ކޯވިޑާ ގުޅިގެން ބަނދު ކުރުމަށްފަހު، 10 މަސް ފަހުން އުތީމު ގަނޑުވަރު، އަލުން ހުޅުވާލަން ހަމަޖައްސައިފިއެވެ.
ސަގާފީ ތަރިކަ ރައްކާތެރިކުރާ ގައުމީ މަރުކަޒުން ނެރެފައި އިއުލާނެއްގައި ބުނެފައިވަނީ މިމަހު 13 ވާ އާދީއްތަ ދުވަހުން ފެށިގެން އުތީމު ގަނޑުވަރުގެ ހިދުމަތް އަލުން ފެށުމަށް ހަމަޖައްސައިފައިވާކަމަށެވެ.
ކޯވިޑްގެ އައު އާންމު ހާލަތުގައި އުތީމު ގަނޑުވަރަށް ޒިޔާރަތްކުރާ މީހުން އަމަލުކުރަންޖެހޭ އުސޫލުގައި ބުނާގޮތުން އެތަނަށް ޒިޔާރަތް ކުރުމުގެ ފުރުސަތު ދެވޭނީ ދިވެހިންނަށާއި ރާއްޖޭގައި ވަޒަންވެރިވެގެން އުޅޭ ބިދޭސީންނަށާއި ވާކް ޕާމިޓް އޮންނަ ބިދޭސީންނަށް އެކަންޏެވެ. އެހެންކަމުން ފަތުރުވެރިންނަށް އެތަނުގެ ހިދުމަތެއް ނުދޭނެއެވެ. ފުރަބަންދުކޮށްފައިވާ އެއްވެސް ތާކުން އަންނަ މީހަކަށް ވެސް ގަނޑުވަރަށް ޒިޔާރަތްކުރުމުގެ ފުރުސަތު ނުދެވޭނެކަމަށް ވެސް އުސޫލުގައި ބުނެއެވެ. ގަނޑުވަރަށް ވަދެވޭނީ މާސްކް އަޅައިގެންނެވެ. އަދި އެތަނުގެ އެތެރޭގައި އުޅޭ އިރުވެސް، އުޅެންޖެހެނީ މާސްކް އަޅައިގެންނެވެ. ގަނޑުވަރަށް ވަނުމުގެ ކުރިން އަތް ދޮވުން ނުވަތަ ސެނެޓައިޒް ކުރަން ޖެހެއެވެ. އަދި ދެމީހުންގެ ދެމެދު ތިން ފޫޓްގެ ދުރުމިން ބަހަށްޓަން ޖެހޭނެކަމަށް ވެސް އުސޫލުގައި ބުނެއެވެ. ގަނޑުވަރުގެތެރޭގައި ހޭދަކުރާ ވަގުތު މަދުކުރުމަށް މިހާލަތުގައި މައުލޫމާތު ފޯރުކޮށްދެވޭނީ ވީހާވެސް ކުރުކޮށްކަމަށް އުސޫލުގައި ބުނެއެވެ. މިނޫންވެސް ކަންކަން އުސޫލުގައިވެއެވެ. އުސޫލާ ހިލާފުވާ ފަރާތްތައް ގަނޑުވަރަށް ވަނުމުގެ ފުރުސަތު ނުދީ ފޮނުވާލުމުގެ އިޚްތިޔާރު ބޮޑުތަކުރުފާނުގެ ހަދާނީ މަރުކަޒަށް ލިބގެންވާކަމަށް ވެސް އުސޫލުގައި ބުނެއެވެ.
އަންނަ އާދީއްތަ ދުވަހުން ފެށިގެން އުތީމު ގަނޑުވަރު ހުޅުވާލާއިރު، ހުކުރު ދުވަސް ފިޔަވައި ކޮންމެ ދުވަހެއްގެ ހެދުނު 8:30 ން މެންދުރު ފަހު 13:30 އަށް ކަނޑައެޅިފައިވާ އުސޫލުގެ ދަށުން ގަނޑުވަރު ދެއްކުން ކުރިއަށް ގެންދަވާނެކަމަށް ވަނި އިއުލާންކޮށްފައެވެ. ކޯވިޑް 19 އާ ގުޅިގެން އުތީމު ގަނޑުވަރު ބަންދުކޮށްފައި ވަނީ މާޗް މަހުގެ ނުވައެއް ގައެވެ.
