މި ސަރުކާރުގެ ތައުލީ ސިޔާސަތު ކަމުގައިވާ "އެއްވެސް ކުއްޖަކު ބާކީނުކޮށް ތައުލީމާއި ތަމްރީނާއި ތަރުބިއްޔަތު ދިނުން" ސިޔާސަތުގެ ދަތުރުގައި އެންމެ މުހިންމު އަދި އެންމެ ބުރަ މަސްއޫލިއްޔަތެއް އަދާކުރަމުން އަންނަ ބަޔަކީ ޓީޗަރުން ކަމުގައި ތައުލީމާބެހޭ މިނިސްޓަރ ޑރ އައިޝަތު ޝިހާމް ވިދާޅުވެއްޖެއެވެ.
މިއަދު ފާހަގަ ކުރަމުން އަންނަ ޓީޗަރުންގެ ދުވަހުގެ މުނާސަބަތުގައި މިނިސްޓަރ ދެއްވި މެސެޖެއްގައި ވިދާޅުވީ ޓީޗަރުން ކުރައްވަމުން އަންނަ ބުރަ އަދި އިޚްލާސްތެރި މަސައްކަތް ތަކަކީ ކިތަންމެ ވަރަކަށް ޝުކުރު އަދާކުރިޔަސް އޭގެ އަގު ވަޒަން ކުރެވޭ ވަރަށްވުރެވެސް ބޮޑު ކަމެއް ކަމަށެވެ.
މިނިސްޓަރު ވިދާޅުވީ ޓީޗަރުންނަކީ ގައުމުގެ އިގްތިސޯދީ ހަކަތައަށް ބޭނުންވާ ތައުލީމީ ދަރިވަރުން ތަމްރީނު ކުރަމުން އަންނަ ބަޔެއް ކަމަށާއި ޓީޗަރުންގެ ދުވަސް ފާހަގަ ކުރުމުގެ މަގްސޮދަކީ ޓީޗަރުންނަށް ހިތްވަރުދީ ޓީޗަރުންގެ މަސައްކަތް ފާހަގަ ކުރުން ކަމަށެވެ. އެހެންކަމުން ދުވަހުގެ ތަހުނިޔާ ހުރިހާ ޓީޗަރުންނަށް މިނިސްޓަރު ވަނީ ފޮނުއްވާފައެވެ.
މިނިސްޓަރުގެ ވާހަކަފުޅުގައި މަތީ ސާނަވީ މަރުޙަލާ ނިންމުމަށް ފަހު މިއަދު އިމްތިޙާނު ފަށާ ދަރިވަރުންނަށްވެސް ވަނީ ޚާއްސަ މެސެޖެއް ފޮނުއްވާފައެވެ. އެގޮތުން ރާއްޖޭގެ ތައުލީމީ ނިޒާމުގެ ތެރެއިން އެ ކުދިންނަށް ފުރުޞަތު އިތުރުކޮށްދީ އަދި އެކުދިން ޝައުގުވެރިވާ ދާއިރާއަކުން ކުރިޔަށް ދިޔުމުގެ މަގު ފަހިކޮށް ދެވިފައިވާ ކަމަށް ވިދާޅުވިއެވެ. އަދި މަތީސާނަވީ މަރުޙަލާ ނިންމާލުމަށް ފަހު އާއިލާ އަށާއި ގައުމަށް ހިދުމަތްކުރާ އުފެއްދުންތެރި ދަރިޔަކަށް ވުމަށްވެސް ވަނީ އިލްތިމާސް ކުރައްވާފައެވެ. ކަމަށެވެ.
