މެކްސިކޯއަށް އައި ބާރުގަދަ ބިންހެލުމުގައި އެގައުމުގެ ގިނަ އަދަދެއްގެ ބަޔަކު މަރުވެ، އަދި އެގައުމަށް ގިނަ ގެއްލުންތަކެއް ވެފައިވާތީ މެކްސިކޯގެ ރައީސް އެންރީކޭ ޕެނާ ނީޓޯއަށް ރައީސް އަބްދުﷲ ޔާމީން ހަމްދަރުދީގެ މެސެޖެއް ފޮނުއްވައިފިއެވެ.
މެކްސިކޯގެ ރައީސްއަށް ރައީސް ޔާމީން ފޮނުއްވި މެސެޖުގައި ވިދާޅުވީ މެކްސިކޯއަށް ބާރުގަދަ ބިންހެލުމެއް އައިސް ގިނަ ބަޔަކު މަރުވެ، ގިނަ އަދަދެއްގެ އިމާރާތް ތަކަށްވެސް ބޮޑެތި ގެއްލުންތަކެއް ވެގެންދިޔަ ޚަބަރު އެއްސެވީ ނުހަނު ކަންބޮޑުވުމާއެކުގައި ކަމަށެވެ.
އެހެންކަމުން މެކްސިކޯއަށް ކުރިމަތި ވެފައިވާ ގައުމީ ހިތާމައިގެ މި ދަނޑިވަޅުގައި ދިވެހި ސަރުކާރާއި، ދިވެހި ރައްޔިތުންގެ ނަމުގައި އަދި ރައީސް ޔާމީންގެ އަމިއްލަފުޅު ނަމުގައިވެސް މެކްސިކޯގެ ސަރުކާރަށާއި މެކްސިކޯގެ ރައްޔިތުންނަށް އިޚްލާސްތެރި ހަމްދަރުދީއެއް ފޮނުއްވާ ކަމަށްވެސް ރައީސް ޔާމީންގެ މެސެޖުގައި ވިދާޅުވެފައި ވެއެވެ. އަދި މި ހާދިސާގައި ދުނިޔެ ދޫކޮށް ގޮސްފައިވާ މީހުންގެ އާއިލާ ތަކަށް ތައުޒިޔާ ރައްދު ކޮށްދެއްވުމަށްވެސް ރައީސް ޔާމީން ވަނީ މެކްސިކޯގެ ރައީސްގެ އަރިހުން އެދިވަޑައިގެންފައެވެ.
