްޕޭނުނުގެ ބޭނުމަށް އުފައްދާފައިވާ ފޭކް އެންޖީއޯތަކުގެ ތެރޭގައި ޔޫރަޕިއަން އޮގަނައިޒޭޝަން އޮފް ޕާކިސްތާނީ މައިނޯރިޓީސް (އީއޯޕީއެމް)، ބަލޫޗިސްތާން ހައުސް އަދި ސައުތު އޭޝިޔާ ޑިމޮކްރެޓިކް ފޯރަމް ފަދަ ތަންތަން ހިމެނެއެވެ. އަދި މި ގްރޫޕުން އުފައްދާފައިވާ 10 އެންޖީއޯއަކުންވަނީ އދ. ގެ އިންސާނީ ހައްގުތަކާ ބެހޭ އޮފީސް، ޔޫއެންއެޗްސީއާރްގެ ކުރިމަތީގައި ޕާކިސްތާނުގެ އަގު ވައްޓާލުމަށް މެދުނުކެނޑި މަސައްކަތްކޮށްފައެވެ.
މި ރިޕޯޓު އާއްމުވުމާ ގުޅިގެން ޕާކިސްތާނުގެ ޚާރިޖީ ވަޒީރު ޝާހް މަޙްމޫދު ޤުރައިޝީ ވަނީ މިރިޕޯޓުގައިވާ ކަންކަން ތަހުގީގުކުރުމަށް އދ.އާއި އީޔޫއަށް ގޮވައިލައްވާފައެވެ.
