ރާއްޖޭގެ ޤާނޫނީ ނިޒާމު ފުނޑާލީ ރައްޔިތުންގެ މަޖިލީހަށް "ކަނޑުކޮށް މެމްބަރުން ތަކެއް" ވަދެގެން ކަމަށް ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު މުޙަންމަދު މުސްތޮފާ ވިދާޅުވެއްޖެއެވެ.
މުސްތޮފާ ކުރެއްވި ޓްވީޓެއްގައި ވިދާޅުވީ ރާއްޖޭގައި އުފައްދާފައި އޮތީ ވަރުގަދަ ޤާނޫނީ ނިޒާމެއް ކަމަށެވެ. ނަމަވެސް ގައުމުގައި އޮތް ވަރުގަދަ ނިޒާމް "ކަނޑުކޮސް މެމްބަރުންތަކެއް" ރައްޔިތުންގެ މަޖިލީހަށް އިންތިޚާބު ވެގެން މިހާރު ވަނީ އެ ފުނޑާލާފައި ކަމަށް ވަނީ ވިދާޅުވެފައެވެ.
މުސްތޮފާ ވަނީ ރައީސް ޔާމީންގެ ތަރައްގީގެ ސިޔާސަތަށްވެސް ވަރަށް ބޮޑަށް ފާޑު ވިދާޅުވެފައެވެ. އެގޮތުން ތިމަރަފުށީގައި ސަރުކާރުން އެޅުއްވި އެއާރޕޯޓްގެ ޓާމިނަލްގެ ސީލިންގ ވެއްޓިފައިވާ މަންޒަރު ހިމެނޭ ފޮޓޯއެއް ޓްވީޓް ކުރައްވައި ވިދާޅުވީ ރައީސް ޔާމީންގެ ސަރުކާރުން ތަރައްގީގެ ނަމުގައި "ނަކަސް ތެޅިއްޔާ މާރަނގަޅު ވާނެ" ކަމަށެވެ.
އެމްޑީޕީގެ ޓިކެޓުގައި މަޖިލީހަށް އިންތިޚާބުވެވަޑައިގެންނެވި މުސްތޮފާ ފަހުން ޕީޕީއެމްއަށް ބަދަލުވެވަޑައިގެންނެވި ނަމަވެސް ހުންނެވީ ރައީސް މައުމޫންގެ ފަޅީގައެވެ. ރައީސް މައުމޫންގެ ފަޅީގައި ހުންނަވައި މުސްތޮފާ ގެންދަވަނީ ރައީސް ޔާމީން އާއި ސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ.
