ހުޅަނގު އެފްރިކާގެ ގައުމެއް ކަމުގައިވާ މާލީގެ ވަގުތީ ރައީސު ރިޓާޔަޑް ކާނަލް ބާހް އިންޑާއު އިއްޔެ މަގާމުގެ ހުވައިކުރައްވައި މަގާާމާ ހަވާލުވެވަޑައިގެންފިއެވެ. އޭނާގެ ސަރުކާރަކީ އޮގަސްޓު މަހުގެ 18 ވަނަ ދުވަހުގެ އަސްކަރީ އިންގިލާބާ ގުޅިގެން އެކުލަވާލުވުނު 18 މަސްދުވަހުގެ އިންތިގާލީ ސަރުކާރެކެވެ.
ރައީސު އިބްރާހީމް ބޫބަކަރް ކެއިޓާގެ ވެރިކަން އިންގިލާބަކުން ބަދަލުކޮށްލި ސިފައިން އެކުަލަވާލާފައިވާ އަސްކަރީ އިންތިގާލީ މަޖިލީހުން ރައީސުކަމަށް އައްޔަންކުރި އިންޑާއުގެ އިތުރަށް އަސްކަރީ މަޖިލީހުގެ ވެރިޔާ ކާނަލް އަސިމީ ގޮއިޓާ ވަނީ ނާއިބު ރައީސުކަމުގެ ހުވައިކުރައްވާފައެވެ.
މާލީގެ އޮފިޝަލުން އުއްމީދުކުރާ ގޮތުގައި ކުރީގެ ދިފާއީ ވަޒީރެއް ކަމުގައިވާ، އުމުރުފުޅުން 70 އަހަރުގެ އިންޑާއު ރައީސުކަމާ ހަވާލުވެވަޑައިގަތުމުން އަަވަށްޓެރި ގައުމުތަކުން މާލީއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ނިމުމަކަށް އަންނާނެއެވެ.
އަސްކަރިއްޔާއާ ގާތް ގުޅުމެއް އޮތް ބޭފުޅަކު ރައީސުކަމަށް އައްޔަންކުރުމުން އަސްކަރިއްޔާއިން މަދަނީ ވެރިކަމަށް މަގުފަހިކޮށްފާނެ ކަމާމެދު ގިނަ ބަަޔަކު ވަނީ ސުވާލު އުފައްދާފައެވެ. އަސްކަރީ އިންތިގާލީ މަޖިލީހުން ބުނެފައިވާ ގޮތުގައި އިންތިގާލީ ސަރުކާރު 18 މަސްދުވަހުގެ މުއްދަތު ހަމަވުމުން ގައުމީ އިންތިޚާބެއް ބާއްވަައި އާ ސަރުކާރާ ވެރިކަން ހަވާލުކުރާނެއެވެ. 15 މެންބަރު ގައުމު އެކުލެވޭ ހުޅަނގު އެފްރިކާގެ އިގްތާސީ ޖަމްއިއްޔާ، އިކޮނޮމިކް ކޮމިއުނިޓީ އޮފް ވެސްޓް އެފްރިކަން ސްޓޭޓްސް (އެކޮވާސް) އިން އެދެމުން ދިޔައީ ވަގުތީ ރައީސާއި ނާއިބު ރައީސަކީ މަދަނީ ބޭފުޅުން ކަމަަށް ހެދުމަށެވެ.
2014 ވަނަ އަހަރު ދިފާއީ ވަޒީރުކަން ކުރެއްވި ބާހް އިންޑާއުއަކީ ވައިގެ ސިފައިން ކުރީގެ ވެރިޔާއެވެ. އޭނާއާއެކު މަސައްކަތްކުރި ގިނަ މީހުން "އުސޫލުތަކުގައި ހިފަަހައްޓަވާ" ބޭފުޅެއްގެ ގޮތުގައި ސިފަކުރައްވާ އިންޑުއާ މަގާމާ ހަވާލުވެވަޑައިގަތުމަށް ފަހު ދެއްވި ޚިޠާބުގައި ވިދާޅުވެފައި ވަނީ އޭނާ ކޮރަޕްޝާ ދެކޮަޅަށް މަސައްކަތް ކުރައްވާނެ ކަމުގައެވެ. ކުރީގެ ރައީސު ކެއިޓާގެ ސަރުކާރާ ދެކޮޅަށް ވެސް އެންމެ ބޮޑަށް ކުރެވިފައި ވަނީ ކޮރަޕްޝަނުގެ ތުހުމަތެވެ. އިންޑާއު އިތުރަށް ވިދާޅުވި ގޮތުގައި އާއްމުންނާ ދެކޮޅަށް އެކަށީގެންނުވާ ބާރު ސިފައިން ބޭނުންކުރުމާއި، ސިފައިންގެ ބާރުގެ ބޭނުން ނަހަމަ ގޮތުގައި ހިފުންވެސް އޭނާ ހުއްޓުވާނެ ކަމުގައެވެ.
އަމާނާތްތެރިއެެއް ގޮތުގައި މަޝްްހޫރުވެވަަޑައިގެންފައިވާ އިންޑާއު ރައީސުކަމަށް އައްޔަންކުރުމަކީ މާލީގެ އެތެރޭގައި ތިބި އިދިކޮޅު ފަރާތްތަކާއި، ބައިނަލްއަގުވާމީ މުޖްތަމައަށްވެސް ހިތްހަމަޖެހުން ލިބޭނެ ކަމެކެވެ.
