އިންޑިޔާއާއި ޕާކިސްތާނުންވެސް އެތަނެއްގެ މިލްކުވެރިކަމަށް ދައުވާކުރާ ކަޝްމީރު-ލަދާޚް ސަރަހައްދުގައި ހިމެނޭ ގިލްގިތު ބަލްތިސްތާނަށް ފުރިހަމަ ޕްރޮވިންސެއްގެ ދަރަޖަ ދޭން ޕާކިސްތާނު ސަރުކާރުން ނިންމައިފިއެވެ.
މިކަން ހާމަކުރައްވަމުން ދެއްކެވި ވާހަކަފުޅުގައި ކަޝްމިރު އެންޑް ގިލްގިތު-ބަލްތިސްތާން އެފެއާޒް މިނިސްޓަރު ވިދާޅުވިގޮތުގައި ބޮޑުވަޒިރު އިމްރާން ޚާން ވަރަށް އަވަހަށް އެ ސަރަހައްދަށް ޒިޔާރަތް ކުރައްވާނެއެވެ. އަދި އެ ދަތުރުފުޅުގައި އެކަން ރަސްމީކޮށް އިއުލާންކުރައްވާނެއެވެ.
ޕްރޮވިންސަކަށް ވުމުން ޕްރޮވިންޝަލް އެސެންބްލީއެއް ހޮވައި ޕްރޮވންޝަލް ސަރުކާރަކުން ޕްރޮވިންސު ހިންގުމުގެ ގާނޫނީ ހައްގު ލިބުމުގެ އިތުރަށް، ޕާކިސްތާނުގެ ގާނޫނުހަދާ މަޖިލީހުގެ ދެ ގެ، ނޭޝަނަލް އެސެމްބްލީއާއި ސެނެޓަށް މެންބަރުން ހޮވުމުގެ ހައްގުވެސް އެ ސަރަހައްދުގެ ރައްޔިތުންނަށް ލިބިގެންދާނެއެވެ.
ޕާކިސްތާނުގެ މިނިންމުމާ ގުޅިގެން އެ ސަރަހައްދުގެ މިލްކުވެރިކަމަށް ދައުވާކުރާ އިންޑިޔާއިން ވަނީ ވަރަށް ބޮޑަށް ނުރުހުން ފާޅުކޮށްފައެވެ. އިންޑިޔާ ވަނީ ގިލްގިތު-ބަލްތިސްތާނުވެސް ހިމެނޭހެން މުޅި ކަޝްމީރު-ލަދާޚް ސަރަހައްދަކީ އިންޑިޔާއިން ވަކިނުކުރެވޭނޭ އެގައުމުގެ ބައެއްކަން ޕާކިސްތާނު ސަރުކާރަށް އަންގާފައެވެ. އިންޑިޔާއިން ބުނި ގޮތުގައި "ގަދަބާރުން ގާނޫނާޚިލާފަށް ހިފާފައިވާ" ސަރަހައްދަކާ ބެހޭ ގޮތުން އެއްވެސް ކަމެއް ނިންމުމުގެ ޕާކިސްތާނުގެ ސަރުކާރަކަށްވެސް އަދި ޝަރުއީ ދާއިރާއަކަށްވެސް ލިބިގެން ނުވެއެވެ.
"ކަމާ ގުޅުންހުރި ހުރިހާ ފަރާތްތަކާ ވާހަކަދެއްކުމަށް ފަހު، ގިލްގިތު-ބަލްތިސްތާނަށް ލިބެންޖެހޭ ގާނޫނީ ހައްގު ދިނުމަށް ސަރުކާރުން ވަނީ ނިންމާފައި. އަހަރުމެންގެ ސަރުކާރުން މިވަނީ ރައްޔިތުންނަށް ވި ވައުދު ނިންމާފައި." ގިލްގިތު-ބަލްތިސްތާނުގެ ރިޕޯޓަރުންގެ ބަޔަކާ ވާހަކަފުޅުދައްކަވަމުން މިނިސްޓަރު ވިދާޅުވިއެވެ.
ނޯދަން އޭރިޔާސް (އުތުރުގެ ސަރަހައްދުތައް) ގެ ނަން މިހާރު ދެވިފައިވާ ގިލްގިތު-ބަލްތިސްތާނަކީ މިހާރު އިދާރީގޮތުން މަރުކަޒީ ސަރުކާރުގެ ދަށުގައި އޮންނަ ސަރަހައްދެކެވެ. ޕާކިސްތާނުގެ ދަށުގައި އޮންނަ އާޒާދު ކަޝްމީރާއި، ޕާކިސްތާނުގެ ޚައިބަރު ފަޚްތޫންޚާ ޕްރޮވިންސް، އަފްޣާނިސްތާނާ، ޗައިނާއާއި ސަރަހައްދީ ގޮތުން ގުޅިފައިވާ، 73 ހާސް އަކަ ކިލޯމީޓަރުގެ ސަރަހައްދެކެވެ. އެ ސަރަހައްދުގެ އާބާދީއަކީ 1.25 މިލިއަން މީހުންނެވެ.
ފެޑެރަލް އުސޫލުން ވެރިކަން ހިންގާ ޕާކިސްތާނުގައި މިހާރު އޮންނަނީ ހަތަރު ޕްރޮވިންސެވެ. އެއީ ޕަންޖާބު، ސިންދް، ބަލޫޗިސްތާން އަދި ޚައިބަރު ޕަޚްތޫންޚާއެވެ.
